Umuryango wa Kardashian ugiye gutangiza ikindi kiganiro

Yanditswe na Uwiduhaye Theos
Kuya 11 Ukuboza 2020 saa 03:22
Yasuwe :
0 0

Nyuma y’amezi make batangaje ko bagiye guhagarika ikiganiro cyabo cyari kizwi nka ‘Keeping Up With the Kardashians’ cyerekanaga ubuzima bwabo bwite, abo mu muryango wa Kardashian bagiye gutangiza ikindi.

TMZ yatangaje ko Kim Kardashian, Kris Jenner, Kylie Jenner, Khloé Kardashian, Kendall Jenner na Kourtney Kardashian bagiye gukora ikiganiro gishya gishobora gutangira kujya hanze mu mpera za 2021. Iki kiganiro kizajya kinyuzwa kuri Hulu Tv muri Amerika no kuri Star ku bantu bari hanze yayo.

Muri Nzeri uyu mwaka nibwo bari batangaje ko bagiye guhagarika icyo bari basanzwe bakora cyakundwaga cyane.

Iki kiganiro ubusanzwe cyavugaga ku buzima bw’uyu muryango, cyagaragaragamo ababyeyi b’abo muri uyu muryango Kris Jenner na Caitlyn Jenner [uyu yahoze ari umugabo wa Kris Jenner nyuma aza kwihinduza umugore ndetse mbere akiri umugabo yitwaga William Bruce Jenner].

Abandi bakigaragaragamo ni Kourtney Kardashian n’uwahoze ari umugabo we Scott Disick, Kim Kardashian West, Khloé Kardashian, Rob Kardashian, Kendall Jenner na Kylie Jenner.

Mu itangazo ryashyizwe hanze na Kim Kardashian, ryagaragazaga ko mu ntangiro za 2021, iki kiganiro nyuma y’agace kacyo ka 20, kizahita gishyirwaho iherezo.

Ryagiraga riti “N’umutima uremerewe twafashe icyemezo gikomeye nk’umuryango cyo kubasezera ku kiganiro cya ‘Keeping up with the Kardashians’.”

Rirongera riti “Iyaba iki kiganiro kidahari ntabwo mba ndi aho ndi uyu munsi. Nishimiye mu buryo budasanzwe buri wese warebye iki kiganiro kandi akadushyigikira mu myaka 14 cyari kimaze.”

Kim Kardashian yakomeje avuga ko benshi mu muryango wabo batari bazwi ubwo iki kiganiro cyatangiraga mu 2007, ariko isi yose ikaba imaze kubamenya.

Ni ikiganiro kitavugwagaho rumwe, cyagiye gitwara ibihembo bitandukanye bikomeye ku Isi. Mu myaka 14 cyari kimaze, cyatumye Kim Kardashian, abavandimwe be n’abakunzi babo, ababyeyi be n’abana be n’abavandimwe baba ibyamamare ku Isi yose.

Ubwo bagihagarikaga hari amakuru yavugaga ko bashatse kubikora kugira ngo babanze bazamure ibijyanye n’ubushabitsi bakora ku mbuga nkoranyambaga zabo, ndetse bari bakeneye kuba bitaje ho gato ibyo kugaragara kuri televiziyo.

Abo muri uyu muryango bafite izina rikomeye ku Isi yose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .