00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwagaragaje uruhare rwa Bikindi Simoni muri Jenoside yakorewe Abatutsi

Yanditswe na Nsengiyumva Emmy
Kuya 6 June 2022 saa 07:57
Yasuwe :

Muri iki gihe u Rwanda n’Isi muri rusange byibuka Jenoside yakorewe Abatutsi mu gihe cy’iminsi ijana mu 1994, rimwe mu mazina y’abayigizemo uruhare adasiba kugarukwaho harimo Bikindi Simoni wari umuhanzi w’ikirangirire.

Uruhare rwa Bikindi muri Jenoside yakorewe Abatutsi rwagaragajwe muri Raporo y’ubushakashatsi bwa Minisiteri y’Urubyiruko n’Umuco n’ubwa Minisiteri ya Siporo, ku bufatanye n’iyahoze ari Komisiyo y’Igihugu yo kurwanya Jenoside.

Ni ubushakashatsi bwari bugamije kugaragaza amateka ya Jenoside yakorewe Abatutsi bakoreraga Minisiteri y’Urubyiruko n’Amashyirahamwe (MIJEUMA) n’inzego zari ziyishamikiyeho.

Bikindi yari umugabo wari ukomeye mu muziki wo hambere, uretse kugarukwaho cyane ku ruhare rwe muri Jenoside yakorewe Abatutsi, ibi byaha yanabihamijwe n’Urukiko Mpuzamahanga rwashyiriweho u Rwanda rwamukatiye imyaka 15 y’igifungo.

Nubwo ariko benshi bumva izina Bikindi, usanga badasobanurirwa byimbitse amateka y’uyu mugabo n’uburyo yifashishije inganzo ye n’ubwamamare bwe mu gutera ingabo mu bitugu Jenoside yakorewe Abatutsi mu 1994.

Bikindi ni mwene Manzi na Nyirakamondo, yavukiye i Mubona ahahoze ari muri Komini ya Rwerere ya Perefegitura ya Gisenyi. Yize amashuri yisumbuye mu ishuri nderabarezi rya Byumba arangiza mu wa 1975.

Akirangiza amashuri yisumbuye, yatangiye akazi mu kwezi kwa cumi 1976 muri Ministeri y’Urubyiruko n’Amakoperative ashinzwe guhuza ibikorwa mbonezamubano n’umuco, guteza imbere ibigo by’urubyiruko no gutegura ibirori nkangurambaga ku rwego rw’Igihugu.

Bikindi yamenyekanye cyane mu bikorwa byo guhimba indirimbo n’ibihangano byaganishaga ku gushishikariza Abahutu kwanga Abatutsi abinyujije mu rubyiruko.

Umwanya yakoragamo muri Minisiteri wamuhesheje uburyo bukomeye bwo kugera mu nzego z’urubyiruko hose mu Rwanda mu rwego rwo kubiba amacakubiri n’urwango mu rubyiruko.

Ku tariki ya 13 Nyakanga 2001 Bikindi yafatiwe mu Buholandi aza koherezwa kuburanira mu Rukiko Mpanabyaha Mpuzamahanga rwashyiriweho u Rwanda Arusha muri Tanzania ku wa 27 Werurwe 2002.

Bikindi yari icyamamare mu guhimba no kuririmba akanayobora Itorero rye bwite yise ‘Irindiro’

Bikindi yatangiye kuburana ku wa 18 Nzeri mu 2006, nyuma yo kuburana no kujurira, yahamwe n’icyaha cyo gushishikariza Abahutu bamwe gukorera Abatutsi Jenoside.

Ku wa 18 Werurwe 2010 Bikindi nibwo yakatiwe, ahanishwa gufungwa imyaka cumi n’itanu.

Ubwo yari afite imyaka 64 mu Ukuboza 2018, yashizemo umwuka aguye muri Benin, azize Kanseri y’ubugabo bw’epfo (Prostate).

Yari icyamamare mu guhimba no kuririmba akanayobora Itorero rye bwite yise ‘Irindiro’.

Yagize uruhare mu itegurwa rya Jenoside mu Rwanda hose akoresheje ibihangano bye. Yahimbye indirimbo nyinshi atanga n’ibiganiro mbwirwaruhame bihamagarira abo yitaga rubanda nyamwinshi kwanga Abatutsi no kubarimbura.

Yakoranaga n’abayobozi bakuru ba MRND, Interahamwe, CDR, RTLM n’ab’ibitangazamakuru kugira ngo akwirakwize urwo rwango kandi ashikarize abaturage gukora Jenoside.

Yagize kandi n’uruhare mu ishyirwa mu bikorwa rya Jenoside mu Mujyi wa Kigali no mu cyahoze ari Perefegitura ya Gisenyi aho yayoboye ibitero by’Interahamwe, zirimo ababyinnyi bari bagize itorero Irindiro.

Iryo torero ryashinzwe mu 1987 rikemerwa n’amategeko mu wa 1989, ryari rigizwe n’ababyinnyi, abaririmbyi n’abakaraza bagera kuri mirongo itanu bari intyoza mu mbyino n’indirimbo nyarwanda.

Ni itorero ryari rigizwe n’Abahutu n’Abatutsi ariko Abatutsi baje kugenda bavamo buhoro buhoro uko ryagendaga rifata isura ya politiki.

Imikoranire ya Bikindi n’inzego z’ubuyobozi n’amashyaka yagize uruhare muri Jenoside.

Bikindi yakoranaga bya hafi na Perezida wa Repubulika Habyarimana, Minisitiri w’Urubyiruko n’Amashyirahamwe Callixte Nzabonimana n’abayobozi bo mu rwego rw’Igihugu ba MRND mu gutoza umutwe w’Interahamwe kwitwara gisirikare no kuzangisha Abatutsi.

Muri ibyo bikorwa, ni na ko yashakiraga Interahamwe abayoboke mu bice bitandukanye by’Igihugu. Ahaberaga mitingi hose, yabaga ahari n’Itorero rye.

Muri mitingi yabaye mu 1993, Edouard Karemera wari Perezida wa MRND mu rwego rw’Igihugu yatatse Bikindi agaragaza uruhare afite mu gukwirakwiza ingengabitekerezo y’ishyaka MRND na CDR.

Impamvu Karemera yavugaga ibyo ni uko mu by’ukuri Bikindi yari afite ijambo rikomeye ku rubyiruko, bityo akaba yarifashishwaga mu kurushishikariza kwitabira imigambi ya MRND na CDR yo gutegura no gukora Jenoside.

Radio RTLM yari yarashingiwe kwangisha Abatutsi abandi Banyarwanda, kubatesha agaciro no kuzabarimbura.

Nyuma y’isesengura ryimbitse, urukiko rwa Arusha rwemeje ko koko iyo radio yari rutwitsi. Abayumvaga bahamagarirwaga guhangana n’Inyenzi-Inkotanyi.

Mu mvugo ya RTLM, byavugaga kurimbura Abatutsi. Mu gihe cya Jenoside, iyo radio yakomeje umurego, isaba Abahutu kuvumbura Abatutsi aho bari hose no kubica.

Simon Bikindi ari mu bashinze iyo radio, anayifitemo imigabane kandi yari anafite indirimbo zashishikarizaga kwica Abatutsi zanyuragaho. Ibyo rero bivuga ko Bikindi na RTLM bari bahuje imyumvire.

Ku wa 18 Werurwe 2010 Bikindi nibwo yakatiwe ahanishwa igihano cyo gufungwa imyaka cumi n’itanu

Ikindi ni uko RTLM yafataga Bikindi nk’inararibonye n’umusesenguzi wa politiki y’u Rwanda muri icyo gihe.

Mu Ukuboza 1993 no muri Mutarama 1994, Gaspard Gahigi, wari umunyamakuru wa RTLM yahaye ibiganiro Simon Bikindi. Icyo gihe yagaragaje ko ashyigikiye imigambi yose ya Perezida Habyarimana anamagana amasezerano y’amahoro ya Arusha.

Bikindi yagiye muri za mitingi zabaga zigamije gutegura kwica Abatutsi no kwigabiza ibyabo kuko uko zarangiraga bahitaga bagabwaho ibitero.

Hagati y’ukwezi kwa Kanama 1993 n’Ukuboza 1993, Bikindi yakoresheje inama zitandukanye muri Komini Rwerere no mu Mujyi wa Gisenyi. Iki gihe yakunze kugaragara azenguruka mu modoka ifite indangururamajwi yagendaga avugiramo.

Izo nama zakozwe nyuma y’itariki ya 12 Kanama 1993, ubwo Bikindi yari amaze kugaruka mu Rwanda avuye mu butumwa yari yaragiyemo i Burayi muri Mata uwo mwaka.

Akigaruka mu Rwanda, Bikindi yagiye muri mitingi yabereye kuri Stade Umuganda avugira muri urwo ruhame ko umwanzi w’igihugu adakwiye gushakirwa kure, ko ari Umututsi aho ari hose.

Ati “Yaba iruhande rwawe, mu rugo cyangwa ku musozi runaka kandi Abahutu bagomba kubahiga bakabica.”

Nyuma y’iyo nama Abahutu bamwe bahise bashishikarira guhiga Abatutsi barabica, harimo umugore witwaga Ancilla n’umukobwa we.

Uruhare rw’indirimbo za Bikindi mu kubiba amacakubiri guhera mu 1990 kugera mu wa 1994.

Muri izo ndirimbo Bikindi yemezaga ko Abatutsi bari baragize Abahutu abacakara babo, akabasaba kurengera impinduramatwara yabaye mu wa 1959 n’ibyo yari imaze kugeza kuri rubanda nyamwinshi.

Mu ndirimbo za Bikindi zakoze ishyano cyane ni ’Twasezereye’, ’Nanga Abahutu’, ’Bene Sebahinzi’ n’izindi nyinshi.

Izindi nkuru wasoma kuri Bikindi

 Imiterere y’ibyaha byahamijwe Bikindi Simon waguye muri Benin

-Ibyo wamenya ku ndirimbo za Simoni Bikindi zakanguriraga Abahutu kwanga Abatutsi

Bikindi yahimbye indirimbo nyinshi atanga n’ibiganiro mbwirwaruhame bihamagarira abo yitaga rubanda nyamwinshi kwanga Abatutsi no kubarimbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .