“Ubushyuhe” ya Dj Pius na Bruce Melodie yatangiye gucurangwa kuri Trace Urban, bisaba iki?

Yanditswe na Nsengiyumva Emmy
Kuya 12 Nzeri 2020 saa 11:52
Yasuwe :
0 0

Benshi mu bahanzi ba hano mu Rwanda bahora barota kugeza umuziki wabo ku rwego mpuzamahanga, bahora batekereza uko indirimbo zabo zacurangwa kuri televiziyo zikomeye ku Isi. Nubwo hari abahamya ko inzira zigifunze, uko iminsi yisunika hari abagenda bereka bagenzi babo ko byose bishoboka mu gihe baba bakoze.

Si kenshi Televiziyo iri mu zikomeye icuranga umuziki, Trace Urban ifatwa nk’umubyeyi w’izindi shene ziyishamikiyeho, yacuranze indirimbo z’abahanzi b’abanyarwanda.

Muri iyi nkuru tugiye kugaruka ku nkuru y’indirimbo “Ubushyuhe”, iri mu zigezweho mu Rwanda yanatangiye gucurangwa kuri iyi televiziyo ikomeye ku Isi mu gucuranga imiziki.

Buri muhanzi w’Umunyarwanda akora umuziki afite indoto z’uko umunsi umwe yazabona indirimbo ye yatambutse kuri Trace Urban.

Byatumye tubaza Dj Pius ibanga yakoresheje kugira ngo indirimbo ye itoranywe ku ziri gucurangwa kuri iyi televiziyo mpuzamahanga inakomeye mu ruganda rw’imyidagaduro ku Isi.

Uyu muhanzi yavuze ko atari we wabigizemo uruhare. Ati ” Njye ntabwo nigeze nyitanga kuri iriya televiziyo, gusa nari mbizi kuko bari banyoherereje email bambwira ko indirimbo yanjye ihagaze neza. Icyo ntari nzi ni igihe izatambukira kuko si nanjye wayibonye ahubwo ni umufana wabibonye arabipostinga [arabitangaza].”

DJ Pius yavuze ko we indirimbo yayitanze kuri Trace Mziki na Trace Naija. Kuba Ubushyuhe iri mu zari zigezweho kuri izi televiziyo, byatumye itoranywa yoherezwa kuri Trace Urban.

Dj Pius yagize ati “Trace Urban ijya ibaza izi shene ziyishamikiyeho indirimbo zikunzwe mu duce tw’aho zikorera, kuba Ubushyuhe yahoraga mu zikunzwe kuri Trace Mziki byayihesheje amahirwe yo koherezwa kuri iyi televiziyo ikomeye.”

Uyu muhanzi yavuze ko yaherukaga kubona indirimbo ye kuri iyi televiziyo ubwo yakoraga Agatako yahuriyemo na Jose Chameleone.

Yakomeje ashishikariza abahanzi b’abanyarwanda gukora cyane bakanibuka gutanga indirimbo zabo kuri shene za Trace Tv zo muri Afurika no ku zindi televiziyo mpuzamahanga.

Dj Pius yavuze ko yatangiye gusubiramo Ubushyuhe, ari kuyikorana n’abahanzi bakomeye mu karere ka Afurika y’Iburasurazuba gusa yirinze kuvuga amazina yabo.

Dj Pius yahishuye ko indirimbo ye "Ubushyuhe" yatangiye kuyisubiranamo n'abahanzi bakomeye muri Afurika y'Iburasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .