Urukiko rw’Ikirenga rwategetse ivanwaho ry’ingingo z’amategeko byemejwe ko zibangamye

Yanditswe na Ishimwe Israel
Kuya 24 Mata 2019 saa 04:35
Yasuwe :
0 0

Urukiko rw’Ikirenga rwategetse ivanwaho ry’ingingo zimwe n’ibika bigize Itegeko riteganya ibyaha n’ibihano muri rusange, byagaragaye ko zinyuranye n’Itegeko Nshinga mu bijyanye no kurengera umuryango, ubwisanzure bwo gutanga ibitekerezo n’itangazamakuru.

Nyuma y’isohoka ry’iri tegeko ku wa 30 Kanama 2018, ryagaragajwemo inenge n’inzego zirimo itangazamakuru ndetse Me Mugisha Richard yitabaza Urukiko rw’Ikirenga asaba ko izo ngingo zikurwaho.

Ziri mu byiciro bibiri, kimwe kirimo iya 154, 233 na 236 zihana gusebanya zafashwe nk’izibangamiye itangazamakuru n’ubwisanzure bwo gutanga ibitekerezo, ikindi kikabamo ingingo ya 136, 138 na 139 zihana ubusambanyi, ubushoreke no guta urugo, zinengwa kubangamira ubwiyunge bw’abagabo n’abagore.

Urukiko rw’Ikirenga ruri ku cyicaro cyarwo ku Kimihurura, kuri uyu wa Gatatu rwanzuye ko ingingo zimwe zikurwaho n’ibika bimwe bigahindurwa kuko binyuranya n’Itegeko Nshinga. Imyanzuro yasomwe n’abacamanza batanu barimo Cyanzayire Aloysie na Perezida w’Urukiko rw’Ikirenga, Prof. Sam Rugege.

Hakozwe impinduka mu mategeko abangamiye umuryango

Atanga ikirego muri Nzeri 2018, Me Mugisha yavuze ko ingingo za 136, 138 na 139 zinyuranye n’iya 18 y’Itegeko Nshinga, ivuga ko “umuryango, ari wo shingiro kamere ry’imbaga y’Abanyarwanda, urengerwa na Leta.”

Izo ngingo ziteganya ko ibyaha by’ubusambanyi, ubushoreke no guta urugo bihanishwa igifungo, byasobanurwaga ko bishobora gufunga inzira zose z’ubwiyunge hagati y’umugabo n’umugore byari kurengera wa muryango.

Urukiko rw’Ikirenga rwanzuye ko ingingo ya 136 ihana icyaha cy’ubusambanyi, mu bika bitatu bibanza itanyuranyije n’iya 18 mu Itegeko Nshinga kuko ari itegeko ryashyizweho hagamijwe guhana no kurengera umuryango.

Gusa igika cya gatatu ngo gikwiye kwandikwa mu buryo bugaragaza neza uko urubanza ruregwamo abashakanye rushobora guhagarara mu gihe urega yisubiyeho. Umucamanza kandi yavuze ko ibika bisoza ingingo ya 136 byavanwaho.

Ibyo bika birimo icya kane kivuga ko “Icyakora, iyo dosiye yarangije kuregerwa urukiko cyangwa gufatwaho icyemezo, kwisubiraho ntibihita bihagarika isuzumwa ry’urubanza cyangwa irangiza ryarwo. Umucamanza arabisuzuma akaba yabyemera cyangwa akabyanga akanasobanura impamvu.”

Ikindi ni icya gatanu cyateganyaga ko “iyo umucamanza yemeye ukwisubiraho k’uwahemukiwe, kureka urubanza cyangwa irangiza ryarwo bigira ingaruka no kuwakoranye icyaha n’uregwa.”

Umunyamategeko Mugisha yanagaragaje ko ingingo ya 138 ivuga ku bushoreke na 139 ivuga ku guta urugo, zinyuranye n’iya 18 y’Itegeko Nshinga, ashimangira ko ibyaha hagati y’abashakanye bikwiye gufatwa mu rwego mbonezamubano aho kuba nshinjabyaha.

Ingingo ya 138 ivuga ko umuntu ubana nk’umugabo n’umugore n’uwo batashyingiranywe, umwe muri bo cyangwa bombi bafite uwo bashyingiranywe, ashobora guhanishwa igifungo kirenze umwaka umwe ariko kitarenze imyaka ibiri; naho iya 139 ikavuga ko umwe mu bashyingiranywe utaye urugo mu gihe kirenze amezi abiri nta mpamvu zikomeye akihunza ibyo ategetswe, ahanishwa igifungo kitari munsi y’amezi atatu, kitarenze atandatu.

Urukiko rwanzuye ko nta kibazo itegeko rifite kuko kuvuga ko gufungwa k’umwe mu bashakanye byawuhungabanya bigatera n’igisebo ku bana, bitaba impamvu yo gukuraho igihano kuko n’ibindi byaha nk’ubujura, urugomo n’ibindi bigira ingaruka ku muryango.

Umucamanza Cyanzayire yanavuze ko kuvanaho itegeko rihana ubusambanyi hashingiwe ku byemezo byamaze gufatwa n’indi bihugu nka Ghana, u Buhinde na Korea y’Epfo nta shingiro bifite kuko “u Rwanda, icyaha cy’ubusambanyi si indangagaciro yaruranze.”

Ingingo zavuzweho kuniga itangazamakuru zavanweho

Me Mugisha yanagaragaje impungenge ku za 154, 233 na 236 zihana gusebanya, avuga ko ziniga ubwisanzure bwo gutanga ibitekerezo n’itangazamakuru.

Urukiko rwanzuye ko ingingo ebyiri zivanwaho kuko zinyuranye n’itegeko nshinga; izi zirimo iya 154 yahanaga ‘gusebya mu ruhame imihango y’idini’ yateganyaga igifungo kitari munsi y’iminsi 15 ariko kitageze ku mezi atatu n’ihazabu y’ibihumbi 100 Frw ariko atarenze ibihumbi 200 Frw cyangwa kimwe gusa muri ibyo bihano.

Urukiko rwanzuye ko inyuranyije n’ingingo ya 38 y’Itegeko Nshinga, iteganya ko ‘Ubwisanzure bw’itangazamakuru, ubwo kugaragaza ibitekerezo n’ubwo guhabwa amakuru buremewe kandi bwubahirizwa na Leta.’

Urukiko rwanavuze ko u Rwanda atari igihugu gishingiye ku idini, ku buryo ubigizeho ikibazo yabikurikirana mu rubanza mbonezamubano.

Indi ngingo yavanyweho ni iya 233 ihana icyaha cyo gukoza isoni abayobozi b’igihugu n’abashinzwe umurimo rusange w’Igihugu.

Yateganyaga ko umuntu ukoza isoni mu magambo, mu bimenyetso cyangwa ibikangisho, inyandiko cyangwa ibishushanyo, umwe mu bagize Inteko Ishinga Amategeko, umwe mu bagize Guverinoma, abashinzwe umutekano cyangwa undi wese ushinzwe umurimo rusange w’igihugu, ahanishwa igifungo kitari munsi y’umwaka umwe ariko kitageze ku myaka ibiri n’ihazabu y’amafaranga y’u Rwanda atari munsi y’ibihumbi magana atanu ariko atarenze miliyoni imwe.

Iyo ngingo yakomezaga ko “niba gukoza isoni byabereye mu nama y’Inteko Ishinga Amategeko cyangwa byakorewe umwe mu bayobozi b’ikirenga b’Igihugu, ibihano biteganyijwe mu gika cya mbere cy’iyi ngingo byikuba kabiri.”

Me Mugisha yavuze ko iyo ngingo nayo inyuranye n’iya 38 y’Itegeko Nshinga ivuga ku burenganzira bw’itangazamakuru no gutanga ibitekerezo, n’iya 15 ivuga ngo “abantu bose barareshya imbere y’amategeko. Itegeko ribarengera ku buryo bumwe.”

Yavuze ko izi ngingo zibusanya ku burenganzira abantu bahabwa zikanabangamira itangazamakuru, ndetse iyo ngingo ikaba yatuma abayobozi bakekwaho imyitwarire mibi ntacyo bavugwaho, ikaba isumbanisha abantu kuko ivuga abayobozi ntivuge ku bikorera.

Urukiko rw’Ikirenga rwanzuye ko iyo ngingo inyuranyije n’ingingo iteganya ko abantu bareshya kandi bagomba kurengerwa mu buryo bumwe, ndetse amakuru n’ibitekerezo bidakwiye kuba ibishimisha ubuyobozi gusa ahubwo bikwiye gutangwa nta bikangisho.

Bitabaye ibyo ngo hari uwatinya kuvuga ukuri cyangwa gutangaza amakuru ku bikorwa n’abayobozi ngo adakurikiranwaho icyaha cyo gukoza isoni abayobozi b’igihugu baramutse batishimiye ibyo bitekerezo, kandi ubwisanzure bwo kugaragaza ibitekerezo no kubaza abayobozi ibyo bakorera abaturage ari ihame rya leta igendera kuri demokarasi.

Ingingo ku gutuka perezida yagumyeho

Me Mugisha yari yanasabye impinduka ku ngingo ya 236 iteganya ko utuka cyangwa usebya Perezida wa Repubulika, ahanishwa igifungo kitari munsi y’imyaka itanu ariko itarenze imyaka irindwi n’ihazabu irenze miliyoni 5 Frw ariko atarenze miliyoni zirindwi.

Prof Rugege yavuze ko iyi ngingo yo igendana n’inshingano zihariye Perezida afite zo kurinda ubusugire bwacyo, ku buryo kumusebya byahungabanya byinshi bitewe n’inshingano afite ku gihugu.

Urukiko rwagumishijeho iyi ngingo, nyuma yo kwanzura ko rusanga hari itandukaniro ku gusebya Perezida wa Repubulika n’abandi bantu, kuko abasanzwe bashobora kuregera indishyi, ariko kuri Perezida, ubwinshi n’uburemere bw’inshingano ze ntibwamukundira.

Nyuma y’isomwa ry’uru rubanza, Me Mugisha Richard yabwiye itangazamakuru ko banyuzwe n’umwanzuro w’urukiko.

Ati “Twashimishijwe n’uko twatanze ibitekerezo ku ngingo z’amategeko. Hari izo urukiko rwemeranyije natwe zikaba zigomba kuvaho, ku zagumyeho ni ukuvuga ko abandi batanze ibitekerezo birusha ibyacu uburemere. Birasanzwe mu migendekere y’igihugu gifite ubutabera bugendera ku mategeko.’’

Mbere yo gufata uyu mwanzuro, Urukiko rwumvise ibitekerezo bitandukanye birimo iby’Impuzamiryamiryango Pro-femmes Twese hamwe, Ishuri ry’Amategeko muri Kaminuza y’u Rwanda n’Ishyirahamwe ry’Abanyamakuru mu Rwanda (ARJ).

Icyumba cy'iburanisha cy'Urukiko rw'Ikirenga ku Kimihurura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza