Waligwa wamenyekanye muri Filime “Queen of Katwe” yitabye Imana ku myaka 15

Yanditswe na Nsengiyumva Emmy
Kuya 17 Gashyantare 2020 saa 04:11
Yasuwe :
0 0

Nikita Pearl Waligwa wamenyekanye muri Filime “Queen of Katwe” yitabye Imana ku myaka 15 y’amavuko, biravugwa ko yazize ibibyimba yari arwaye kanseri yo mu bwonko.

Amakuru ava mu binyamakuru byo muri Uganda bihamya urupfu rw’uyu mwana aravuga ko yaguye mu bitaro bya Kampala ku wa Gatandatu tariki 15 Gashyantare 2020.

Ubuyobozi bwa Gayaza Secondary School yigagaho nibwo bwatangaje amakuru y’urupfu rw’uyu mwana wigagayo mu wa gatatu w’amashuri yisumbuye.

Babinyujije ku mbuga nkoranyambaga bagize bati” Wari inshuti ya benshi, tukubuze kubera ibibyimba byo ku bwonko. Nikita yigaga mu mwaka wa gatatu w’amashuri yisumbuye, komeza uruhukire mu mahoro.”

“Queen of Katwe” Filime uyu mwana yagaragayemo ishingiye ku nkuru mpamo y’uwitwa Phiona Mutesi umwana utaragize amahirwe yo kwiga akaza guhirwa no gukina umukino wa Chess, aza kuba umwana muto wa mbere utsinze amarushanwa ya Chess muri Uganda, ku myaka 17 abona amahirwe yo guhagararira igihugu mu marushanwa mpuzamahanga.

Waligwa yatangiye kurwara ibibyimba mu bwonko mu 2016, mu mwaka wa 2017 yaje kugaragaza ibimenyetso ko yakize asubira ku ishuri mbere yuko umwaka ushize (2019) yongeye kugaragaza ko arwaye ikindi kibyimba ku bwonko.

Iyi Filime yagaragayemo abakinnyi bakomeye ku Isi nka Lupita Nyong’o umunya-Kenyakazi wegukanye ibihembo bikomeye ku Isi, David Oyelowo n’abandi banyuranye.

Ibyamamare bitandukanye muri sinema byanditse ubutumwa butandukanye bwo kumwifuriza iruhuko ridashira no gukomeza umuryango we.

Lupita Nyong’o yagize ati "Ni akababaro gakomeye kuba ndi kwandika ko Nikita Waligwa yapfuye. Yari umukobwa mwiza kandi ufite impano mu bo nakinanye nabo muri filime ‘Queen of Katwe’. Yakinnyemo neza yitwa yitwa Gloria.”

Muri Queen of Katwe, Nikita akinamo yitwa Gloria ari inshuti y’uwitwa Phiona. Uwo Phiona aba afite nyina witwa Nakku Harriet ari we Lupita Nyong’o. Iyo filime yasohotse mu mwaka wa 2016 isohokera muri Leta Zunze Ubumwe za Amerika. Yagiye ibona ibihembo bitandukanye.

Nikita Pearl Waligwa yitabye Imana afite imyaka 15
Nikita Pearl Waligwa wamenyekanye muri Filime “Queen of Katwe”

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .