Ubuzima bushaririye bwa Mutijima watoraguwe mu mirambo muri Jenoside, nyuma n’abamureze bashaka kumwica

Yanditswe na Nsengiyumva Emmy
Kuya 25 Ugushyingo 2020 saa 02:51
Yasuwe :
0 0

Mutijima Aimé Serge w’imyaka 27 y’amavuko, ni imfubyi yatoraguwe mu mirambo y’Abatutsi bari biciwe muri ETO Kicukiro mu 1994. Kuri ubu ni umusore umaze kwigarurira icyizere cy’ubuzima nubwo yanyuze mu buzima bushaririye.

Uyu musore yahuje bagenzi be b’imfubyi biyemeze guteza imbere impano zabo bafatanyije, ubu bashinze itsinda ry’abakinnyi ba sinema bise ‘Twenga Entertainment’.

Iyo akuganiriza ku buzima bwe bwite, Mutijima hari aho agera agafatwa n’ikiniga kubera ukuntu bushaririye.

Uyu musore yatoraguwe mu mirambo muri Jenoside yakorewe Abatutsi mu 1994, nta muntu n’umwe wo mu muryango we azi, ntazi aho avuka cyangwa undi wese baba bafitanye isano.

Mutijima yanyuze mu nzira iteye agahinda

Jenoside yakorewe Abatutsi mu 1994, yasanze Mutijima afite umwaka umwe w’amavuko. Yamenye ubwenge yisanga mu kigo cy’abana b’impfubyi cya Croix Rouge ku Kacyiru.

Iyo muganira akubwira ko adafita amakuru menshi y’icyo gihe mu bwana bwe kuko yari akiri muto. Icyakora avuga ko bamubwiye ko yatoraguwe mu mirambo y’abari biciwe muri Eto Kicukiro.

Abakozi ba Croix Rouge bahise bamujyana mu kigo cy’abana b’impfubyi, kugeza ageze mu mwaka wa kabiri w’amashuri abanza, ubwo yabonye umuryango wiyemeje kumurera.

Umuryango yitaga uw’abagiraneza wamubereye ikigeragezo

Uwo muryango wamwakiriye aho kumurera wamufashe nabi, ku buryo ataryaga amafunguro amwe n’ay’abandi bo mu rugo.

Aganira na IGIHE, Mutijima yagize ati “Ibaze ko kenshi baryaga ibiryo byatetswe uwo munsi njye nkarya ibyaraye. Mbese ugasanga nk’ubu batetse umuceri njye bakampa ibijumba byaraye.”

Uyu musore yavuze ko ubwo yavaga muri Croix Rouge hari umuryango wahaga ibiribwa ababaga bafashe abana b’impfubyi biyemeje kubarera. Nyuma rero iyi gahunda yaje guhagarara, ibyo we akeka ko byateye ibibazo agatangira gufatwa nabi, hafi yo kwicwa.

Ati “Wasangaga kenshi bamfata nabi bikomeye, ubwa nyuma rero mpava umu-papa wo muri urwo rugo yarampamagaye mu ruganiriro, nicaye mutegereje anturuka inyuma ankubita agafuni mu mutwe mpita nikubita hasi.”

Mu kwikubita hasi ngo yavugije induru, atabawe ajyanwa kwa muganga mu karere ka Musanze, aza koroherwa nubwo yasigaranye ubumuga bwanamuteye indwara yo mu mutwe.

Nyuma yo kuva kwa muganga, Mutijima avuga ko atari gusubira mu rugo ahubwo yahise atorongera atangira kuba umwana wo ku muhanda gutyo.

Ati “Aho nzanzamukiye nisanze mpfutse mu mutwe hose baranyogoshe, mbivamo mpita njya mu muhanda.”

Ubuzima bwe bwo ku muhanda byarangiye bumuganishije i Gitagata

Uyu mwana wari ukiri muto, yisanze yagiye kuba ku muhanda mu gihe cy’imyaka ibiri. Ubwo yari ku muhanda yagiye akora imirimo itandukanye irimo ubukarani no kujonjora amakara.

Cya gisebe yari afite mu mutwe cyaje kongera kubyutsa ibibazo, yibuka neza ko umukecuru yafashaga kujonjora amakara i Nyabugogo ari we wamujyanye kwa muganga ku Muhima.

Mutijima utari ufite ubushobozi bwo kwishyura ibitaro, amaze koroherwa yarabitorotse asubira ku muhanda.

Umunsi umwe yaje kurwarira munsi y’ikiraro, haba umukwabo wo gufata abana bo ku muhanda ntiyabasha kwiruka nka bagenzi be afatwa gutyo.

Uko gufatwa byatumye ajyanwa mu kigo cyita ku bana b’inzererezi i Gitagata, aha niho ubuzima bwe bwongeye kugarukira.

I Gitagata yahabaye imyaka myinshi, kuko kuva mu wa Gatatu w’amashuri abanza kugeza arangije ayisumbuye yigaga ariho ataha.

Ubusanzwe abandi ntibajya barenza umwaka muri iki kigo, ariko kuko nta muryango yari afite yajyamo ubuyobozi bw’iki kigo bwahisemo kumugumana.

Yagize uburwayi bwo mu mutwe bwatumye ajya kuvurirwa i Ndera

Mutijima yaje kugira uburwayi bwo mu mutwe yakomoraga ku bikomere yatewe n’agafuni yakubiswe n’uwari wiyemeje kumurera

Ashimira bikomeye ikigo cya Gitagata cyiyemeje kumuvuza. Uyu musore yivurije i Ndera mu gihe cy’umwaka urengaho amezi atandatu.

Nyuma yo gukira, yasubiye ku ishuri arangiza amashuri yisumbuye aho yize indimi n’ubuvanganzo.

Nyuma yo kurangiza ayisumbuye yabwiye umuyobozi w’ikigo ko akeneye kujya hanze agatangira kubaka ubuzima bwe.

Icyo gihe ikigo cyamushakiye umuryango umwakira ahaba amezi atatu, ari nako yashakaga akazi yakora mbere yo kujya kwiga kaminuza.

Ati “ Nashakishije akazi muri Kigali, nabonye ako gukoropa muri T2000 nza kuhava ngiye kwiga kaminuza.”

Kugeza ubu uyu musore ari mu mwaka wa nyuma wa kaminuza aho yiga ibijyanye n’itangazamakuru.

Kugeza ubu avuga ko ubuzima bwagiye buhinduka, kuko akoresheje impano zinyuranye afite zirimo kuyobora ibirori bitandukanye, kuvuga amazina y’inka n’ibindi abona imirimo imufasha kubona amafaranga yo kubaho.

Mutijima yinjiye mu ruganda rwa sinema

Mutijima ahagarariye itsinda ‘Twenga Entertainment’, rigizwe n’abakobwa n’abasore umunani bafite impano zo gukina filime.

Guhura kwabo, Mutijima avuga ko byatewe n’ubuzima babanyemo kuko harimo abo biganye mu mashuri yisumbuye, abo yareranywe nabo mu bigo yabayemo n’abandi.

Bagamije gushaka ikintu cyatuma barenga amateka banyuzemo, kuko iyo bakinnye filime yo gusetsa usanga bibasigiye ibyishimo ntibakomeze guheranwa n’amateka yabo, ariko bikanabirema mu banyarwanda.

Ikiganiro na Mutijima

Imwe muri filime yakozwe n’uru rubyiruko

Bajya banyuzamo bagasura aho barerewe i Gitagata, aha bari bashyiriye impano umuyobozi w'iki kigo bafata nk'umubyeyi wabo
Mutijima na bagenzi be iyo basuye ikigo cya Gitagata baganiriza barumuna babo
Nubwo yanyuze mu rugendo rugoranye, Mutijima yarakuze yabaye umugabo
Mutijima na bagenzi be bihurije hamwe bashinga itsinda rikina filime

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .