Urugendo rwa Samusure wacikirije amashuri akanakora ububoyi mbere yo gufatishiriza muri sinema (Video)

Yanditswe na Nsengiyumva Emmy
Kuya 18 Ugushyingo 2019 saa 06:37
Yasuwe :
0 0

Kuva kure ukagera aheza ni ibintu bibaho cyane. Abahanga bakunze guhamya ko kuvukira mu muryango ukennye atari ikosa ahubwo ikosa ni ugupfa ukennye kuko haba hari amahirwe menshi yo kwirwanaho.

Kalisa Ernest, Sinema Nyarwanda yambitse izina rya Samusure ni urugero rwiza rw’umuntu wirwanyeho aho byari ibikomeye ubu akaba amaze kwiyubaka bigaragarira amaso ya benshi.

Samusure yahishuye ubuzima yanyuzemo kuva mu bwana kugeza abaye icyamamare muri Sinema y’u Rwanda.

Uyu musore yatangiye gukina filime mu mwaka wa 2003, icyakora ahamya ko ari ibintu yakunze akiri muto.

Yagize ati ”Nakundaga no kujya mu basaveri kugira ngo mbone aho nkinira udukino tumeze nka filime.”

Yongeyeho ko yakundaga cyane ikinamico za Radio Rwanda ku buryo ava mu cyaro yumvaga ko azabona amahirwe yo gukina mu Itorero Indamutsa.

Samusure wavutse mu 1977 yageze i Kigali mu 1997, aha akaba yari yitabiriye igitaramo cya Lucky Dube ariko anafite umugambi wo gushakisha aho Indamutsa za Radio Rwanda zabaga ngo abone uko azinjiramo bityo akabye inzozi zo kuzaba umukinnyi wa filime.

Uyu mugabo umaze kubaka izina mu gukina filime ahamya ko atigeze yiga ariko akirinda kugaruka ku mpamvu zabimuteye nubwo yemeza ko make yize amufasha kumenya gusoma no kwandika.

Ati ”Habaho impamvu nyinshi cyane zishobora gutuma umuntu atiga bitewe naho uvuka, n’imibereho. Ni byinshi, impamvu yanjye ni uko ntize.”

Urugendo rwa Samusure ava i Rusizi akagera i Kigali

Samusure yavuye iwabo i Rusizi mu 1997 ubwo yari yujuje imyaka 20, ikintu cyatumye ahava akayoboka Umurwa wa Kigali ni uko yifuzaga gukina mu ikinamico zacaga kuri Radio Rwanda.

Icyo gihe icyakora ikindi cyamuteye imbaraga zo kuva iwabo ni uko yari yamenye amakuru y’uko Lucky Dube yagombaga gutaramira mu Rwanda bityo akitegura kwitabira icyo gitaramo.

Icyakora yaba gukina mu Ndamutsa cyangwa kwitabira igitaramo cya Lucky Dube byose nta na kimwe cyamuhiriye.

Samusure avuga ko igitaramo cyari cyamujyanye i Kigali atabashije kucyitabira kuko yagize ikibazo cy’imodoka cyatumye akerererwaho umunsi umwe asanga cyaraye kibaye.

Abajijwe aho yakuye amafaranga y’itike yamugejeje i Kigali, Samusure yasubije ko yayakuraga mu kazi yakoraga icyo gihe k’ububoyi.

Akazi k’ububoyi Samusure yagatangiye mu 1993 aho yahembwaga amafaranga 700 ku kwezi, icyakora yagiye kuza i Kigali ageze ku 2500 Frw.

Ageze i Kigali, Samusure ntabwo ubuzima bwamugoye cyane kuko yahise abona akazi, yatangiye akora akazi k’ububoyi n’ubundi yari asize ku ivuko icyakora umushahara wo warazamutse kuko icyo gihe yahembwaga 3500 Frw.

Usibye aka kazi yanurijwemo akagezwa ku mushahara w’ibihumbi 5 Frw, nyuma y’amezi umunani yaje kujya gukora mu kabari k’i Remera ahembwa ibihumbi 10 Frw.

Nyuma y’umwaka akora mu kabari kaje guhinduka restaurant nayo yakozemo igihe kirekire.

Samusure yavuze ko icyo gihe yahakoraga ariko afite n’akandi kazi k’ubuyede mu rwego rwo gushakisha amafaranga.

Amaze kugwiza amafaranga, Samusure yasubiye i Rusizi kogosha, ibintu yari amaze kwigira i Kigali.

Mu 1999 nibwo Samusure avuga ko yasubiye iwabo i Rusizi, iki gihe ngo yari yaramaze kumenya kogosha ajya kubikorera iwabo. Amafaranga yakuyemo ni yo yaguzemo camera yafotoreshaga.

Nyuma y’igihe ari iwabo i Rusizi, mu 2002 yagarutse mu Mujyi wa Kigali ahashinga inzu yogosha i Gikondo. Inzozi ze yari afite zo kwinjira mu Itorero Indamutsa ntacyo zatanze, kuko yakomeje gusharirirwa no kutazigeraho.

Uko yisanze mu mwuga wo gukina filime

Mu 2003 nibwo yinjiye muri sinema, amafaranga ya mbere yabonye muri uyu mwuga yayongeye ku yo yari yagurishije inzu yogosha ahitamo gushinga butike icuruza ibintu bitandukanye.

Yinjira mu mwuga wo gukina filime ahamya ko ari inshuti ze zamuranze aho bashakaga abakinnyi.

Samusure avuga ko impano yo gufata mu mutwe ari ikintu cyamufashije mu mwuga wo gukina filime.

Yatangiriye kuri filime yitwa "Nta wumenya aho bwira ageze" yamenyekanye nka “Kanuma” nyuma akurikizaho “Haranira kubaho” izwi nka "Kanyombya".

Izi filime ni zo zatumye benshi bamumenya cyane. Samusure umaze gukina filime zigera ku munani yongeye kwamamara cyane mu itsinda ry’abakina muri Seburikoko.

Kuri ubu Samusure yatangije iye nshya yise “Mahindu” ica ku rukuta rwe rwa Youtube akinanamo n’uwo benshi bamenye nka Mukarujanga.

Asobanura aho akura ubumenyi bw’ibyo akora nyamara atarize, Samusure avuga ko yafashijwe n’ubwenge karemano Imana yamuhaye.

Uyu mugabo avuga ko aba i Kigali ndetse yanamaze kwimura umuryango we akawuvana i Rusizi aho yawubakiye inzu.

Samusure uhamya ko ateganya gushaka aracyari ingaragu. Yemera ko hari abana yabyaye ariko ngo ntakifuza kuvuga ku mubare wabo.

Uyu musore umaze kuba icyamamare, usibye gukina filime anakora akazi ko mu bukwe aho akora nk’umushingwabirori (MC), akavuga amazina y’Inka, akaririmbira abageni n’ibindi.

Ahamya ko Imana ariyo yamuhaye impano izatuma abaho kandi neza nubwo atize.

Samusure watangiye akorera 700 Frw, kuri ubu ahamya ko akazi yakwemera ari akajya kamuha uburenganzira bwo gukora ibintu bye, byibuza ariko akabihemberwa ibihumbi 500 Frw.

Reba ikiganiro kirekire twagiranye na Samusure

Reba hano agace ka filime ya Samusure yitwa "Mahindu"

Samusure yakuranye impano yo gufata mu mutwe asanga ari nayo yamufashije kuvamo umukinnyi w'umuhanga muri sinema
Samusure na Seburikoko ni bamwe mu bakinnyi ngenderwaho muri Filime ya Seburikoko
Kuri ubu Samusure yatangije umushinga wa Filime ye yitwa "Mahindu"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza