Tonzi yanenze abahanzi ba gospel bakeneshwa no kwanga gukora indi mirimo bagahora baririmbira ubuntu

Yanditswe na Nsengiyumva Emmy
Kuya 6 Mutarama 2021 saa 01:54
Yasuwe :
0 0

Tonzi yavuze ko umuhanzi uririmba Gospel ukennye iyo yabigizemo uruhare aba atukishije izina ry’Imana, ahishura imyumvire ipfuye yakenesheje bikomeye bamwe mu bahanzi bizera ko biyeguriye Imana.

Ibi Tonzi yabitangarije kuri Radiyo y’u Rwanda mu kiganiro Amahumbezi gikorwa n’umunyamakuru Epa Ndungutse.

Tonzi yavuze ibi ashingiye ku buhamya bw’abaramyi bagaragaje kugirwaho ingaruka zikomeye n’ingamba zo kwirinda Covid-19.

Yavuze ko afite ingero z’abantu banga gukora imirimo ya buri munsi, ahubwo bagaharira imirimo ya buri munsi insengero ngo bari kwitanga.

Ati” Ijambo ry’Imana riravuga ngo iminsi itandatu jya ukora uruhuke uwa karindwi, benshi rero itandatu bayikora bitanga. Bivuze ko mu buryo bw’ubuzima hari igihe kigera bikabagora.”

Tonzi ahamya ko biteye agahinda kuba umuhanzi w’izina rikomeye muri Gospel, yagaragara asaba ibyo kurya nyuma y’imyaka itari mike aririmbira ubuntu ngo ari kwitanga.

Yakomoje kandi ku bahanzi bakunze kwanga gukora akazi runaka ngo batagaragara nabi mu itorero aho basengera.

Yatanze urugero ku bahanzi bashobora guhabwa nk’akazi ko kuririmba mu mahoteli bakabyanga ngo batagaragara nabi mu itorero, kabone n’ubwo basabwa kuharirimbira indirimbo zo kuramya no guhimbaza Imana.

Uyu muhanzikazi ahamya ko benshi muri aba babiterwa n’imyumvire ipfuye baba baracengejwemo n’abayobozi b’amadini ndetse n’ababyeyi babo.

Ati”Njye ndaguha nk’urugero, naririmbaga muri korali irimo abantu bize bakora akazi kanyuranye, nza kubona ikiraka cyo kujya kuririmba hanze y’u Rwanda barampagarika ngo ni uko najyanye n’abantu tudasengana. Nabajije abayobozi banjye niba abo bakorana mu buzima bwa buri munsi basengana.”

Yasabye abahanzi bo mu matorero guhumuka bakareba kure bakava mu myumvire batazi aho yavuye.

Avuga ko amatorero abaye akeneye abahanzi bakora nk’abakorerabushake, yagakwiye kubashyiriraho imishahara ku buryo bagira uburyo bwo kubaho neza mu buzima bwa buri munsi.

Tonzi yavuze ko icyorezo cya Covid-19 cyahishuye byinshi ku mibereho y’umuhanzi wo kuramya no guhimbaza Imana, bamwe bihebeye gukorera ubushake buri munsi mu nsengero bari mu bakubititse bikomeye.

Avuga ko abahanzi bagakwiye kwigira ku bihe Isi irimo bya Covid-19, bagashyira ingufu mu mpano zabo ku buryo zibafasha kugaragaza itandukaniro muri sosiyete.

Mu magambo ye uyu mubyeyi yakunze kwifashisha ijambo ry’Imana, ati “Muri Bibiliya baravuga ngo Impano yawe izakugeza ibwami, none se niba udashaka gukoresha impano yawe ngo ikugeze aho hantu hose, uzabaho gute?”

Tonzi avuga ko aho kugira ngo umuhanzi abe umukene abigizemo uruhare, yajya gucuruza cyangwa gukora indi mirimo kuko ubukene bwe buba butukisha izina ry’Imana.

Uyu muhanzikazi yikomye abakozi b’Imana bakunze gushuka abahanzi bakabakoresha ku buntu nyamara bo bahembwa buri kwezi.

Yavuze ko kenshi bitwaza ijambo ry’Imana bakarisobanura nabi, bakunze kuvuga ko impano umuhanzi aba yarayiherewe ubuntu bityo ko adakwiye kwishyuza mu gihe agiye kuyikoresha.

Icyakora Tonzi we ahamya ko nta mukozi w’Imana wakavuze ibi mu gihe we aba afite umushahara wa buri kwezi.

Ati”Pasiteri se impano ntiyayiherewe ubuntu, kuki ahembwa buri kwezi? Nanyerere imbuto nyine, kuki se yifuza ko umuhanzi ariwe ukwiye gukorera ubuntu?”.

Ikiganiro cya Tonzi

Indirimbo nshya ya Tonzi

Tonzi ni umwe mu bahanzikazi bakomeye mu muziki wo kuramya no guhimbaza Imana
Tonzi ahamya ko abahanzi bo kuramya no guhimbaza Imana bakwiye guhumuka bakareka ubunebwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .