Umunyamerika Teddy Riley yatangariye impano z’abanyeshuri biga mu Ishuri rya Muzika rya Nyundo (Amafoto)

Yanditswe na Nsengiyumva Emmy
Kuya 8 Ukuboza 2020 saa 08:47
Yasuwe :
0 0

Umuririmbyi Teddy Riley wamamaye muri Blackstreet kuri uyu wa Kabiri tariki 8 Ukuboza 2020, yasuye Ishuri rya Muzika rya Nyundo riherereye i Muhanga atungurwa n’impano z’abanyeshuri bahiga.

Uyu muhanzi wageze muri iki kigo akabanza kugitemberezwa asobanurirwa ibihakorerwa, yeretswe na studio iri kuhubakwa bivugwa ko ari imwe mu nziza zizaba ziri mu Karere ka Afurika y’Iburasirazuba.

Ageze muri iyi studio, Teddy Riley yatangariye uyu mushinga kuko studio yabonye imeze nk’iyo akoreramo.

Nyuma yo gutemberezwa iki kigo, yerekeje mu cyumba cy’imyidagaduro cy’iri shuri aho yahuriye n’abanyeshuri biga umuziki.

Akigera muri iki cyumba yakirijwe amajwi meza y’ingoma za kinyafurika ziri mu zo abanyeshuri bigishwa gucuranga.

Binyuze mu matsinda atandukanye aba banyeshuri biremyemo, bataramiye abashyitsi babaha ikaze.

Aba banyeshuri banyuzagamo bakaririmba n’indirimbo zabo mu rwego rwo kwereka Teddy Riley n’itsinda ry’abamuherekeje ryari riyobowe na Kaliza Belise ushinzwe Ubukerugendo mu Rwego rw’Igihugu rw’Iterambere, RDB, ko bafite impano zo gushyigikirwa.

Teddy Riley yavuze ko yishimiye impano z’abanyeshuri yabonye muri iki kigo, ahamya ko yifuza kuzagaruka mu Rwanda agakorana nabo.

Mu kiganiro na IGIHE, Teddy Riley yavuze ko impano z’aba banyeshuri zikwiye gukorerwa ubuvugizi binyuze kuri televiziyo zikomeye.

Ubu buvugizi yavuze ko bwanyura mu biganiro by’amateleviziyo bigaragaza impano zabo, ahamya ko buri wese aho ari ku Isi yabasha kuzibona.

Aganira n’abanyeshuri biga mu Ishuri rya Nyundo yagize ati "Nishimiye impano ziri hano, ni ukuri zirashimishije, ndifuza kuzagaruka inaha nkagira umushinga nkorana namwe.’’

"Ubutaha ningaruka nzazana na bagenzi banjye, inshuti zanjye zirimo abahanzi bazwi, abatunganya indirimbo n’abandi birebere impano mufite. Ndifuza ko iki kigo cyaba umuryango mugari kikajya cyakira n’abana bato.’’

Uyu mugabo w’icyamamare mu muziki w’Isi, yasabye ubuyobozi bwa RDB ko bwategura iserukiramuco rikomeye akazarihuriramo n’aba banyeshuri kimwe n’abandi bafite impano mu Rwanda.

Ati "Mfite inzozi kandi hari igihe ziba impamo, mfite inzozi ko hazaba iserukiramuco rinini rigahuza abanyempano banyuranye barimo n’aba.”

Nyuma y’ijambo rye yagize rigufi, Teddy yasabwe kuririmbira abari aho. Sebera Arnaud wiga mu Ishuri rya Muzika rya Nyundo yamwegereye amusaba ko bakorana indirimbo bita ‘No Diggity’.

Iyi ndirimbo yakozwe na Teddy, yaririmbyemo abahanzi batandukanye barimo itsinda yabarizwagamo rya Blackstreet, Dr. Dre, Queen Pen.

Nyuma yo kuririmbana iyi ndirimbo bigashimisha buri wese wari muri iki cyumba, abanyeshuri bongeye guhabwa umwanya basusurutsa abashyitsi ari nako babasezeraho.

Umuyobozi w’Ishuri rya Muzika rya Nyundo, Muligande Jacques uzwi nka Might Popo, yabwiye IGIHE ko bashimishijwe n’urugendo rw’uyu muhanzi w’icyamamare mu kigo cyabo.

Ati "Ni ibintu bidasanzwe kuba umuhanzi nk’uyu yadusura, ni iby’agaciro kenshi kuri twe. Mwumvise ko yemeye gukorana natwe, nibiramuka bibaye bizaba ari byiza rwose. Uyu mugabo yakoranye n’abantu bafite amazina nka Michael Jackson rero nta muntu utakwifuza gukorana nawe.”

Uyu mugabo w’imyaka 53 yageze mu Rwanda ku wa Gatandatu abanza gushyirwa mu kato no gupimwa Coronavirus nkuko biri mu mabwiriza yashyizweho n’inzego z’ubuzima mu kwirinda ikwirakwira ry’iki cyorezo.

Ku wa 7 Ukuboza 2020, Teddy Riley yasuye Urwibutso rwa Jenoside yakorewe Abatutsi rwa Kigali ruri ku Gisozi, anunamira inzirakarengane ziharuhukiye.

Teddy ari gukorera urugendo rw’iminsi itandatu mu Rwanda, byitezwe ko azahakorera ibikorwa bitandukanye birimo gusura ahantu hanyuranye mu gihugu.

Ubusanzwe uyu mugabo w’Umunyamerika yitwa Edward Theodore Riley. Ni umuririmbyi, umwanditsi w’indirimbo, akaba anazitunganya. Azwi cyane nk’umwe mu batangije injyana ya New jack swing, yamamaye cyane muri Amerika no ku Isi yose mu myaka ya 1980.

Mu 1987 yari ari umwe mu bagize itsinda rya Guy, yari ahuriyemo na Aaron Hall na Timmy Gatling.

Nyuma yo gukora album ya kabiri y’iri tsinda afatanyije n’uwitwa The Future bakoze kuri album ya Michael Jackson ya munani yitwaga ‘Dangerous’ yagiye hanze mu 1991, ikaza no gukundwa bihambaye.

Teddy Riley yaje gutandukana na bagenzi be babanaga muri Guy, ajya mu bindi by’umuziki ndetse mu 1991 irangira ahita ashinga irindi tsinda ryitwaga Blackstreet.

Iri tsinda ryakunzwe mu ndirimbo zitandukanye zirimo “Don’t Leave Me” yagiye hanze mu 1997, “No Diggity” yagiye hanze mu 1996, bakoranye na Dr. Dre na Queen Pen n’izindi. Iri tsinda ryasenyutse mu 2011 rikajya ryongera rikihuza.

Teddy Riley ubwo yari ageze mu Ishuri rya Muzika rya Nyundo
Mbere yo kwinjira ahari kubakwa Studio Teddy n'abo ari bazanye babanje kwambikwa imyenda ibakingira
Iyi studio izaba iri mu zikomeye mu Karere ka Afurika y'Iburasirazuba
Umuyobozi w'Ishuri rya Muzika rya Nyundo, Muligande asobanurira Teddy akamaro iyi studio izamarira iri shuri
Teddy yasuye amashuri yo mu Ishuri rya Muzika rya Nyundo
Amashuri arimo ibikoresho bya muzika
Teddy Riley yishimiye ubuhanga bw'aba banyeshuri
Teddy Riley yavuze ko yatunguwe n'impano yasanze muri iri shuri
Yavuze ko yifuza kuzitabira iserukiramuco rinini rizamuhuza n'abanyempano banyuranye mu Rwanda
Abanyeshuri bo mu Ishuri rya Muzika rya Nyundo berekanye ubuhanga mu byo biga
Teddy yanyuzwe n'umuziki w'aba banyeshuri
Kaliza Belise ushinzwe Ubukerugendo muri RDB, Teddy Riley na Muligande Jacques uyobora Ishuri rya Muzika rya Nyundo bitegereza impano z'abanyeshuri
Ubwo yumvaga umuziki w'abanyeshuri bo mu Ishuri rya Muzika rya Nyundo wabonaga agize ubushagarira
Kaliza Belise ushinzwe Ubukerugendo muri RDB yitegereza abanyeshuri bo mu Ishuri rya Muzika rya Nyundo
Abanyeshuri bo mu Ishuri rya Muzika rya Nyundo basusurutsa abashyitsi
Kaliza Belise ushinzwe Ubukerugendo muri RDB ni we wayoboye itsinda ryaherekeje Teddy Riley
Buri wese yifuzaga gufata amashusho y'uyu mugabo w'icyamamare
Teddy yabwiye abanyeshuri ko yifuza kuzakorana nabo igitaramo kinini
Yaririmbanye na rimwe mu matsinda akomeye y'abanyeshuri biga mu Ishuri rya Muzika rya Nyundo
Teddy Riley na Sebera Arnaud bafatanyije kuririmba indirimbo ‘No Diggity’ yaririmbyemo abahanzi batandukanye barimo itsinda yabarizwagamo rya Blackstreet, Dr. Dre, Queen Pen
Abanyeshuri bashimishijwe no kubona uyu mugabo abaririmbira
Abanyeshuri bo mu ishuri rya muzika rya Nyundo nabo bagaragaje ko bashoboye
Aba bakobwa b'impanga biga mu Ishuri rya Nyundo bagaragaje ubuhanga buhambaye mu muziki
Umuziki w'aba banyeshuri washimishije buri umwe wari muri iki cyumba
Teddy Riley agerageza kubyina gakondo
Teddy Riley yitegereza uko babyina Kinyarwanda
Igor Mabano yifashishije imisatsi ye ayisimbuza imigara yerekana uko umuntu ahamiriza gitore
Teddy Riley yavuze ko yishimiye kuba ari mu Rwanda
Yafatanye agafoto k'urwibutso n'abanyeshuri
Benshi mu banyeshuri bo mu Ishuri rya Muzika rya Nyundo basabye ko abasigira agasinya k'urwibutso
Teddy Riley na Muligande Jacques bafashe ifoto y'urwibutso

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .