00:00:00 IGIHE NETWORK KN KINYARWANDA EN ENGLISH FR FRANCAIS

Umuriro watse nk’uw’amashara! Byagendekeye bite Gisimenti?

Yanditswe na Akayezu Jean de Dieu
Kuya 21 Mutarama 2023 saa 08:02
Yasuwe :

Abakunzi b’ibirori n’abanezezwa no gusohokera ahantu hari umuziki uremereye, bica inyota bafata ka manyinya cyangwa ibinyobwa bidasembuye bibuka neza ko impera z’icyumweru nk’izi babaga bashyashyanye buri wese yegura agakanzu, agakweto cyangwa agakubutura ko gusohokana.

Ubwo ni ko abandi babaga bakora ku nshuti zabo bita ‘Abachou’ bababaza aho byabereye, ahahiye -mu mvugo z’ab’ubu, bashaka kugaragaza aho bashobora guhurira mu masaha y’umugoroba ngo bice icyaka, baganire, banezerwe [...].

Benshi duhise dutekereza uko byari bimeze ubwo mu Mujyi wa Kigali hadukaga agace kazwi nka Gisimenti, aho imodoka ziba zikomye [Car Free Zone] mu mpera z’icyumweru uhereye ku wa Gatanu Saa Kumi z’Umugoroba.

Umwaduko w’aha hantu heza ho kuruhukira, kwidagadura no gufatira icyo kunywa kimanuzwa ka mushikaki, waje mu bihe byiza byo kwigobotora icyorezo cya Covid-19, cyari kigiye kumara imyaka ibiri cyarafungiranye abantu mu nzu, batabasha kwidagadura, agacupa ko bagasomeraga mu ngo zabo nk’uko bari barabitojwe na CP Kabera uvugira Polisi y’Igihugu.

Abantu barayobotse, si ugushya, harashya! Gisimenti iba Gisimenti, irushaho kugenda inurira no kwizihiza abakunzi b’agasembuye ku buryo uwari kubereka uwazanye igitekerezo cyo kuzana aha hantu heza nk’aha bari kumugurira rimwe- Ubanza Meya Rubingisa ariwe wari kurinywa, niba ajya asomaho.

Ni agace kabaga karimo urujya n’uruza rw’abantu kuva saa Kumi n’ebyiri z’umugoroba kugeza mu rukerera, abantu banywa, barya za mushikaki, umuziki udunda, abahanga mu kuwukata bagorora umubyimba, mbese hari ahantu haje hakenewe.

Guhera ku 25 Gashyantare 2022, abantu babonye ahantu hashya ho kwidagadurira mu Mujyi wa Kigali.

Umuhanda KG 18 watangiye kujya ufungwa ku binyabiziga mu mpera z’icyumweru, abacuruza resitora n’utubari bawuhindura imyanya y’abakiriya.

Byaje kuba akarusho mu bihe u Rwanda rwakiraga Inama nkuru ya Commonwealth izwi nka CHOGM , Gisimenti ishyirwamo ibikorwaremezo birimo Internet ya Wi-Fi, hashyirwaho uburyo buhoraho bw’ibitaramo n’ibindi byarushijeho gukurura abakunzi b’ibirori n’agasembuye.

Abitabiriye CHOGM bavuye i Kigali birahira aka gace, bavuga ko u Rwanda rufite ahantu heza ho kwidagadurira ku buryo bamwe batashye bakinyotewe ubwa kakandi karyoshye kadahora mu itama.

Ibyo mu Gisimenti ubanza byarabaye nka wa muriro w’amashara cyangwa isosi y’Intama- iyi ngo kuyikura mu isafuriya ijya kugera ku isahani yamaze guhororomba, cyangwa wayivana ku isahani uyizamuye ku kiyiko, ijya kugera ku munwa yahoze kare.

Inkuru zivuga iby’uko mu Gisimenti ari ahantu ho gusohokera muri Kigali zisa n’izajyanye na CHOGM kuko nyuma yaho abahagenda bakomeje kugenda bagabanyuka umunsi ku munsi kugeza ubwo ubu abahakorera bari gutaka ibihombo.

Kuri ubu inkuru zigezweho ni izivuga ko hatakigera abantu ndetse abari bahafite ibikorwa by’ubucuruzi barimo gufunga imiryango zatangiye kuvugwa mu mpera za 2022.

Zakomeje gutizwa umurindi n’imbuga nkoranyambaga aho abazikoresha bageze aho bashyiraho urutonde rw’utubari tugera mu 10 twamaze gufunga imiryango.

Ni icyanga cyashize?

Abanyamakuru ba IGIHE batembereye mu Gisimenti by’umwihariko mu masaha y’umugoroba, cya gihe abantu babaga basohotse. Bitandukanye na mbere, ubu iyo ugeze mu Gisimenti usanga imihanda yabaga yuzuye abantu ubu yera, ku buryo ushobora kwibaza icyabaye.

Ukigera mu Gisimenti hamwe habaga hari abapolisi barinze umutekano, utungurwa no kubona imihanda yera, nta n’inyoni itamba, ushobora kugira ngo hari gahunda yindi yabaye yatumye aho gukumira imodoka ahubwo hakumiriwe abantu.

Muri make ushobora kugira ngo wayobye ntabwo ugeze mu Gisimenti, imwe tuzi yo muri yo hagati ya Gashyantare -Kanama 2022. Hamwe hahoraga hashyushye, kubona aho kwicara cyangwa gutambuka bitoroshye, ubu byarahindutse, ushobora kwinjira mu tubari dutatu nibura aho usanga benshi bari kunyweramo ari batanu.

Gisimenti yarakonje, imbeho ni yose, rwa rujya n’uruza rw’abantu rwagiye nka nyomberi, yewe na za ntebe bashyiraga mu muhanda hagati ntikizihashyirwa kuko no mu nzu haba habuze abahicara.

Abakorera muri aka gace bavuga ko kuba nta hantu imodoka zifite zo guhagarara, kuvugwa nabi ku mbuga nkoranyambaga no mu itangazamakuru no kuba polisi ipima abanyoye inzoga baba bicaye hariya ari bimwe mu byabateje igihombo.

Abahakorera bagaragaza ko mu mpamvu zituma batakibona abakiliya zirimo uko hagiye havugwa mu binyamakuru ngo habera ubusambanyi, abandi ngo abantu barahasindira cyane bituma bamwe batangira kuhahunga kugira ngo batazajya bisanga mu binyamakuru kuko hari n’abagiye bafotorwa basinze.

Hari umucuruzi umwe wabwiye IGIHE ko “Gisimenti yabanje kwicwa n’imbuga nkoranyambaga cya gihe cya mbere bayivuga nabi, ngo ni muri sodoma n’ibindi, abantu biyubashye ntibakiza, ababyeyi bafite abana banga ko baza kubera ibintu byahavuzwe n’uwiyubashye nawe kandi abona ataza mu kavuyo ko muri Weekend.”

Rwiyemezamirimo Gasana Alex akaba na nyir’akabari kazwi nka Come Again yagize ati “Imbuga nkoranyambaga zagiye zivuga i Gisimenti uko kitari, ibyo byatumye abantu bumva ko ku Gisimenti ari ahantu habera ibintu bibi, icyo kintu cyatumye abakiliya bacu bagabanuka. Ikindi urebye ibihe by’imvura bibi turimo, gusohoka mu mvura ntabwo abantu babikunda.”

Muhirwa Freddy [Maître Freddy] , washinze Matina Motel ufite akabari, resitora n’amacumbi yagize ati "Muhageze kuri uyu munsi namwe murirebera, musanze ahangaha hajyaga haba huzuye abantu, mbere bigitangira."

Yakomeje agira ati "Hano mpatangira hashize nk’umwaka n’amezi abiri, hano twaburaga aho dukwiza abantu, hatarafungwa n’umuhanda [Car Free Zone] twaburaga aho dukwiza abantu kuko babaga ari benshi cyane."

Maître Freddy avuga ko nyuma yo kubona ko abantu bakomeje kuba benshi cyane yahisemo kuvugana na ba nyir’inzu bagura inyubako, aho abantu bafatira icyo kunywa haragurwa ndetse n’akabyiniro karaguka.

Ati "Ariko ubu twarabihagaritse kandi ibintu byaruzuye, ariko na hano nta bantu barimo urabibona ,hano uko mwahageze hariya hari ibyuma bacurangiragaho, ubu ntitukibazana kuko twarabazanaga tugahomba, mwabonye za Billards zirateretse nta muntu ukizikina, murabona hano intebe n’ameza nta muntu ubyicayeho, ibyo birakwereka ko abakiliya ntabo."

Yakomeje agira ati "Mu by’ukuri ubucuruzi hano kuva bafunga umuhanda twakoze igihe gito nyuma biranga, ntabwo najya kubabeshya ubucuruzi bwarapfuye."

Amarira y’abashoye imari mu Gisimenti azahozwa na nde?

Niba waranywereye mu Gisimenti ushobora kuba uheruka hari utubari turimo Amigo lounge, Chill Out, Oyster, Red Sky, New Guess, Petit Bruxelle, Lydia, Triple 777, Bahamas, Murugo Pub [...].

Utwo twose wongeyeho Rosty na Master Grill, harimo utwafunze imiryango naho utundi twagurishijwe hazamo abashoramari bashya ariko ngo abatugurishije byaturutse ku bihombo.

IGIHE yaganiriye na bamwe mu bari bafite utu tubari, bagaragaza zimwe mu mpamvu zishobora kuba zaratumye bagira iki gihombo ndetse n’ibyifuzo byabo haba ku Mujyi wa Kigali ndetse n’ubuyobozi bw’igihugu muri rusange.

Kuba nta bakiliya bakigera mu Gisimenti byateje igihombo gikomeye abari barahashoye imari ku buryo hari nk’umucuruzi umwe waganiriye na IGIHE avuga ko mu kwezi yishyura ubukode bwa miliyoni 4Frw, ariko akaba adashobora gucuruza n’ibihumbi 500Frw.

Gasana avuga ko hakenewe ubufatanye bw’abakorera muri aka gace n’ubuyobozi bw’Umujyi wa Kigali kugira ngo abantu bongere bitabire Car Free Zone.

Ati “Muri iyi minsi abakiliya baragabanutse cyane. Kubera impinduka zajeho za Car Free Zone, abantu baje kuhacururiza ari benshi, ku buryo abakiliya byabaye ngombwa ko bajya babagabana ari benshi [...]. Nidufatanya n’Umujyi wa Kigali n’izindi nzego kugira ngo turebe ko abakiliya bakongera kugaruka.”

Gasana avuga ko hakwiriye gushyirwaho ingamba zo kugarura abakiliya mu Gisimenti birimo ibitaramo by’abahanzi bagezweho ndetse n’ibindi bikorwa by’imyidagaduro bikurura abantu.

Maître Freddy avuga ko mbere bigitangira abantu babaye nk’abaje kureba uko bimeze ariko bahageze bahura n’imbogamizi zirimo kubura aho baparika imodoka n’ibindi bikorwaremezo bitandukanye.

Ati "Bwa mbere bafunze umuhanda, abantu baza basa nk’abahuruye baje kureba ukuntu abantu banywera mu muhanda, banyweramo nk’ukwezi kumwe cyangwa kumwe n’igice ibintu birarangira. Ariko nk’uko ubizi, ntabwo Umunyarwanda ashobora kugenda ngo aparike imodoka ahantu hatarindiwe umutekano icyo ni icya mbere."

"Mbere zaparikwaga kuri Petit Stade [...] ntabwo abantu bafite aho baparika n’ufite aho aparika , imodoka arayisiga kure, kuza n’amaguru ni ikibazo."

Ni umushinga wizwe nabi?

Maître Freddy avuga ko yagize amahirwe yo gutemberera mu Bubiligi, mu Bufaransa n’ahandi aho yagiye asanga hose hari ahantu nk’aha abantu banywera hatanyura imodoka.

Ku rundi ruhande ariko, avuga ko hari ibikorwaremezo biba byarubatswe, bifasha abaje kuhanywera kugira ibihe byiza n’umutekano.

Ati "Ni ngombwa ko natwe twagendera ku bandi tukagira umujyi ucyeye, ufite aho abantu bisanzurira, bakishimisha ariko ikibazo cya mbere njyewe mbona uyu mushinga ntabwo wizweho neza."

Yakomeje agira ati "Kuko uyu mushinga wagombaga kuba ufite aho abantu baparika amamodoka kugira ngo binjire muri iyi Car Free Zone, iyo urebye ruguru aha ntaho baparika, hepfo aha ntaho baparika, ni ukuvuga ngo ni Car Free Zone y’abantu batagira amamodoka."

"Ikindi cya kabiri, iyo winjiye muri Car Free Zone hagombye kugira ikintu ubona, namwe murahazengurutse, aha wahabona iki? [...] Nta kintu na kimwe, na bikorwaremezo bigeze bahashyira byakurura abantu."

Abakorera mu Gisimenti batanga icyifuzo cy’uko hashyirwaho uburyo aha hantu hajya hagirwa Car Free Zone nibura rimwe mu kwezi kugira ngo abantu babanze babimenyere n’ibikorwaremezo bibanze bishyirwemo.

Maître Freddy ati "Njyewe ndatanga icyifuzo cy’uko bajya bafunga umuhanda nibura mu Cyumweru cya nyuma cy’ukwezi noneho bitatu bakatureka tugacuruza bisanzwe."

"Icya nyuma natwe tukishakamo ubushobozi , ukavuga uti nazanye umuririmbyi, hirya Come Again bazanye umuhanzi ucuranga gakondo, hirya naho bazanye umuhanzi ukomeye [...]."

Yakomeje agira ati "Ariko kuza nta kintu kigaragara bareba, bakaza bakareba umuhanda w’amabuye, bakareba inzu [...] nta cyakurura umuntu cyatuma asiga imodoka akagenda n’amaguru."

Umujyi wa Kigali ufite icyo ubivugaho

Ubuyobozi bw’Umujyi wa Kigali bugaragaza ko ishyirwaho rya Car Free Zone , yaba iyo mu Gisimenti, i Nyamirambo ndetse n’iyo mu Mujyi rwagati [Imbuga City Walk] ari ugufasha abantu bawutuyemo n’abawugendamo kubona aho kwidagadurira.

Ikindi ngo ni ugufasha ibikorwa by’ubucuruzi biba biri muri ako gace kubasha kubona abakiliya benshi baba abasanzwe bahagurira ndetse n’abandi bakururwa no kuba ako gace karagizwe ahantu abantu benshi bahurira.

Nka Car Free Zone ya Remera, ni ahantu hari hasanzwe habarizwa utubari twinshi ariko ugasanga muri bya bihe abantu baba babaye benshi basohotse bari kubyigana n’imodoka ku buryo zabaga zishobora no kubagonga, cyane ko bamwe baba basomye ku gasembuye.

Ubwo hagirwaga Car Free Zone abantu baritabiriye ari benshi bituma n’abashoramari biyongera baza kuhashinga utubari ku buryo kuri ubu hari utubari turenga 150 kandi mbere hari ututageze muri 50.

Umuyobozi Mukuru Ushinzwe Igenamigambi ry’Imitunganyirize y’Umujyi, Eng. Marie Solange Muhirwa aherutse kuvuga ko ikibazo cyabayeho ari uko utubari twabaye twinshi ariko ingamba zo gukurura abakiliya benshi zikaba nkeya.

Ati “Ikintu cyabayeho ni uko hiyongereye utubari ariko ntihabaho […] abacuruzi ntibashyiraho ingamba zo gukurura abakiliya ngo haze n’abandi bantu benshi. Umubare w’abakiliya wari usanzwe uri aho ngaho.”

“Niba hari hasanzwe hajya nk’abantu 500 bakaba barajyaga mu tubari 50, ni urugero ndi gutanga, ubu ngubu hakaba hariyongereye utubari tugeze mu 150, abo bantu 500 bakaba basangira utubari 150, urumva ko ibikorwa by’ubucuruzi byariyongereye ariko noneho ntabwo habayeho uburyo bw’abacuruzi bwo gukurura abakiliya bashya.”

Yakomeje agira ati “Ariko ikiriho ni uko abantu babyishimiye. Mu ntangiriro abantu bari babyishimiye, n’uyu munsi abantu barahajya, bashobora kuba baragabanutse ariko ntabwo wavuga ngo igitekerezo ubwacyo ni kibi.”

Eng Muhirwa yavuze ko hari ibiganiro n’inzego z’abikorera, abacuruzi ndetse n’izindi zitandukanye kugira ngo harebwe ibikorwa bishobora kuhashyirwa kugira ngo bikurure abakiliya.

Mu Gisimenti niho hantu hahuzaga abantu, washoboraga kuhagera ukahahurira n'uwo muherukana kera
Icyo kunywa cyabaga cyateguwe neza. Uhereye ku mitobe y'abarokore ukageza ku mazi y'intare anywa n'abakunda icyanga cy'umwenge
Mu bubiko inzoga ziba zihari ku bwinshi ariko abakiriya barabuze
Igitoki, Ibirayi n'ibindi byifashishwa mu bikoni by'utubari byabaga byateguwe
Umuhumuro wa ka mushikaki wawumviraga kwa Lando ukagenda wiruka
Mbere abantu babaga buzuye ariko ubu ntawuharangwa
Hari abahitagamo kurisoma batembera mu muhanda
Abashaka kuganira ku mishinga y'ejo hazaza nabo ntabwo bahezwa
Imbere mu tubari haba harimo mbarwa, ibirori byimukiye mu muhanda
Abakorerabushake bareba ko amabwiriza y'inzego z'ubuzima yubahirizwa baba bahari bakumakuma abashaka gutana
Muri iki gihe, Gisimenti isigaye iha benshi umutuzo batabonera ahandi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .