Ni album uyu mukobwa yamuritse ku wa Gatanu, tariki 6 Nzeri, muri Norrsken House Kigali abifashijwemo n’inzu ifasha abahanzi abarizwamo yitwa Metro Afro yashinzwe Enric Sifa iba muri Leta Zunze Ubumwe za Amerika.

Muri ibi birori yafatanyije n’abahanzi nka Impakanizi wishimiwe mu bihangano bye bitandukanye birimo indirimbo aheruka gushyira hanze yise “Ingabe” yakunzwe kuva yajya hanze.

Umuhanzi Peace Jolis ukundirwa ubuhanga bwe n’imiririmbire ye idasanzwe na we yashimishije benshi ubwo yinjiraga ku rubyiniro ndetse akanabibutsa indirimbo ye yakoze yise ‘Duhora Turi Beza’.

Aba bahanzi babanje ku rubyiniro bakorewe mu ngata na Boukuru ari nawe wari nyir’igitaramo. Uyu mukobwa yaserutse yambaye imyambaro itukura ubona akanyamuneza ari kose aririmba indirimbo ze eshanu ziri mu 10 zigize album yamurikaga.

Alyn Sano yahise yinjira ku rubyiniro yambaye ikanzu ndende. Uyu muhanzi yavuze ko n’ubwo umunsi ari uwa Boukuru, yishimiye kuza kumushyigikira, kuko ari umwe mu banyempano babikwiriye.

Yahise yanzika n’indirimbo yise ‘None’ asaba abantu kutajya birindiriza gukora igikorwa bavuga ngo ikintu bazagikora ejo kuko iyo bigenze gutyo, hatajya hagera.

Alyn Sano ajya kuva ku rubyiniro yabajije abakunzi be kubaririmbira indirimbo imwe hagati y’iyo yise ‘Head’ aheruka gushyira hanze ndetse n’iyitwa ‘Bwiza’ bahisemo na we akayiririmba mbere yo kuva ku rubyiniro.

Boukuru yongeye gusubira ku rubyiniro mu wundi mwambaro w’ikanzu y’ubururu, ahita aririmba ibihangano bye birimo ‘Mfite Ubuzima’ yakoranye na Flyest Music, ‘Umwari’ na ‘Gikundiro’ yitiriye iyi album ye yamurikaga.

Mu ndirimbo z’abandi bahanzi yaririmbye harimo iyitwa ‘Hallelujah’ ya Leonard Cohen, iyitwa ‘Inyange Muhorakeye’ ya Cécile Kayirebwa na ‘Nimuve Mu Nzira’ ya Kamariza aba ari nayo apfundikiriraho igitaramo cye.

Nyuma y’igitaramo yabwiye IGIHE ko ari indi ntambwe ateye mu buzima bwe, ndetse agiye gukora kurushaho.

Ati “Ndiyumvamo amarangamutima menshi. Ntabwo ibyabaye byose nabitekerezaga. Icyo nishimiye cyane ni abantu baje kunshyigikira ndetse nanjye mushya.”

Uyu mukobwa yavuze ko yishimiye ibyabaye harimo no kuba abavandimwe na Mama we bitabiriye iki gitaramo, ariko byamugaragarije ko agifite byinshi byo gukora, birimo izindi album ndetse no gukorana ibihangano byinshi n’abandi bahanzi bagenzi be.

Indirimbo ‘Gikundiro’ yamuritse yakozweho n’abarimo Michael Makembe, Flyest Music na Shami Nehemmy. Hari kandi na Pappy Jay wo muri Nigeria akaba ari we wo hanze y’u Rwanda wayikozeho gusa. Ikozwe mu njyana nka Jazz, Soul na Funk.

Boukuru aheruka kuvuga ko yatangiye kuririmba mu 2018 ariko nyuma akaza kubona ko byavamo amafaranga biturutse ku kwitabira ArtRwanda - Ubuhanzi yamuhaye amahirwe atandukanye yo kubyaza umusaruro impano ye.

Reba indirimbo ‘Gikundiro’, Boukuru yitiriye album yamuritse

Ababishoboye bafashe amashusho y'urwibutso

Abantu b'ingeri zitandukanye bakunda umuziki wiganjemo uri mu njyana nka Jazz, Blues n'izindi zigenda gake bari baje muri iki gitaramo

Alyn Sano ni umwe mu bahanzi baririmbye mu gitaramo cya Boukuru

Alyn Sano yashyigikiye Boukuru afata nka murumuna we mu muziki cyane ko yawumusanzemo

Igitaramo cya Boukuru cyatumye bamwe bahuza urugwiro

Boukuru byageze aho biramurenga ari ku rubyiniro

Boukuru abarizwa mu nzu ifasha abahanzi ya Metro Afro ya Enric Sifa

Boukuru ubwo yajyaga ku rubyiniro ku nshuro ya mbere yari yambaye imyambaro itukura

Boukuru yamuritse album igizwe n'indirimbo 10

Boukuru yamuritse album ye ya mbere ateguza ibindi bikorwa byinshi bya muzika

Boukuru yanyuzagamo akabyina bya Kinyarwanda

Boukuru yatangiye umuziki mu 2018 yiyemeza kuwushyiramo ingufu mu 2022

Boukuru yashyigikiwe n'abiganjemo urubyiruko rwamaze kumenya umuziki unogeye amatwi

Butoyi Christelle uvukana na Boukuru yari yitabiriye igitaramo cy'umuvandimwe we ubona yizihiwe

Icyumba Boukuru yakoreyemo igitaramo cye cyari cyuzuyemo abaje kumushyigikira

Iki gitaramo cya Boukuru cyabereye muri Norrsken House Kigali

Imfura ya Massamba, Ikirezi Annais Déborah ni umwe mu bitabiriye iki gitaramo

ABavandimwe ba Boukuru n'umubyeyi we bari bizihiwe n'umuziki bagezwagaho

Uwase Hirwa Honorine ’Miss Igisabo’,witabiriye irushanwa rya Miss Rwanda 2017, agatwara ikamba ry’uwamenyekanye cyane na Nsengiyumva Mugisha Christian baheruka kurushinga bari bitabiriye iki gitaramo

Peace Jolis imbere y'abari bitabiriye iki gitaramo cya Boukuru

Peace Jolis na Impakanizi bageze aho bafatanya kuririmba bishimisha abari bitabiriye

Peace Jolis yishimiwe mu ndirimbo zirimo iyo yise 'Duhora Turi Beza' yashyize hanze mu myaka isaga itanu ishize

Umuziki wa Boukuru wacengeraga abitabiriye igitaramo cye gake gake

Umubyeyi wa Boukuru yashimishijwe n'igitaramo cy'umwana we ubwo yamurikaga album ye ya mbere

Umuziki wa Peace Jolis, Impakanizi, Alyn Sano na Boukuru wanyuze abari bitabiriye bataha bamwenyura

Uyu mukobwa yamuritse album yise 'Gikundiro'

Wabonaga abitabiriye iki gitaramo bishimiye abahanzi babataramiye uko ari bane

Boukuru yafashe ifoto y'urwibutso nyuma y'igitaramo cye

Boukuru yafatanye ifoto n'umuryango we n'inshuti nyuma y'igitaramo

Boukuru na Peace Jolis uri ibumoso ndetse na Impakanizi uri iburyo bamufashije bagiye ahari habugenewe bafata ifoto igitaramo kirangiye

Igitaramo kirangiye Alyn Sano yagiye kwifotoreza ahari hateguwe

Amafoto: Ingabire Nicole