Izigezweho

Umuyobozi w’Ishami ryo kurwanya igituntu muri OMS yakozwe ku mutima n’igitaramo cya Mico The Best

Yanditswe na Nsengiyumva Emmy
Kuya 25 Werurwe 2021 saa 09:36
Yasuwe :
0 0

Dr Lucica Ditiu, Umunya-Romania ushinzwe kurwanya indwara y’igituntu mu Ishami ry’Umuryango w’Abibumbye ryita ku Buzima (OMS), yashimiye bikomeye Mico The Best wateguye igitaramo cyo gukangurira Abanyarwanda kwirinda iyi ndwara iri mu zihitana abantu benshi ku Isi.

Ubu butumwa bwatambutse mu gitaramo uyu muhanzi yakoze kuri uyu wa Gatatu tariki 24 Werurwe 2021, umunsi mpuzamahanga wo kwirinda indwara y’igituntu.

Cyari igitaramo Mico The Best yateguye mu rwego rwo gukangurira Abanyarwanda gukumira ikwirakwira ry’igituntu.

Ni igitaramo uyu muhanzi yafatanyijemo n’umuraperi Riderman, kiyoborwa na Anita Pendo umushyushyarugamba uri mu bagezweho muri iyi minsi.

Ubutumwa bwatangiwe muri iki gitaramo bwari bwiganjemo ubwo gukangurira abantu kwipimisha igituntu hakiri kare, kuko ari indwara ivurwa igakira iyo bikozwe ku gihe.

Mu butumwa Umuyobozi w’Ishami ryo kurwanya igituntu muri OMS, Dr Lucica Ditiu, yatanze muri iki gitaramo, yashimiye bikomeye uyu muhanzi ndetse na Minisiteri y’Ubuzima yifatanyije nawe.

Dr Lucica Ditiu yagize ati “Muraho mwese, ni iby’agaciro kubona amahirwe yo kugira icyo mvuga mu gushyigikira ubumwe bw’inshuti zanjye n’abafatanyabikorwa bo mu Rwanda, nshimishijwe no kuba ndi hano. Ndashimira Minisitiri w’Ubuzima mu Rwanda, Dr Daniel Ngamije, nkanasuhuza umuvandimwe Mico the Best.”

Uyu muyobozi yashimiye Leta y’u Rwanda imbaraga ishyira mu kurwanya indwara zitandukanye zihitana ubuzima bw’abaturage.

Yaboneyeho kandi umwanya wo gushimira Mico The Best wateguye igitaramo cyo kwizihiza umunsi mpuzamahanga wo kurwanya Igituntu.

Dr Lucica yijeje Mico The Best na Leta y’u Rwanda ubufatanye mu rugendo rwo guhashya igituntu.

Anita Pendo niwe wari umuyobozi w'iki gitaramo cya Mico The Best
Mico The Best na Riderman ku rubyiniro
Mico The Best amaze igihe mu bukangurambaga bwo kurwanya igituntu
Minisitiri w'Ubuzima Dr Daniel Ngamije yifatanyije na Mico The Best
Umuyobozi w’Ishami ryo kurwanya igituntu muri OMS yakozwe ku mutima n’igitaramo cya Mico The Best

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .