Ni ikiganiro n’abanyamakuru cyabaye kuri uyu wa 15 Ugushyingo 2024, muri M Hotel ahari hakoraniye abanyamakuru batandukanye ndetse na bamwe mu bahanzi batumiwe muri iki gitaramo barimo Davis D ubwe, Nasty C ndetse na Danny Nanone wari uhagarariye abahanzi b’Abanyarwanda bazatanga umusanzu muri iki gitaramo.

Ubwo ikiganiro n’abanyamakuru cyari kigeze hagati, Jean Damascene Bukuru, umubyeyi wa Davis D yatse ijambo maze imbere y’itangazamakuru avuga ko yifuza gushimira umuhungu we.

Ati “Umuhungu wanjye si ukumuvuga gusa ariko reka mubashimire kuko imyaka icumi amaze mu muziki yagaragaje ubushake, ntabwo ajya acika intege kuko yanyuze muri byinshi ariko arakomeza.”

Umubyeyi wa Davis D yamushimiye imbere y’abanyamakuru, abahanzi bagenzi be ndetse n’abafatanyabikorwa b’iki gitaramo, ahamya ko yamubereye umwana mwiza aho gutwarwa n’ubwamamare.

Ati “Ni umusore utarahisemo gutwarwa n’ubwamamare ahubwo agahitamo kubaha ababyeyi. Ndashimira abanyamakuru mwamubaye hafi ndetse n’abafatanyabikorwa badasiba kumuha amahirwe.”

Davis D akomeje imyiteguro y’igitaramo cye ‘Shine Boy Fest’ giteganyijwe kubera muri Camp Kigali ku wa 29 Ugushyingo 2024.

Ni igitaramo byitezwe ko kizitabirwa n’abahanzi barimo; Nasty C na Danny Nanone bari muri iki kiganiro n’abanyamakuru, Bull Dogg, Platini, DJ Toxxyk, Nel Ngabo,DJ Marnaud,Bushali, Ruti Joel n’abandi benshi.

Abahanzi bose byitezwe ko bazafasha Davis D mu gitaramo cye 'Shine Boy Fest'

Nasty C yijeje abanyamakuru kuzakora igitaramo cyiza

Abahanzi barimo Davis D, Nasty C na Danny Nanone bari bitabiriye iki kiganiro

Abanyamakuru bari bitabiriye ikiganiro n'abanyamakuru ari benshi

Umubyeyi wa Davis D yamushimiye itangazamakuru ahamya ko uretse kuba yaramushyigikiye mu muziki bamaranyemo imyaka icumi, hari impano amuhishiye nyuma y'iki gitaramo

Umubyeyi wa Davis D yatunguranye mu kiganiro n'abanyamakuru cy'umuhungu we