Uruhare rw’umuhanzi muri ibi bihe igihugu gihanganye na Coronavirus

Yanditswe na Nsengiyumva Emmy
Kuya 25 Werurwe 2020 saa 04:40
Yasuwe :
0 0

Muri iki gihe henshi ku Isi muri rusange ndetse no mu Rwanda by’umwihariko, hari gufatwa ingamba zinyuranye mu rwego rwo gukumira ikwirakwira rya Coronavirus, bamwe mu bafasha Leta gukangurira abantu kumva ingamba ziba zafashwe ni abahanzi bakunze kumvwa na benshi.

Intore Tuyisenge Perezida w’Ihuriro ry’abahanzi ba muzika mu Rwanda, yagaragaje uruhare buri muhanzi yagira muri ibi bihe igihugu gihanganye n’ikwirakwira rya Coronavirus ikomeje kurikoroza ku Isi yose.

Mu kiganiro yagiranye na IGIHE Intore Tuyisenge, yavuze ko abahanzi ba muzika by’umwihariko bari mu bafite ababakurikira benshi bityo ko iki gihe bari mu bakenewe kugira ngo bunganire Leta mu kumvisha abaturage amabwiriza yo kwirinda icyorezo cya Coronavirus.

Icya mbere ni uko bo ubwabo bakurikiza amabwiriza aba yashyizweho nk’abantu rubanda bareberaho cyane, niba Leta isabye ko baguma mu rugo bakaba aba mbere mu kubahiriza aya mabwiriza, kimwe n’andi atangwa n’inzego zibishinzwe.

Icya kabiri, hari abahanzi bafite studio mu ngo iwabo babasha no kwikorera indirimbo, bashobora kuririmba izijyanye no gukumira iki cyorezo bagaragaza ububi bwacyo ndetse bakanatangamo ubutumwa burimo no gushishikariza abantu gukurikiza amabwiriza bahabwa.

Icya gatatu Intore Tuyisenge yavuze ni uko abahanzi bagira abantu benshi babakurikira ku mbuga nkoranyambaga, aha bafasha Leta bagashyiraho ubutumwa butandukanye butangwa bityo bagakangurira abakunzi babo n’ababakurikira gukurikiza amabwiriza baba bahawe.

Intore Tuyisenge yavuze ko mu byukuri abahanzi batari bakangukira neza ibi bikorwa ariko nanone ashimira bake bahise babyumva batangiye no kubishyira mu ngiro.

Ati” Birimo biraza, ndashimira abakoze indirimbo, abagiye batambutsa ubutumwa bunyuranye bwunganira Leta muri izi gahunda n’abandi twizeye ko bari buze kubikora kuko ni uruhare rwacu nk’abanyarwanda muri rusange.”

Uyu mugabo yibutsa abahanzi ko ari bamwe mu bagira abantu babakurikira bityo igihe bafatanya na Leta byayorohereza muri gahunda iyo ari yo yose ijyanye n’ubukangurambaga.

Yabasabye kugira uruhare mu kurinda ikwirakwira rya Coronavirus mu banyarwanda ari nabo bafana babo.

Intore Tuyisenge uhagarariye Ihuriro ry'abahanzi ba muzika yabwiye abahanzi ko bakeneye kugaragaza uruhare rwabo mu gushyigikira Leta muri ibi bihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .