Umubano wa Neza na Skales wo muri Nigeria wajemo kidobya

Yanditswe na Nsengiyumva Emmy
Kuya 19 Gashyantare 2020 saa 08:54
Yasuwe :
0 0

Umuririmbyi w’umunyarwandakazi, Neza Patricia Masozera, ukorera umuziki muri Nigeria wari umaze igihe mu rukundo na Skales (Umuhanzi ufite izina muri Nigeria) hari amakuru ahamya ko umubano wabo wajemo kidobya.

Iyo urebye ku rukuta rwa Instagram rwa Neza cyangwa Skales usanga aba batagikurikirana, buri umwe yamaze guhagarika gukurikira “Unfollow” mugenzi we.

Usibye kuba batagikurikirana kuri Instagram aba bahanzi bari bamaze igihe mu rukundo, basibye amafoto yose bari barashyize kuri uru rubuga.

Mu 2019 nibwo Neza yahishuye ko ari mu rukundo na Skales icyakora bari bamaze igihe bakundana.

Muri Gicurasi 2019 Neza yabwiye Skales amagambo y’urukundo yifashishije urukuta rwe rwa Instagram ashimangira umwaka amaranye n’uyu musore wabaye uwo kwiga byinshi kandi akaba abyishimira.

Ati “Ibyishimo ku isabukuru ya mbere dukundana mwami wanjye! Skales nishimira amasomo tumaze kwiga. Warakoze kunkunda uruzira imbereka no kuba umufana wanjye w’imena.”

Neza yakomeje avuga ko Skales amaze gufata ibirindiro mu mutima we ndetse bakaba bazakundana kugeza ku ifirimbi ya nyuma y’ubuzima.

Ati “Tuzakundana ubuziraherezo rukundo. Imana yampaye buri kimwe dukeneye kugira ngo tubashe kubaho. Ukora ibishoboka byose ngo wongere unyigarurire iyo hari agakosa wankoreye. Reka dukomeze dutere imbere. Uyu munsi ni uwacu.”

Skales nawe yari yanditse kuri Instagram ashimira Neza ku kuba yihanganira amafuti ye akamubabarira.

Ati “Ibyishimo ku bw’umwaka ushize dukundana. Ndagushimira kuba wihanganira kutava ku izima kwanjye […] mwamikazi wanjye ndagukunda by’ikirenga.”

Neza yahishuye iby’urukundo rwe na Skales muri Werurwe 2019 ashyira urukererekane rw’amafoto ku rukuta rwe rwa Instagram agaragaza ko ari mu rukundo na Raoul John Njeng-Njeng uzwi nka Skales mu muziki wa Nigeria.

Ni ubwa mbere Neza yari agaragaje amarangamutima ye ku bijyanye n’urukundo agashimagiza umusore muri ubu buryo. Muri 2018 byigeze guhwihwiswa ko yaba akundana na Skales nyuma y’aho yari amaze gutandukana n’undi mukobwa wo muri Ethiopie ariko biza gufatwa nk’ibihuha.

Mu minsi ishize havuzwe amakuru yuko Neza yaba atwite inda ya Skales ndetse bitegura kwibaruka imfura yabo.

Inkuru yo gutwita kwa Neza yakwirakwiye biturutse ku mashusho ye na Skales, uyu mukobwa ari kumubaza niba atazamusiga undi mu kumusubiza avuga ko atabikora kuko amutwitiye umwana.

Ikinyamakuru Tunez Media kibinyujije kuri Instagram cyanditse ko Skales na Ineza bari kwitegura umwana wabo mu minsi ya vuba.

Neza yahoze abarizwa mu nzu ifasha abahanzi ya MCG Empire ayivamo nyuma y’imyaka ibiri yari ishize bakorana. Yahise ava muri Nigeria asubira muri Canada ahari umuryango we.

Mu 2017 uyu mukobwa yegukanye igihembo cyo ku rwego rwa Afurika nk’umuhanzi utanga icyizere cy’ejo hazaza muri AFRIMMA, aza no ku cyereka abanyarwanda mu gitaramo cya Kigali Jazz Junction yahuriyemo na Masamba mu Ukuboza uwo mwaka.

Skales na Neza bari bamaze igihe bakanyujijeho kuri Instagram amafoto yabo acicikana, ariko uko bayashyizeho ninako bayakuyeho
Ifoto nk'iyi ntiwakongera kuyibona kuri Instagram z'aba bahanzi
Ahanyuranagamo amagambo y'urukundo kuri ubu hari kunyuranamo amagambo y'amaganya (Iyi foto Neza yahise ayisiba kuri Instagram ye)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza