00:00:00 IGIHE NETWORK KN KINYARWANDA EN ENGLISH FR FRANCAIS

Urwibutso Jay Shetty afite ku Rwanda

Yanditswe na Mahoro Vainqueur
Kuya 16 Mutarama 2023 saa 01:55
Yasuwe :

Jay Shetty wamamaye ku mbuga nkoranyambaga mu biganiro byibanda ku butumwa n’inama z’ubuzima bifasha benshi, yavuze ko yatunguwe n’imibereho y’Ingagi zo mu Rwanda n’uburyo buri mwaka hakorwa ibirori byo kuzita amazina.

Ibi yabigarutseho mu kiganiro ‘On Purpose Podcast’ aherutse kugira n’umunyamideli Kendall Jenner kimaze kurebwa n’abarenga miliyoni ebyiri.

Iki kiganiro cyibanze ku mibereho ya muntu n’ibyerekeye guhangayika, kutigirira icyizere, n’uburyo bwo kwishima byukuri.

Ubwo iki kiganiro cyari kigeze ku munota wa 13, Shetty yaratiye Kendall Jenner ibihe byiza we n’umugore we baherutse kugirira mu Rwanda.

Ubwo bari bageze ku buzima bw’abantu n’uburyo babana n’inyamaswa, Kendall Jenner yavuze ko yakuriye mu muryango ukunda kubana n’indogobe cyane.

Avuga ko ari ibintu yakunze cyane kuva mu bwana kugeza ubu aho afite indogobe akunda cyane yitwa Delandra .

Gusa avuga ko atari we wahisemo iryo zina ahubwo bayimuhaye ariryo zina ifite ariko we akunda kuyita Dylan cyangwa Dill.

Ibi byahise byibutsa Jay Shetty wahoze abarizwa mu muryango w’abihaye Imana bazwi nk’aba-Monk, ibihe yagiriye mu Rwanda ari kumwe n’umugore we Radhi Devlukia-Shetty ubwo bari bagiye gusura Ingagi.

Yagize ati “Inyamaswa zifite uburyo zitanga ibyiyumviro bidasanzwe ku bantu, no mu Buhinde abantu benshi bubaha inka cyane, bayifata nk’inyamaswa idasanzwa kandi yitonda.”

“Ndibuka vuba aha ubwo njye n’umugore wanjye Radhi duheruka mu Rwanda, twagiye gusura ingagi tureba uko zibayeho turazikurikira tujyana nazo.”

Shetty yakomeje agira ati “Ni ibintu bidasanzwe, ni inyamaswa zubahwa na benshi mu Rwanda. Iyo hari abana b’ingagi bavutse haba ibirori byo kwibita amazina bihuriramo abantu batandukanye, ni ibintu bidasanzwe, biba bisa neza cyane.”

Kendall Jenner wari waryohewe n’iyi nkuru yavuze ko ibintu bishimishije cyane. Jay Shetty w’imyaka 35 n’umugore we Radhi w’imyaka 32 basuye u Rwanda muri Kamena 2022.

Nyuma yo gushyingiranwa mu 2016, Jay Shetty nibwo yafunguye urubuga rwa Facebook anyuzaho amashusho ye yiganjemo ubutumwa bugaruka ku nama z’ubuzima zigafasha benshi.

Binyuze kuri uru rubuga Shetty amaze kwigizaho abamukurikira kuri uru rubuga barenga miliyoni 29. Mbere y’uko ashaka umugore yabanje kuba mu muryango w’abihaye Imana (Monk) mu Buhinde aho afite inkomoko.

Kubera gukunda gusakaza amahoro no kwigisha abantu inzira y’imibereho nibyo byatumye yogosha umusatsi wose amara imyaka itatu ari mu bihaye Imana (Monk).

Jeffy Shetty wakuriye mu Bwongereza yaretse kurya inyama nyuma yo guhura n’umugore we Radhi. Kuri ubu Jeffy ari kwitegura urugendo rw’ibitaramo bitandukanye azakorera hirya no hino ku Isi biteganyijwe gutangira ku wa 21 Gashyantare 2023 i Philadelphia.

Ibi bitaramo by’iminota 90 bizahera muri Leta Zunze Ubumwe za Amerika , Canada, Australia , u Buhinde, u Bufaransa, u Buholandi, Ubwongereza, Leta Zunze Ubumwe z’Abarabu (UAE), Espagne na Denmark.

Uru rugendo azamaramo amezi ane azabikora nyuma yo gushyira hanze igitabo yise “8 Rules of Love: How to Find It, Keep It, and Let It Go,” kizasohoka ku wa 31 Mutarama 2023.

Shetty afite ikiganiro yise “On Purpose” cyibanda ku buzima n’imibereho myiza ya rubanda gica ku mbuga nkoranyambaga ze zirimo YouTube ifite abayikurikira barenga miliyoni enye, amashusho ariho amaze kurebwa na miliyoni 261.

Mu byo yigisha yibanda ku bumenyi yakuye mu bihaye Imana (Monk), mu 2020 Shetty yamuritse igitabo yise “Think Like A Monk: Train Your Mind for Peace and Purpose Everyday,”

Kuri ubu Jay Shetty ari mu myiteguro y'ibitaramo azakorera mu bihugu bitandukanye hirya no hino ku Isi
Jay Shetty ari kumwe n'umugore we Radhi na we ufite ibiganiro kuri Youtube
Jay Shetty wamamaye ku mbuga nkoranyambaga avuga ko yakunze uburyo mu Rwanda bakora ibirori byo 'Kwita Izina' abana b'ingagi
Ibiganiro bya Jay Shetty bikurikirwa na benshi bari hirya no hino ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .