Ukuri ku bikoresho byatumwe abakobwa bazajya mu mwiherero wa Miss Rwanda 2019

Yanditswe na Muvunyi Arsène
Kuya 9 Mutarama 2019 saa 07:28
Yasuwe :
0 0

Ubuyobozi bwa Rwanda Inspiration Back Up, itegura irushanwa rya Miss Rwanda, bwamaze impungenge abantu bari bakangaranyijwe n’urutonde rw’ibyasabwe abakobwa bazajya mu mwiherero.

Tariki 5 Mutarama 2019, i Gikondo hatoranyijwe abakobwa 20 bagomba kujya mu mwiherero w’irushanwa rya Nyampinga w’u Rwanda, ari nabo bazatoranywa uzambikwa ikamba n’ibisonga bye.

Ku wa kabiri tariki 08 Mutarama 2018, ku mbuga nkoranyambaga hiriwe impaka zishingiye ku bikoresho n’ibyangombwa aba bakobwa bagomba kwitwaza.

Ibi birimo amakanzu atatu n’imwe yakorewe mu Rwanda, amapantalo ya ‘jeans’ atanu harimo imwe y’ubururu n’indi y’umukara, inkweto ndende, ibikoresho bya kwisiga ibirungo mu maso (make up), ubwiteganyirize bw’ubuzima, ibikoresho bazifashisha mu kwerekana impano n’ibindi.

Abantu benshi bakurikira iri rushanwa, bagaragaje ko batanejejwe n’ibi bintu byose byatumwe aba bakobwa, dore ko hari ababibariraga bikagera mu mafaranga arenga ibihumbi magana atanu.

Bavugaga ko abahatana ari abana kandi abenshi nta bushobozi bafite, bityo ko ibi bikoresho batumwe, bakabaye babihabwa n’abategura irushanwa.

Mu kiganiro IGIHE yagiranye n’Umuyobozi wa Rwanda Inspiration Back Up itegura irushanwa rya Miss Rwanda, Ishimwe Dieudonné, yavuze ko impamvu bahisemo kubatuma imyenda yabo, kuko mu myaka yashize hari abakobwa bagiye babisaba kugira ngo bambare imyenda bihitiyemo ntawe ubangamiwe.

Yongeyeho ko nta tegeko bigeze batanga rivuga ko abazitabira irushanwa bagomba kujya kugura imyenda mishya.

Ati “Ntawe twabwiye ngo genda ugure amapantalo atanu, bemerewe no gukoresha ayo basanzwe bafite. Hari umukobwa utagira umupira w’imbeho? Ikaramu n’urupapuro ntitwabibahaye ku munsi wo gutoranya? Inkweto ndende ntabwo ari zo bari bambaye? Icyo gihe ikanzu ntibiyambitse? Iyo tubatumye ibintu nka biriya ni nk’inama tuba tubagira bitewe n’ibintu bizabera mu mwiherero.”

Ku byerekeye ibikoresho byo kwerekana impano Ishimwe, yavuze ko buri mukobwa agomba kwizanira igikoresho asanzwe yifashisha, ubwiteganyirize bw’ubuzima bazajyana ubwo basanzwe bakoresha iwabo naho iby’ibirungo byo mu maso (make up ) bizajyanwa n’abasanzwe babikoresha, ‘utabikeneye azabireke.’

Ubuyobozi bw’irushanwa rya Nyampinga w’u Rwanda, buzatanga imyenda n’inkweto bya siporo ku bakobwa bose, n’imipira isa bashobora kwambara mu gihe byabaye ngombwa.

Umwe mu bakobwa bahatanye mu irushanwa rya Miss Rwanda 2018 yatangarije IGIHE ko kwitwarira ibikoresho birimo imyenda mu irushanwa rya Nyampinga w’u Rwanda ari ibisanzwe.

Si muri iri rushanwa gusa kuko no mu marushanwa mpuzamahanga naho abakobwa bitwarira ibikoresho byose bazakenera, ubundi bagahabwa impuzankano aho bikenewe.

Umwiherero w’irushanwa rya Nyampinga w’u Rwanda 2019 uzatangira kuwa 13 Mutarama 2019, ubere i Nyamata kuri Golden Tulip aho bazamara ibyumweru bibiri.

Irushanwa rizasozwa kuwa 26 Mutarama 2019 mu birori bizabera mu nyubako ya Intare Conference Arena iherereye i Rusororo.

Abantu bose bazagura amatike bazoroherezwa kugerayo dore ko hashyizweho imodoka zizabavana mu Mujyi wa Kigali rwagati n’i Remera, zikanabagarura.

Abakobwa 20 bagiye kwerekeza mu mwiherero wa Miss Rwanda 2019
Bamaze gutorwa bahawe udukapu turimo amakayi n'amakaramu ya Cogebanque

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza