Urugendo rwa Mike Ogoke, wakoze amashusho y’indirimbo zikomeye muri Afurika uhanze amaso u Rwanda

Yanditswe na Uwiduhaye Theos
Kuya 17 Ugushyingo 2019 saa 10:16
Yasuwe :
0 0

Niba uzi amashusho y’indirimbo zimwe za Burna Boy zirimo ‘Check and Balance’ na ‘Don Gorgon’, aya ‘Girl’ ya Bracket na Wizkid, ‘One of a Kind’ ya Davido cyangwa se ‘Do me’ ya P Square tutagiye kure ubaye uzi aya ‘Mdogo Mdogo’ ya Diamond Platnumz; nta kabuza ufite agasamusamu ku mikorere y’inzu itunganya amashusho yo muri Afurika y’Epfo ya Godfather Productions kuko urutonde rw’izabanyuze mu biganza z’abahanzi bakomeye ni rurerure.

Iyi nzu ni sekuru w’izindi zose muri Afurika ariko ifite ibirindiro muri Afurika y’Epfo ndetse ni nayo yatumye abahanzi baho benshi batana no kujya gukorera indirimbo hanze y’iwabo.

Itinyura benshi bumvaga bazahomba nibashora ayabo mu byo gutunganya amashusho y’indirimbo.

Ni inzu yashinzwe na Mike Ogoke uherutse kuza mu Rwanda tariki 14 Ukwakira 2019, mu mishinga itandukanye igamije guteza imbere umuziki w’u Rwanda ndetse no gusura studio zitandukanye zirimo iya The Mane Music Label ndetse na Kina Music ya Ishimwe Clement.

Mu kiganiro yagiranye na IGIHE yahishuye byinshi ushobora kwibaza kuri iyi nzu yabaye ubukombe mu gutunganya indirimbo z’abahanzi batandukanye bakomeye.

Yavuze ko urugendo rwe rwatangiye mu 2001 kuko aribwo GodFather Productions yatangiye gukora ariko cyane cyane yibanda kuri filime nyuma iza kubivamo ijya mu byo gutunganya indirimbo z’abahanzi.

Ibyo babitewe n’uko yaje gusanga amashusho y’indirimbo yakorwaga atari ku rwego rwiza, yahisemo gushyiramo imbaraga ngo abahanzi bakorerwe amashusho meza kandi anoze.

Uyu mugabo yemeza ko umusaruro w’ibyuya yiyushye wagize akamaro ati “Kandi nk’uko tubibona uyu munsi amashusho y’indirimbo zo muri Afurika ashobora guhatana n’ayo muri Amerika ndetse ubu dufite amashusho meza kurusha ayo abanyamerika bakora. Byavuye ku rwego rumwe bigera ku rundi.”

Umuhanzi wageze muri Godfather aba ari mu marembo amugira icyamamare

Mike Ogoke avuga ko intego ya mbere afite ari ukugeza umuhanzi bakoranye ku rundi rwego akaba umuhanzi w’ikimenyabose ku Isi.

Ati “Intego yacu ni ukugeza umuhanzi dukoranye ku ruhando rw’Isi yose kandi twarabikoze; hari abahanzi twavuga barimo nka Mr Flavour, P Square, D Banj, 2 Face Idibia, Davido, Wizkid, Burna Boy, Diamond Platnumz, Jah Prayzah […] urutonde ni rurerure kandi ni nabyo dushaka gukora mu Rwanda.”

Iyo avuga amateka y’uko batangiye wumva atari ibintu byoroshye ariko ku bw’Imana bakaza kubigeraho ubu bakaba bari kurya imbuto z’imbaraga nyinshi bakoresheje n’amajoro baraye badasinziriye.

Ati “Umuhanzi wa mbere twakoranye yitwaga Face, icyo gihe yabaga mu itsinda rya Plantashun Boiz. Iri tsinda ryari rigizwe na 2Face, Black na Face. Icyo gihe twabakoreye amashusho y’indirimbo ya Face. P Square barayabonye icyo gihe bashakaga kujya gukorera amashusho y’indirimbo muri Canada bahita babihagarika baza gukorana natwe. Twakoranye nabo n’abandi bahanzi babiri icyo gihe twakoze ‘Do Me’.”

Yemeza ko niyo umuhanzi yaba yari atangiye gusubira inyuma mu muziki bamufasha kongera gushashagirana ku buryo bukomeye akongera kugira impagarike.

Ati “N’ubwo waba utangiye gusubira inyuma, turagufasha tukongera kuguha ubuzima, twarabikoze turabigenzura tuza kubona ariko bimeze. Nta kindi kibidufasha ni ijambo rimwe gusa ‘Kubigirira umuhamagaro’. Ntabwo ari ugushaka amafaranga, nkunda umuziki, ncuranga ibicurangisho bitandukanye kandi nanavukiye mu muziki. Iyo mbonye ikintu ku muziki kintera imbaraga kandi nkaharanira gukora ibirenzeho.”

Uyu muyobozi wa Godfather Productions yemeza ko ikintu cya mbere cyatumye iyi nzu ikomeza kuba ubukombe ari uko umurego yatangiranye utigeze ucogora ikindi akaba yari afite umuhamagaro wo gutunganya amashusho y’indirimbo kandi ashaka ko umugabane wa Afurika umenyekana ku Isi yose mu bijyanye n’uruganda rwa muzika.

Ku bantu bamwe batekereza ko gukorana na Godfather bihenze avuga ko atabyicuza kuko ikintu cya mbere ari ugukorera abantu ibintu byiza.

Ati “Abantu bavuga ko mpenze ariko ntabwo mbyicuza […] buri gihe tugendera ku kuvuga ko hari agaciro mu kintu twakoze kubera ko gutunganya indirimbo ntabwo ari ikintu wakwiba iyo washyize amafaranga mu gutunganya indirimbo biba bigaragara iyo ntayo nabwo biba bigaragara ko ntayarimo.”

Avuga ko icy’ingenzi baba bagambiriye ari ugufasha abantu, niyo baba batabigezeho bagerageza uburyo babona igisubizo biciye mu zindi nzira bakagufasha kwandika ‘script’ y’amashusho ndetse n’ibindi batitaye ku kuntu uhagaze mu mufuka.

Kuri we indirimbo ya mbere yakozwe na Godfather Productions yashyize Nigeria ku rundi ku ruhando mpuzamahanga ni ‘Do me’ ya P Square, iya kabiri ikaba ‘Shayo’ ya Bigiano.

Anavuga ko kuva igihe bakoranye na Diamond Platnumz ku mashusho ya Mdogo Mdogo umuziki wa Tanzania wahise ugera ku rundi rwego, ndetse n’ubwo bakoraga Tchelete ya Mafikizolo na David, Ykee Benda na Eddy Kenzo bo muri Uganda na Jah Prayzah wo muri Zimbabwe hari ikintu byongeye ku muziki w’ibihugu bakomokamo muri rusange.

Ati “Ikintu cyose dukozeho, tugihinduramo ikintu kiri ku rundi rwego. Ni umugisha w’Imana. Dushaka uwo mugisha dufite ko ugera no ku Rwanda.”

Mu minsi mike abanyarwanda barakabya inzozi batangire kugaragara kuri televiziyo zikomeye

Mike avuga ko yabonye impano nyinshi zitandukanye mu Rwanda kandi nawe icyamuzanye ari ukuzishyigikira no kuzitera ingabo mu bitugu ngo zigere ku ruhando mpuzamahanga.

Ati “Icyo nabonye cyo hari impano nyinshi mu Rwanda igikenewe ni ukuzizamura icyo twaje gukora rero ni icyo, kandi mfite icyizere cy’uko mu minsi itari myinshi turatangira kubona abahanzi bo mu Rwanda kuri za MTV, Trace Tv, Soundcity n’ahandi henshi, ni isezerano kandi rifite ishingiro tuzabikora. Turi hano ngo dukorere hamwe duhuze imbaraga.”

Ngo ntabwo baje kunyunyuza imitsi y’abanyarwanda ahubwo baje gufatanya nabo kugira ngo umuziki wabo ukomeze gutera imbere ndetse igihe uzaba hari aho umaze kugera harenze aho uri ubu bazishimane nabo.

Ati “Ntabwo twaje gufata amafaranga hano ngo twigendere dushaka kwigisha abantu hano, bakadufasha kugira ngo ejo twese tuzavuge ngo ibi twabigezeho kubera gufatanya.”

Abahanzi nka Alyn Sano, France na Meddy nibo bahanzi yaje mu Rwanda azi kandi mu minsi ya vuba yavuze ko abantu bazabona imishinga yavuye mu biganiro bagiranye.

Ubutumwa bwe ku bahanzi bo mu Rwanda ni uko ‘nidufatanya tuzakomeza guhagarara bwuma, ariko nitwicamo ibice tuzaba abahombyi’.

Reba ikiganiro IGIHE yagiranye na Mike Ogoke


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza