Umukobwa w’umusirikare arahatana muri Miss Career Africa izasorezwa i Kigali

Yanditswe na Uwiduhaye Theos
Kuya 19 Werurwe 2020 saa 06:15
Yasuwe :
0 0

Umukobwa wo muri Togo ufite ipeti rya gisirikare rya Lieutenant witwa Assaba Cinthia Consuela Koffi, ari mu bakobwa 15 bo muri Afurika y’Iburengerazuba bari guhatanira kuzagera mu bakobwa ba nyuma bazatoranywamo Miss Career Africa, irushanwa rizasorezwa mu Rwanda mu mpera z’uyu mwaka.

Uyu mukobwa ahatanye n’abandi bakobwa 14 bo muri Nigeria na Ghana.

Lieutenant Assaba Cinthia Consuela Koffi yavutse mu 1998, yakuze afite umubyeyi umwe ari we nyina gusa. Ni impirimbanyi y’uburenganzira bwa muntu, akaba umushabitsi akabikomatanya no kuba ari umusirikare mu ngabo za Togo ndetse akaba ari gushaka impamyabumenyi y’ikirenga mu by’ubuvuzi.

Arashaka gushishikariza abakobwa bakiri bato kwiga siyansi, kwihangira imirimo y’abagore cyane cyane y’ubuhinzi. Mu myaka itanu iri imbere, arashaka kubona impamyabumenyi y’ikirenga (doctorat) mu buvuzi bwa Gisirikare kubera ko muri Togo habuze abaganga bayifite.

Afite intego yo gukora ubworozi bw’inkoko muri buri karere k’igihugu cye kuko Togo yari yatumije mu mahanga inkoko zigera kuri miliyoni 22 mu 2019, bigatuma atekereza ko aramutse abukoze byafasha benshi muri iki gihugu nawe ubwe.

Umushinga we witwa "Volaille pour tous". Ushingiye ku gushyira ibiraro by’inkoko mu bice bitandukanye by’igihugu cye. Avuga Togo itumiza inkoko nyinshi hanze , uyu mushinga we ukaba ugamije no guhanga imirimo y’urubyiruko.

Akavuga ati “Nimba nambitswe ikamba rya Miss Career Africa 2020, bizamfasha kumenya uburyo nshobora gufasha abakobwa bagenzi banjye bakiri bato mu gihugu ku bintu bimwe birimo kurwanya uburaya no gutwita hakiri kare.”

Ntabwo bikunze kubaho ko usanga abakobwa bari mu myanya yiganjemo iy’umutekano bitabira amarushanwa nk’aya y’ubwiza cyangwa se ayandi ayo ari yo yose.

Iri rushanwa rizazenguruka mu bice bitandukanye bya Afurika aho ubu muri Afurika y’Iburengerazuba, aho hagiye gutoranywamo abakobwa icumi bazahahagararira nk’uko no mu tundi duce twa Afurika bizagenda.

Guhera kuri uyu wa 19 Werurwe 2020, abo muri Afurika y’Iburengerazuba batangiye gutorwa hifashishijwe urubuga rwa Miss Career Africa.

Mu gihe muri Afurika yo hagati ho guhera ku wa 18 Werurwe 2020 kugeza ku wa 18 Mata 2020, abashaka guhatana bafunguriwe urubuga ku buryo bashobora kwiyandikisha.

Abo mu Majyepfo ya Afurika bazatangira kwiyandikisha ku wa 3 Gicurasi, abo mu Majyaruguru batangire ku wa 24 Kamena 2020 naho muri Afurika y’Iburasirazuba bitangire ku wa 8 Kanama. Kwiyandikisha bizajya bimara ukwezi, abatoranyijwe bahabwe gahunda bazakurikiza nyuma.

Iri rushanwa rizajya rizajya riba hasimbukwe umwaka umwe mu rizakurikira. Ku ikubitiro Miss Career Africa 2020 azatorerwa mu Rwanda mu birori bikomeye bizaba ku wa 27 Ugushyingo 2020, mu gihe mu 2022 iri rushanwa rizabera muri Nigeria.

Hazatorwa uzahiga abandi abe ariwe ugirwa Miss Career Africa 2020, mu gihe hazatangwa andi makamba arimo nka Miss Speaker, Miss Technology, Miss Hospitality, Miss Science, Miss Talent na Miss Art.

Ikintu cya mbere bo bagenderaho ni ukuvuga ko ‘ubwiza bw’umukobwa ari iterambere rye’ ari nayo mpamvu umukobwa ushaka guhatana hatarebwa uburebure cyangwa uko asa mu isura ahubwo bareba ikiri mu mutwe we n’icyo ashaka kugeraho mu buzima.

Ibisabwa mu bashaka guhatana ni ukuba uri hagati y’imyaka 18-24, uri umushabitsi wasoje amashuri yisumbuye cyangwa wiga muri kaminuza unabarizwa muri Afurika.

Lt. Assaba Cinthia Consuela Koffi ari mu bakobwa bari guhatanira Miss Career Africa mu Burengerazuba bw'uyu mugabane
Ntabwo bikunze kubaho ko abakobwa b'abasirikare bitabira amarushanwa y'ubwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .