Iri murika ryiswe ‘Fierce femme’ byitezwe ko rigomba kumara hafi amezi atatu kuko ryatangijwe ku wa 18 Mata 2024 rikaba rizasozwa ku wa 4 Nyakanga 2024.

Ibihangano biri kumurikwa ni ibyakozwe n’abanyabugeni b’Abanyarwandakazi barimo Kakizi Jemima, Cynthia Butare, Odile Uwera, Crista Uwase, Teta Chel na Miziguruka.

Kakizi Jemima wagize uruhare mu itegurwa ry’iri murikabikorwa afatanyije n’ikigo Gallery Brulhart, yavuze ko iri murika ari umwanya mwiza wo kwereka Isi uruhare rw’Umunyarwandakazi mu kubaka Igihugu nyuma y’imyaka 30 cyibohoye.

Ati “Abahanzi benshi bagiye bakora ku ngingo zitandukanye zigaragaza uruhare rw’umugore mu kubaka u Rwanda nyuma ya Jenoside yakorewe Abatutsi, ni ibihangano bigaragaza uko umugore abayeho mu Rwanda mu bice bitandukanye by’ubuzima bw’Igihugu.”

Uyu munyabugeni yavuze ko iri murikabikorwa ari iryo kwishimira uruhare rw’abagore mu kubaka u Rwanda mu nguni zose z’imibereho y’Igihugu, ashimira abamufashije bose barimo ababakiriye.

Ku rundi ruhande, Kakizi yishimiye bikomeye uko abantu bitabiriye igikorwa cyo gutangiza iri murika ry’ibihangano ndetse ahamya ko wari umwanya mwiza wo kubaganiriza uruhare rw’abagore mu rugendo rwo kongera kubaka u Rwanda nyuma y’imyaka 30 ishize u Rwanda rwibohoye.

Ati “Ni umwanya mwiza wo kuganiriza abanyamahanga amateka u Rwanda rwanyuzemo n’uko rwayigoboteye, kuri ubu rukaba rukataje mu iterambere ridasiba kugirwamo uruhare n’abagore.”

Iki gikorwa kigamije kugaragaza uruhare rw’abagore mu kubaka u Rwanda

Hari ababyeyi bari bajyanye abana babo kwihera ijisho ibihangano by'abanyabugeni b'Abanyarwandakazi

Mona Bruelhart wakoreye Umuryango w'Abibumbye mu Rwanda yahavanye urukundo rwatumye yakira abanyarwandakazi b'abanyabugeni mu Busuwisi

Mona Bruelhart, nyiri nzu y'ubugeni yifashishijwe mu imurika ry'ibi bihangano

Iri murikabikorwa ryatangiranye ubwitabire buri hejuru

Si Abanyarwanda gusa bitabiriye iri murikabikorwa

Mu gutangiza iri murikabikorwa ubwitabire bwari hejuru

Iri murikabikorwa rizarangira tariki 4 Nyakanga 2024

Kakizi Jemima na Butera Cynthia mu imurikabikorwa riri kubera mu Busuwisi