00:00:00 IGIHE NETWORK KN KINYARWANDA EN ENGLISH FR FRANCAIS

Bwiza yakoranye indirimbo n’abarimo umuhungu wa Bebe Cool

Yanditswe na Nsengiyumva Emmy
Kuya 10 June 2022 saa 08:30
Yasuwe :

Bwiza wari umaze igihe kirenga icyumweru muri Uganda akubutseyo arangije imishinga y’indirimbo zinarimo iyo yakoranye na Allan Kendrick, umuhungu wa Bebe Cool.

Izina Bwiza nibaza ko nubwo ari rishya mu muziki w’u Rwanda atari rishya mu matwi ya benshi. Uyu muhanzikazi utaramara umwaka yinjiye mu buhanzi, ni umwe mu bagaragaza imbaraga zidasanzwe mu iterambere rya muzika.

Uyu mukobwa mu mezi umunani amaze mu muziki, amaze gukora indirimbo eshatu ze bwite zinafite n’amashusho n’izindi ebyiri yakoranye n’abahanzi barimo Mico The Best na Riderman zose zifite amashusho.

Uretse izi ndirimbo, Bwiza yanakoranye n’abandi bahanzi bo mu Rwnada nka Kevin Skaa, Chris Eazy, Social Mula ariko zo nta mashusho zirakorerwa.

Nyuma yo gukorana n’abahanzi bo mu Rwanda banyuranye, Bwiza aherutse i Kampala aho yavuye akoranye n’abahanzi bafite amazina akomeye muri Uganda banarimo umuhungu wa Bebe Cool.

Iyi ndirimbo kimwe n’izindi yakoranye n’abahanzi bo muri Uganda, Bwiza avuga ko zigeze kure zirangira ndetse mu minsi ya vuba abakunzi b’umuziki we bazatangira kuziryoherwa.

Bwiza yakoranye indirimbo na Allan Kendrick nyuma yo gukorana na John Blaq, ibi byose akaba yarabashije kubigeraho ku bufatanye busanzwe buri hagati ya KIKAC Music ireberera inyungu ze na Bebe Cool.

Ubu bufatanye buturuka ku kuba umuyobozi wa KIKAC Music ari we ukuriye Gagamel itsinda ry’abafana ba Bebe Cool mu Rwanda akaba n’umwe mu bafana bakomeye b’uyu muhanzi.

Ubwo yerekezaga muri Uganda, Bwiza yari agiye kwitegereza uko ahandi bikorwa cyane ko yari inshuro ye ya mbere atembereye hanze y’u Rwanda kuva yatangira urugendo rwe mu muziki.

Amakuru IGIHE ifite ni uko ubwo hategurwaga urugendo rw’uyu muhanzikazi abareberera inyungu ze babanje kuvunyisha kwa Bebe Cool ababwira ko nta kibazo yiteguye kumwakira.

Ubwo yari ageze i Kampala, uretse gutembera mu bitangazamakuru binyuranye akanagira umwanya wo kumenyekanisha ibihangano bye, yanagize umwanya wo gukorerayo indirimbo yahuriyemo n’abahanzi barimo n’umuhungu wa Bebe Cool twagarutseho haruguru.

Ubwo twamusangaga aho yari atuye i Kampala, Bwiza yavuze ko yishimiye gutemberera muri Uganda kugira ngo arebe uko ahandi bakora umuziki.

Uyu mukobwa yavuze ko hari byinshi azungukira muri uru rugendo, ati “Nagize amahirwe yo gusura ibitangazamakuru bikomeye ino aha, ndetse nahakoreye n’indirimbo! Nize byinshi birimo gukorana n’abantu bashya kandi b’abahanga, bazi ibyo bakora ariko ibiruta ibindi bazi kwakira abantu kandi ntibatume wumva ko uri mushya.”

Nubwo asanzwe ari umuhanzi ufite uko azwi, Bwiza avuga ko ibikorwa yakoreye muri Uganda bizamufasha mu iterambere rya muzika ye.

Bwiza yari muri Uganda, aho yari kumwe n’abahanzi barimo B- Threy na Afrique. Ndetse n’abandi banyamuziki barimo Niz Beats, Fayzo ndetse n’itsinda ritunganya amashusho rizwi nka Big Team.

Muri iyi minsi Bwiza ni umwe mu bahanzikazi bakunzwe nyuma yo gusohora indirimbo ‘Ready’ iri mu zikunzwe muri iyi minsi.

Bwiza muri studio ubwo yari ari gukorana na Allan Kendrick umuhungu wa Bebe Cool
Muri Uganda, Bwiza yagize umwanya wo gusura ibitangazamakuru bitandukanye akorerayo ibiganiro byo kumenyekanisha ibihangano bye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .