Uko Bob Pro yashyize ukuboko kwe ku ikorwa ry’indirimbo Suzanna ya Sauti Sol

Yanditswe na Nsengiyumva Emmy
Kuya 11 Nzeri 2020 saa 02:43
Yasuwe :
0 0

Benshi mu bakunzi b’umuziki bamaze iminsi babyina indirimbo “Suzanna” y’itsinda rya Sauti Sol. Ni indirimbo uburyohe bwayo bushingiye ku mirimo ikomeye yakozwe n’umunyarwanda umenyerewe mu gutunganya indirimbo uzwi nka Bob Pro.

Iyi ndirimbo uyu mugabo yahawe akazi ko kuyikoraho nyuma y’uko Sauti Sol ishimye uburyo yari yakoze neza indirimbo bakoranye na The Ben (itarajya hanze).

Iki gihe abagize itsinda rya Sauti Sol bamusabye ko yabafasha guhuza amajwi n’umuziki by’indirimbo ziri kuri Album yabo nshya "Midnight Train".

Iyi Album Bob Pro yayikozeho indirimbo eshanu zirimo “Suzanna” yasohotse ikanakundwa cyane. Si iyi gusa yakozeho kuko zose hamwe zari eshanu zirimo iyo bakoranye na Wizkid.

Avuga uko byagenze ngo ahabwe akazi na Sauti Sol, Bob Pro yagize ati “Ubundi byaturutse ku ndirimbo aba bahanzi bakuru ba hano bagiye bakorana n’abahanzi bo mu karere. Nibwo nagiye gufasha The Ben gukora indirimbo yari afitanye n’iri tsinda. Nyirangije bakunze uko nabyitwayemo, bakunda uko amajwi asohotse ameze neza.”

“Iki gihe bambwiye ko bafite album bagiye gusohora ko nabafasha mu buryo bwo kuryoshya amajwi, bampa indirimbo esheshatu zirimo na Suzanna ndetse n’indi bakoranye na Wizkid ariko itarasohoka. Nzibasubije rero barazikunze cyane basohora Suzanna irakundwa.”

Bob avuga ko Sauti Sol bishimiye uko atunganya amajwi, bamusaba ko bajya bakorana kuko hari Umuhinde bakoranaga ariko akabahenda.

Avuga ko nyuma yo gukora kuri Suzanna, abatunganya indirimbo n’abahanzi bo mu Rwanda bamenye aya makuru batangira kujya bamwiyambaza ngo abafashe mu gusoza indirimbo baba bakoze.

Kugeza ubu uretse iyi ndirimbo yakozeho ya Sauti Sol, yanarambitse ibiganza ku mishinga y’indirimbo zagiye zikundwa hano mu Rwanda.

Zimwe mu zigezweho muri iyi minsi ni nka Henzapu ya Bruce Melodie, Kola ya The Ben n’izindi nyinshi zakozwe na Producer Element. Yakoze kandi kuri We don’t care ya Meddy, RJ The DJ na Rayvanny kimwe n’izindi nyinshi.

Bob pro avuga ko ibijyanye na ‘Mixage’ byatumye amenyana n’abakora indirimbo batandukanye mu Karere ka Afurika y’Iburasirazuba, by’umwihariko muri Kenya na Tanzania aho abahanzi b’abanyarwanda muri iyi minsi bari gukorana indirimbo n’abaho.

Kugeza ubu Bob Pro ari gutunganya album ye nshya azahurizaho indirimbo z’abahanzi b’abanyarwanda n’abo mu karere bafite amazina akomeye.

Ati ”Urumva, uburyo njye naganira n’umu-producer mugenzi wanjye tukemeranya guhuza abahanzi, si kimwe n’uko umuhanzi runaka yajya gushaka mugenzi we, hari igihe bigorana.”

Iyi album nshya ya Bob Pro yabwiye IGIHE ko ateganya ko izajya hanze mu mwaka wa 2021.

Ubusanzwe yitwa Bob Emmanuel yavukiye muri Uganda ahitwa Tooro. Ni umwana umwe kuri se.

Yigiye amashuri abanza muri Uganda ahitwa Kasese nyuma aza gukomereza mu Rwanda mu mashuri yisumbuye. Arangije ayisumbuye, yahise ajya kwiga gucuranga Piano mu Bubiligi.

Yahagurukiye ibyo gutunganya indirimbo z'abahanzi batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .