00:00:00 IGIHE NETWORK KN KINYARWANDA EN ENGLISH FR FRANCAIS

Ubunani bwahumuye! Ibirori bizaherekeza umwaka wa 2022

Yanditswe na Nsengiyumva Emmy
Kuya 29 Ukuboza 2022 saa 11:13
Yasuwe :

Mu gihe hasigaye iminsi mbarwa umwaka wa 2022 ukarangira, abakunzi b’imyidagaduro nabo bambariye kuwuherekereza mu birori bitandukanye.

Mu mpera z’umwaka haba hategurwa ibitaramo byiganjemo iby’abahanzi bakora umuziki usanzwe ndetse n’ibyo kuramya no guhimbaza Imana.

Ni muri urwo rwego IGIHE yateguye inkuru ikubiyemo bimwe mu bitaramo bikomeye byateguwe mu rwego rwo guherekeza umwaka wa 2022.

Israel Mbonyi azaha ubunani ab’i Burundi

Ku wa 30 Ukuboza 2022 ndetse na tariki 1 Mutarama 2023 Israel Mbonyi uri mu baramyi bagezweho mu Karere ka Afurika y’Iburasirazuba azaba ataramira abakunzi be batuye i Bujumbura.

Ni ibitaramo bibiri bizabimburirwa n’icyateguriwe aba VIP kizaba ku wa 30 Ukuboza 2022 ndetse n’icya rusange giteganyijwe ku wa 1 Mutarama 2023.

Rubavu hongeye gutekerezwaho mu bitaramo

Abakunzi b’umuziki bo mu Karere ka Rubavu bongeye gutekerezwaho kuri iyi nshuro bategurirwa ibitaramo bibiri bikomeye birimo ikizaba ku wa 31 Ukuboza 2022 ndetse n’ikizaba ku wa 1 Mutarama 2023.

Ni ibitaramo bizabimburirwa n’icyitwa Erica’s Gisenyi Festival kizaba ku wa 31 Ukuboza 2022 muri Stade Umuganda.

Iki gitaramo cyatumiwemo abahanzi nka Young Grace, Bull Dogg, Senderi Hit, Orchestre Impala, Kenny Sol, Ariel Wayz n’abandi banyuranye.

Uretse iki gitaramo ariko ku wa 1 Mutarama 2023 i Rubavu hazabera igitaramo cyateguwe na DJ Bissosso.

Iki gitaramo cyatumiwemo Bushali, Chris Eazy, Papa Cyangwe n’abandi kizabera ku mucanga rusange.

East African Party

Abahanzi barenga 10 batoranyijwe na East African Promoters bagiye guhurira mu gitaramo cya East African Promoters giteganyijwe ku wa 1 Mutarama 2023.

Ni igitaramo kizabera muri BK Arena ahazaba hataramira abahanzi nka King James, Riderman, Platini, Alyn Sano, Bruce Melodie, Davis D, Niyo Bosco, Nel Ngabo, Ish Kevin, Ariel Wayz, Okkama na Afrique.

First After Party

Ni ibirori byateguwe muri Park Inn by Radisson, ahazabera ibirori byo kwakira abaraye inkera bishimira impera z’umwaka wa 2022 ari nako baha ikaze uwa 2023.

Iki gitaramo kizaba kivangwamo imiziki na DJ Toxxyk giteganyijwe mu gitondo cyo ku wa 1 Mutarama 2023 aho abazakijyamo bazahabonera n’amafunguro ya mugitondo.

Davis D na Juno Kizigenza nabo bazatanga Ubunani i Burundi

Davis D na Juno Kizigenza batumiwe mu birori bya Happy People bizabera i Bujumbura ku wa 31 Ukuboza 2022.

Iki gitaramo gitegerejwe kubera ahitwa Zion Beach cyanatumiwemo abahanzi b’i Burundi barimo Alvin Smith na Drama T.

Kigali Count Down

Ibirori bya Kigali Count Down bigiye kongera kuba nyuma y’igihe bihagaritswe n’icyorezo cya Covid-19.

Ni ibirori kuri iyi nshuro bigiye kubera muri Hotel des mille collines aho abazabyitabira bazasusurutswa na DJ Shinski uri mu bakomeye muri Kenya.

Urutozi Challenge Dance Competition

Ku wa 30 Ukuboza 2022 hateguwe ibirori byo gusoza amarushanwa y’ababyinnyi yateguwe na Sosiyete ikora imyenda ya ‘Urutozi gakondo’.

Ibi birori bizabera kuri Rafiki Club aho kwinjira bizaba ari ubuntu bizacurangamo aba DJs batandukanye bazafasha Bushali watumiwe nk’umuhanzi w’umunsi.

Abakirisitu nabo batekerejweho

Abemera Imana batekerejweho muri ibi bihe byo kurangiza umwaka bategurirwa ibirori byo kurangiza umwaka baramya bakanahimbaza Imana.

Dr Paul Gitwaza Umuyobozi w’Itorero Zion Temple yateguye ijoro ryo kuramya no guhimbaza Imana rizambukiranya tariki 31 Ukuboza 2022 kugeza ku wa 1 Mutarama 2023.

Ni ijoro rizabera muri BK Arena aho abashakaga kujyayo basabwe kwiyandikisha bakabikisha imyanya, kuri ubu ndetse imyanya ikaba yaramaze gushira.

Ni mu gihe Apostle Mignone Kabera we ku wa 31 Ukuboza 2022 azaba ari kumwe n’abayoboke b’Itorero rye muri Kigali Convention Center.

Prophet Sultan Eric nawe yateguye umugoroba w’amasengesho azahuriza abayoboke be muri Camp Kigali mu ijoro ryo ku wa 31 Ukuboza 2022 akazageza tariki 1 Mutarama 2023.

Ibi bitaramo byose byo kuramya no guhimbaza Imana bihuriye ku kuba kubyinjiramo bidasaba kwishyura amafaranga ayo ariyo yose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .