Umudiho n’ingoma za Kinyarwanda byashimishije abitabiriye Iserukiramuco rya “World Music Parashow“ mu Burusiya

Yanditswe na Nsengiyumva Emmy
Kuya 8 Ugushyingo 2019 saa 07:38
Yasuwe :
0 0

Abari bahagarariye u Rwanda mu Iserukiramuco “World Music Parashow“ ryaberaga mu Burusiya basize inkuru nziza ku banyamahanga bahakundiye umudiho n’ingoma bya Kinyarwanda.

Ni ku nshuro ya kabiri u Rwanda rwari rwitabiriye iserukiramuco rizwi nka World Music Parashow, risanzwe ribera mu Burusiya.

U Rwanda rwari ruhagarariwe n’itsinda ry’abantu bane baturutse muri “Troupe Des Personnes Handicapées Twuzuzanye, Rwanda”, rwabaye igihugu cya mbere cya Afurika kiryitabiriye.

Ku wa 31 Ukwakira 2019 nibwo hatangijwe iri serukiramuco mu gitaramo cya mbere cyabereye mu Mujyi wa Kostroma. Itsinda ry’Abanyarwanda bafite ubumuga babyina gakondo ndetse banavuza ingoma za Kinyarwanda ryarishimiwe bikomeye.

Ibi ni nako byagenze ku munsi wo gusoza iri serukiramuco ryashyizweho akadomo mu ijoro ryo ku wa 7 Ugushyingo 2019. Aha bakaba bakoreye igitaramo mu Mujyi wa Moscow icyakora gisiga abari mu cyumba bishimiye bikomeye umudiho n’ingoma bya Kinyarwanda.

Ihuriro “Troupe Des Personnes Handicapées Twuzuzanye” ryavuyemo abahagarariye u Rwanda muri iri serukiramuco ni umuryango w’abafite ubumuga ukora ubuvugizi n’ubukangurambaga ku burenganzira bwabo binyuze mu mpano zitandukanye ziganjemo ubuhanzi.

Muri uyu mwaka wa 2019 ku bufatanye na World Music Parashow ikorera mu Burusiya “Troupe Des Personnes Handicapées Twuzuzanye, Rwanda” yatumiwe mu gikorwa cy’iserukiramuco ari naryo berekanyemo imbyino z’umuco w’u Rwanda.

Iri tsinda ryari rigizwe na Egidie Nirere, Farida Kankundiye, Marie Appoline Buntubwimana na David Twizerimana, bafashijwe n’abanyamahanga kuvuza ingoma gakondo zo mu Rwanda.

David Twizerimana uri mu bagize iri tsinda yabwiye IGIHE ko abanyamahanga bakunze uburyo bacuranga ingoma Kinyarwanda bahitamo kubyiga bityo ku gitaramo cya nyuma babasaba ko bafatanya ku rubyiniro.

Ati ”Ni iby’agaciro kubona abanyamahanga bakunda ingoma zacu bagahitamo kuziga ndetse bakanazimenya ku rwego badufashije ku rubyiniro. Byatweretse ko umuco wacu wakundwa cyane no hanze y’u Rwanda.”

Yashimiye Ambasade y’u Rwanda mu Burusiya yababaye hafi mu rugendo rwabo bagiriye muri iki gihugu.

Reba agace gato k’uburyo iri tsinda ryitwaye mu Burusiya

Abanyamahanga bishimiye umudiho w'Abanyarwanda
Byari ibyishimo ku banyamahanga bize bakamenya kuvuza ingoma za Kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza