00:00:00 IGIHE NETWORK KN KINYARWANDA EN ENGLISH FR FRANCAIS

Ubwamamare mu gasobanuye, kwakira agakiza n’uko Imana yamurokoye uburwayi bukomeye: Ikiganiro na Yanga

Yanditswe na Nsengiyumva Emmy
Kuya 12 Kamena 2021 saa 11:58
Yasuwe :
0 0

Nkusi Thomas benshi bita Tom ariko abafana be bakamwita Yanga, muri iyi minsi ni umwe mu bafite ubuhamya bukomeye nyuma yo kuva mu buzima bwa gipagani akinjira mu nzira yo gushaka Uwiteka uherutse no kumukiza indwara ya Kanseri.

Yanga yamenyekanye mu mwuga wo gusobanura filimi mu Kinyarwanda (agasobanuye) yahishuye ko yamaze kuba umurokore watangiye no kubwiriza ijambo ry’Imana nyuma y’uko Imana imukoreye igitangaza cyo gukira indwara ya kanseri nk’uko abivuga.

Uyu mugabo w’ikimenyabose kubera gusobanura filime amaze imyaka igera ku munani yarahagaritse uyu mwuga

Yanga avuga ko yatangiye gusobanura filime afite imyaka 17 ubwo yigaga mu mashuri yisumbuye.

Kwisanga asobanura filime, avuga ko byaturutse ku mateka ye kuko akiri umwana aho babaga muri Uganda bari baturanye n’abakoraga uyu mwuga wo gusobanura ariko mu kigande.

Ageze mu Rwanda rero yatangiye na we kubyaza umusaruro ibyo yari yarabonye muri Uganda.

Mu kiganiro na IGIHE, Yanga yavuze ko gusobanura byamuhaye amafaranga menshi ndetse bituma amenyekana kugeza ubwo mu 2012-2013 yaje kubihagarika kuko yabonaga isoko ry’agasobanuye ritangiye kugenda nabi.

Nyuma yo guhagarika agasobanuye, uyu mugabo yaje kwinjira mu bundi bushabitsi yagize ibanga ari na bwo agikora.

Gukizwa kwa Yanga byari urugendo rurerure

Mu 2012-2013, Yanga avuga ko yatangiye urugendo rwo gushaka Imana, icyakora amara igihe kinini ari akazuyaze mu ijambo ryayo.

Urugendo rwo gushaka Uwiteka, Yanga avuga avuga ko yarutangiriye i Kagitumba ubwo yari mu kazi ko gukora umuhanda.

Ati “Najyaga numva Imana nk’uko abantu bose bayumva, njye nabonaga abakirisitu nkabafata nk’abasazi. Rimwe rero naje kujya Kagitumba ku mupaka ndi kubaka umuhanda, ndangije akazi njya ku iduka rya Pasiteri Balinda ndi kuhanywera agacupa dutangira kuganira, ikiganiro cyanjye na we ni cyo cyabaye imbarutso yo gushakisha Uwiteka.”

Pasiteri Balinda yahaye ubuhamya Yanga, amubwira uko yakiriye agakiza nyuma y’uko Imana yamukijije SIDA, bikora ku mutima uyu mugabo wari mu byamamare bikomeye.

Ubuhamya bw’uyu mu pasiteri bwatumye Yanga atangira kugira inyota yo gushakisha Uwiteka.

Avuga ko yifuzaga gushaka Uwiteka kuko nubwo yari atunze ndetse ari icyamamare ariko yari abayeho atishimye.

Ati “Njyewe ikibazo nari mfite cyari uko ntari mfite Uwiteka, najya gushaka amahoro nkajya mu nzoga, mu biganiro n’inshuti n’ibindi.”

Bwa mbere ajya mu masengesho, Yanga yasabye umukozi w’Imana wasengeye wa mu Pasiteri ko na we yamusengera akareka inzoga.

Yanga avuga ko yanywaga inzoga nyinshi, ndetse rimwe yigeze kugira ibonekerwa ryamweretse ko gusinda byari karanda yo mu muryango we.

Uyu mugabo yabayeho mu buzima bwo gushakisha Imana kuva mu 2013 ariko ataramaramaza, kugeza mu 2018 ubwo yamwigaragarije ndetse ahita yiyemeza kuyikorera.

Uburwayi bukomeye yahuye na bwo nibwo bwamubereye inzira yo kumenya inzira ye mu Mana

Mu 2018, Yanga yaje kugira uburwayi bukomeye, arwara ikibyimba ku gifu cyaje kumutera kanseri.

"Naje kurwara muganga ambwira ko uburyo ndwaye ntashobora kumara umwaka ndi muzima uretse kuba najya kwivuriza muri Afurika y’Epfo."

Ubwo yari kwa muganga yaje kumenya ko uretse kuba arwaye ikibyimba ku gifu, hari haramaze kujyamo na kanseri.

Akimara kumenya ko arwaye gutya, Yanga yarihebye bikomeye atangira gushaka abakozi b’Imana ngo bamusengere.

Uyu wari waramenye ko muri Nigeria hari umukozi w’Imana witwa TB Josua (uherutse kwitaba Imana) yatangiye kwifuza kujya gusabayo amasengesho, ariko Imana iza kumumusangisha mu nzozi.

Mu nzozi, Yanga yabonekewe n’abakozi b’Imana babiri bifuzaga kumusengera aribo TB Josua na Robert Kayanja wo muri Uganda.

Iki gihe avuga ko ari na bwo yatangiye kumenya ko azakorera Imana, kuko yaje no kumukiza ya kanseri yari yaramujujubije.

Ati “Kanseri nayikize nta wumbaze, bari barambwiye ko bazambaga igifu bakakimaraho cyose, ariko naje gukira nta wumbaze!”

Yakijijwe n’umunyamasengesho wo muri Uganda witwa Robert Kayanja

Buri wese wakumva inkuru yo gukira kwa Yanga yagira ngo ni filime, ariko we iyo abara iyi nkuru ahamya ko Imana ari yo yamukijije binyuze mu bakozi bayo.

Ati “Nkiva muri Afurika y’Epfo banteye igice kimwe cy’imiti, ntegereje gusubirayo bwa kabiri, naje kumenya umunyamasengesho Robert Kayanja wo muri Uganda, mpagarika ibyo kujya muri Nigeria gushaka TB Josua, nagiye muri Uganda mutekerereza uko namubonekewe ndangije mubwira uburwayi bwanjye arambwira ati kira mu izina rya Yesu!”

Nyuma yo gusengerwa agakira, Yanga avuga ko yasubiye kwa muganga muri Afurika y’Epfo ariko asaba ko babanza kongera kumusuzuma kuko yiyumvagamo impinduka.

Bamaze kumusuzuma bagasanga ari muzima, buri wese yaratunguwe bikomeye, kuva ubwo ahita yiyemeza gukorera Imana ubuzima bwe bwose.

Ubuzima bwo gukorera Uwiteka Yanga abubayemo ate?

Kuva mu 2019, Yanga avuga ko yatangiye gukorera Uwiteka n’umutima we wose, ibi byatumye abona itandukaniro hagati y’ubwo yabagamo n’ubwo arimo uyu munsi bwo kurangamira Imana.

Ati “Ubuzima turimo uyu munsi iyo butarimo Uwiteka nta cyerekezo buba bufite!”

Yanga yavuze ko nyuma yo kumenya ko hari ibyiringiro, yafashe umwanzuro wo kwiringira Imana agatangira no kubyigisha abandi abasobanurira ko amahoro nyayo ari aturuka ku Mana.

Ati “Ni ukuvuga ko iyo uri muri Yesu, ubona amahoro kandi yuzuye! Amahoro aturuka mu Mana ntabwo aturuka mu bintu cyangwa ikindi icyo ari cyo cyose.”

Asoza ikiganiro Yanga yagiriye inama abakiri bato ndetse n’urubyiruko muri rusange ko bakwiye gukunda umurimo ariko mu kazi kose bakora bagaharanira kubaha Imana.

Yanga yamamaye mu gusobanura filimi zari zigezweho hagati y’umwaka wa 2000 kugera muri 2013, umwuga we umuhesha amafaranga menshi nk’uko na we yakunze kubivuga mu biganiro yagiranaga n’itangazamakuru.

Nyuma yo gukizwa akarangamira Uwiteka, Yanga yiyemeje kuba umurokore unabwiriza ubutumwa, naho ibyo gusobanura filimi ngo ntanashaka kubyibuka kuko ari ibintu yakoze mu gihe cyabyo ubu akaba agiye kujya mu byo gukorera Imana.

Uyu mugabo ni umwe mu bagize abakunzi babatari bake igihe yari ayoboye ibyerekeranye no gusobanura Filimi mu myaka irenga 10 yamaze akora aka kazi.

Ikiganiro na Yanga

Yanga yinjiye mu buzima bwo gukorera Uwiteka nyuma yuko amwigaragarije akanamukiza indwara yari imwivuganye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .