00:00:00 IGIHE NETWORK KN KINYARWANDA EN ENGLISH FR FRANCAIS

Twinjirane muri Weekend ya Noheli yiganjemo ibitaramo

Yanditswe na Nsengiyumva Emmy
Kuya 22 Ukuboza 2022 saa 02:05
Yasuwe :

Yaba mu mujyi wa Kigali, mu Ntara zitandukanye z’u Rwanda ndetse no hanze y’Igihugu, Abanyarwanda bakomeje imyiteguro y’umunsi mukuru wa Noheli, mu rwego rwo kurushaho kuryoherwa n’uyu munsi hakomeje gutegurwa ibitaramo bitandukanye.

Muri iyi nkuru tugiye kwibanda ku bitaramo n’ibirori bikomeje gutegurwa mu rwego rwo gushakira hamwe uko abantu bazaryoherwa na Noheli y’uyu mwaka.

Ni ibitaramo byiganjemo ibyo kuramya no guhimbaza Imana nubwo bitabujije ko n’abategura ibisanzwe nabo bakoze iyo bwabaga ngo barusheho gufasha abakunzi b’umuziki kuryoherwa n’umunsi mukuru wa Noheli.

Diamond Meet&Greet

Mu gihe Diamond ategerejwe i Kigali kuri uyu wa 22 Ukuboza 2022 mbere y’uko ataramira abakunzi be ku wa 23 Ukuboza 2022, uyu muhanzi yateguriwe igitaramo cyo gusabana n’abakunzi be mbere yo kubataramira.

Ni igitaramo byitezwe ko kibera ahitwa Romantic Garden ku Gisozi mu ijoro ryo ku wa 22 Ukuboza 2022 aho kwinjira biba ari ibihumbi 10Frw ku muntu umwe n’ibihumbi 200Frw ku meza y’abantu umunani.

Uretse Diamond uhagaragara, aha haracuranga abarimo DJ Sonia, DJ Phil Peter na DJ Pyfo mu gihe biteganyijwe ko umuhanzi Jay Pac ari we utaramira abitabira ibi birori.

Diamond agiye gutaramira i Kigali

Abahanzi batandatu bo mu Rwanda bashyizwe mu bazunganira Diamond Platnumz ku rubyiniro, mu gitaramo azakorera muri BK Arena ku wa 23 Ukuboza 2022.

Abahanzi Ariel Wayz, Bushali, Kivumbi King, Confy, Logan Joe na Jowest nibo bagiye guhurira ku rubyiniro na Diamond Platnumz uheruka gutaramira mu Rwanda mu 2019, ubwo yitabiraga isozwa ry’ibitaramo bya ’Iwacu Muzika Festival’.

Umuziki muri iki gitaramo kizaba ku wa 23 Ukuboza 2022 uzacurangwa na Nep Djs ndetse na Dj Pyfo.

Nasibu Abdul Juma Issack wubatse izina nka ’Diamond Platnumz ategerejwe mu gitaramo cye i Kigali cyiswe One People Concert, cyateguwa na East Gold Entertainment ku bufatanye na Skol.

Kugeza ubu ibiciro byo kwinjira muri iki gitaramo byamaze kujya hanze, bigaragaza ko itike ya make ari 5000 Frw gusa.

Ku bifuza kwicara mu myanya y’icyubahiro ya VVIP ni 30.000 Frw na 15,000 Frw muri VIP, hasi ahegereye urubyiniro ni 10,000Frw, naho ahasanzwe ni 5000 Frw.

Ku bazagurira amatike ku muryango ku munsi w’igitaramo, VVIP izaba ari 40,000 Frw, VIP ni 25,000 Frw, mu myanya yegereye urubyiniro ni 20,000 Frw, mu myanya isanzwe ni 15,000 Frw.

Umuhanzikazi Clemy agiye kumurika album ye ya mbere

Umuhanzikazi Clemy Umuhire ukorera umuziki we mu Karere ka Musanze yateguye igitaramo cyo kumurika album ye ya mbere yise ‘Umuana’ kizaba ku wa 23 Ukuboza 2022.

Ni album uyu muhanzikazi amaze igihe akoraho, akazayimurikira abanya Musanze ahitwa ‘Afro Bistro’ aho azafatanya n’abarimo Ben Adolphe, Maylo, Yampano n’abanyarwenya nka Mitsutsu, Dogiteri Nsabi.

Kwinjira muri iki gitaramo cyo kumurika iyi album bizaba ari ibihumbi 5Frw mu myanya isanzwe n’ibihumbi 10Frw mu myanya y’icyubahiro ku bari kugura amatike kare mu gihe abazagurira amatike ku muryango bo bazayagura ibihumbi 7Frw mu myanya isanzwe n’ibihumbi 15Frw mu myanya y’icyubahiro.

Abarimo Aimé Uwimana na René Patrick bahurijwe mu gitaramo cya Noheli

Abahanzi batanu b’indirimbo zo kuramya no guhimbaza Imana barangajwe imbere na Aimé Uwimana wamamaye mu ndirimbo zirimo ‘Muririmbire Uwiteka’ bategerejwe mu giterane cyiswe “Christmas Thanksgiving Worship’ kizafasha Abaturarwanda gushimira Imana yabarinze muri uyu mwaka wa 2022 uri kugana ku musozo.

Iki giterane kizaba ku wa 23 Ukuboza 2022 guhera Saa Kumi n’Imwe z’Umugoroba kuri Radisson Blu&Kigali Convention Center, aho kwinjira ari ubuntu.

James na Daniella bari kubarizwa i Bujumbura

James na Daniella bamaze kugira izina rikomeye mu muziki wo kuramya no guhimbaza Imana bategerejwe i Bujumbura mu gitaramo cyo kuramya no guhimbaza Imana kizaba ku wa 23 Ukuboza 2022.

Aba bahanzi bamaze no kugera mu Mujyi wa Bujumbura, bategerejweho gususurutsa no gusangira Noheli n’abakunzi b’umuziki wabo mu gitaramo kizabera ahitwa Jardin Public.

Kwinjira mu gitaramo cya James na Daniella bizaba ari ibihumbi 10FBu ku muntu umwe.

Abahanzi bakanyujijeho bagiye gutaramira i Musanze

Abahanzi bakanyujijeho mu muziki wo ha mbere bagiye gutaramira i Musanze mu gitaramo cyateguwe n’ihuriro ryabo ‘Vanginganzo’.

Iki gitaramo kizahuza Orchestre Imanzi, Orchestre Impala, Makanyaga Abdoul n’abandi benshi kizabera ahitwa ‘Classic Resort Lodge’ i Nyakinama ku wa 23 Ukuboza 2022.

Bitewe n’uko ari igitaramo kizabera mu Ntara, abazakitabira baturutse i Kigali basabwe kwishyura ibihumbi 35Frw, akubiyemo itike yo kubinjiza, imodoka ibatwara ikazanabacyura, icumbi ndetse n’ibyo kurya.

Dorcas & Vestine bagiye kumurika album yabo ya mbere

Ku wa 24 Ukuboza 2022 abakunzi b’umuziki wo kuramya no guhimbaza Imana bategerezanyije amatsiko igitaramo cyo kumurika album ya mbere y’abahanzikazi Dorcas&Vestine.

Iki gitaramo gitegerejwe kubera muri Camp Kigali cyanatumiwemo kandi abahanzi Prosper Nkomezi na Gisubizo Ministries.

Kwinjira muri iki gitaramo bizaba ari ibihumbi 10Frw mu myanya isanzwe, ibihumbi 15Frw muri VIP n’ibihumbi 20Frw muri VVIP.

Park Inn yatekereje ku bana

Hoteli yitwa Park Inn by Radisson iri mu zikomeye ziri kubarizwa mu Mujyi wa Kigali yatekereje ku bana ibategurira ibirori byo kubafasha kuryoherwa n’umunsi mukuru wa Noheli.

Ibi birori byiswe ‘Kid’s special Christmas Edition’ biteganyijwe ku wa 24 Ukuboza 2022.

Ibi birori biteganyijwe ku manywa y’uyu munsi umwana ushaka kubyitabira azasabwa kwishyura ibihumbi 20Frw.

Social Mula na DJ Brianne bazataramira mu Bubiligi

Social Mula na DJ Brianne bamaze igihe mu Bubiligi bategerejwe mu gitaramo kizabera mu bwato ku wa 24 Ukuboza 2022.

Iki gitaramo gitegerejwe i Bruxelles mu Bubiligi kucyitabira birasaba abatuye i Burayi kwishyura amayero 25 mu myanya isanzwe n’amayero 30 mu myanya y’icyubahiro.

DJ Alisha agiye gutaramira i Kigali

Iki gitaramo kizabera Boogaloo ku wa 24 Ukuboza mu 2022 kizagaragaramo Dj Alisha ukomoka mu Rwanda ariko akaba ari mu bamaze kubaka izina i Kampala aho akorera.

DJ Alisha ni umwe mu bakobwa bagezweho muri Uganda aho akunze kwiyambazwa mu bitaramo bikomeye acurangira abahanzi bagezweho baba batumiwe muri iki gihugu.

Muri iki gitaramo, DJ Alisha azafatanya n’abarimo DJ Marnaud, DJ Tyga, DJ Karim, DJ Max n’itsinda rya DJ Higa na DJ Rusam.

Bissoso agiye guhuriza ibyamamare i Musanze

DJ Bissosso uri mu bamaze igihe mu mwuga wo kuvanga imiziki, yinjiye mu mwuga wo gutegura ibitaramo abinyujije muri sosiyete yise ’Bissosso Ent.’, akaba agiye guhera ku bizabera mu turere twa Rubavu na Musanze.

Muri iki gihe cya Noheli, DJ Bissoso yateguye igitaramo kizasusurutsa abakunzi b’umuziki mu Karere ka Musanze ku wa 25 Ukuboza 2022.

Ku wa 25 Ukuboza 2022 nibwo abahanzi batumiwe na DJ Bissosso bazaba bataramira mu Karere ka Musanze ahitwa ‘Musanze Goica Plaza Road’.

Aha hakazataramira abahanzi barimo; Platini, Bushali, Mistaek, Chris Eazy, Papa Cyangwe na Ben Adolphe.

Ni ibirori bizayoborwa na DJ Bissosso, VJ Mupenzi, DJ Ira na DJ Sonia bafatanyije na MC Tino uzaba afatanya na MC Gitego, kwinjira bikaba ari 3000Frw mu myanya isanzwe na 5000Frw mu myanya y’icyubahiro, buri wese agahabwa ibyo kunywa bibiri.

Israel Mbonyi azaba asusurutsa abakunzi b’umuziki we

Mu kiganiro yagiranye n’abanyamakuru, umuramyi Mbonyicyambu Israël [Israel Mbonyi] yavuze ko nyuma y’imyaka itanu, afite ishimwe ry’uko agiye kongera guhembura imitima y’abakunzi b’umuziki wo kuramya no guhimbaza Imana.

Ni igitaramo giteganyijwe kubera muri BK Arena ku Cyumweru tariki 25 Ukuboza 2022, Israel Mbonyi azamurika album ebyiri zirimo iyitwa "Mbwira" na "Icyambu".

Kwinjira mu gitaramo cya Israel Mbonyi bizaba ari 5000Frw mu myanya isanzwe, ibihumbi 10Frw, ibihumbi 15Frw n’ibihumbi 20Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .