Umwanditsi wa Bibiliya mu Gitabo cya Matayo 2:1-2, agaragaza ko Yesu amaze kuvukira i Betelehemu mu gihugu cy’i Yudaya ku ngoma y’Umwami Herode, haje abanyabwenge baturutse iburasirazuba bajya i Yerusalemu, barabaza bati ‘Umwami w’Abayuda wavutse ari hehe?. Bati " Ko twabonye inyenyeri ye turi iburasirazuba, none tukaba tuje kumuramya’."

Aya magambo aganisha ku kwerekana ko Yesu yavukiye i Bethlehem! Iki ni nacyo gihesha uyu mujyi kuba uri ku isonga mu isura cyane n’abemeramana bizera ko ari wo Umukiza wabo yatangiriyemo urugendo rwe ku Isi.

Bethlehem ni Umujyi wo muri Palestine uherereye mu bilometero 10 mu Majyepfo ya Yeruzalemu! Ni hamwe mu hakurura ba mukerarugendo benshi baturutse imihanda yose y’Isi bashaka kugera ku butaka Umwami Yesu yanyuzeho mu buto bwe.

Ubusanzwe, Bethlehem mu Giheburayo yitwa ‘Beit Lechem’, bisobanuye ‘Inzu y’Imigati’ [House of Bread]. Imibare yo mu 2017 yerekana ko uyu mujyi wari utuwe n’abaturage 28.591.

Ni umujyi ubarizwamo abaturage bafite imyemerere itandukanye barimo Abaporotesitanti n’Abayisilamu. Muri iki gihe ukunze guteza urunturuntu hagati ya Israel na Palestine.

Ku barokore batemberera i Bethlehem bizihirwa no gusura urusengero rwubatswe aho Yesu yavukiye ruzwi nka “Church of the Nativity”. Mu buvumo bwarwo ni ho Mariya yabyariye Umwana woherejwe gucungura Isi.

Bethlehem kandi irimo imva ya Rachel, umugore wa Yakobo, uyu yari umwuzukuru wa Aburahamu, uwo abemeramana bafata nka sogokuruza mu byo kwizera.

Bibiliya ivuga ko Rachel yashyinguwe mu nzira ijya muri Efurata, ni ho Bethlehem. Aho ashyinguye ni agace gasurwa cyane ndetse Abayudakazi n’Abayisilamukazi bagasura bihoraho basengera gutwita no kubyara neza.

Bethlehem ni umujyi ukiri kwiyubaka

Mu minsi ishize natembereye muri Israel, igihugu gifite amateka akomeye by’umwihariko yiganjemo ayo muri Bibiliya.

Ni urugendo rw’icyumweru nakoranye n’abo twajyanye muri ’Twende Jerusalem’, gahunda igamije gufasha Abanyarwanda gusura iki gihugu, yateguwe n’Ikigo cya Go Tell gifatanyije na Ambasade ya Israel mu Rwanda.

Ntabwo ushobora kugera muri Israel ngo urinde ugaruka i Kigali udasuye uduce tumwe na tumwe turi muri Palestine nka Bethlehem n’Umujyi wa Yeriko iri mu ifite amazina akomeye.

Nerekeza i Bethlehem nari nkubutse i Yeruzalemu ho muri Israel, urugendo byibuze rw’isaha mu modoka yihuta itigeze igira ikiyihagarika mu nzira.

Yaba i Yeruzalemu n’i Bethlehem ni abantu bubaha cyane isabato, kujyayo mu minsi ya nyuma y’icyumweru bituma usanga byinshi mu bikorwa byahagaze abantu baruhutse ndetse abandi bari mu masengesho.

Mu marembo y’i Bethlehem uvuye i Yeruzalemu uhasanga bariyeri iriho ingabo n’abapolisi ba Palestine babanza kugenzura ko wemerewe kwinjira mu gihugu cyabo. Iyo wubuye amaso imbere yawe ubona umujyi wiganjemo inzu zerekana amateka y’imyubakire yo hambere igizwe n’amabuye n’ibisigazwa by’ibitare.

Ibi biterwa n’amakimbirane Palestine ifitanye na Israel atuma nta Munya-Israel wemerewe kuyinjiramo ndetse nta n’Umunya-Palestine wakwinjira muri Israel.

Icyakora ba mukerarugendo bavuye mu bihugu byombi n’ababayobora baba bemerewe kugenda nta nkomyi.

Bitandukanye na Yeruzalumu ukubutsemo, ukinjira i Bethlehem utangira kubona umujyi uri kwiyubaka ugerageza gutera imbere ndetse ubona ko wazonzwe n’ibibazo bitandukanye.

Uwari unyoboye mu rugendo rwanjye, yansobanuriye ko gutera imbere k’uyu mujyi kwazonzwe n’intambara z’urudaca zikunze kuwubamo.

Ni umujyi muto unatuwe n’abaturage bake, mu myaka itanu bakabakabaga ibihumbi 28. Ukiwinjiramo, iyo abawutuye bakubonyemo mukerarugendo baza birukankana ibikapu, ingofero, imyenda n’indi mitako iriho amazina y’ahantu h’amateka ya Bibiliya.

Ibi baba babicuruza ku giciro kitari hasi, kimwe n’indi mijyi yaba iyo muri Israel no muri Palestine. Ibicuruzwa byaho biba byihagazeho ugereranyije n’uko ibintu bihagaze muri iyi Afurika yacu.

Icyakora hari abajya kure bagahamya ko biterwa n’uko ibicuruzwa byaho biba biri ku rwego rwo hejuru mu gukomera.

Bethlehem ni Umujyi winjiramo ugahita wibwira ko ari uw’abakirisitu bitewe n’amafoto ndetse n’ibibumbano byashyizwe ku muhanda biri kugurishwa. Icyakora ku rundi ruhande wiganjemo n’Abayisilamu kuko bawubatsemo imisigiti myinshi kandi minini.

Urugendo rw’iminota nk’icumi uvuye aho nakwita mu Mujyi hagati, ni rwo ukora kugira ngo ugere ku rusengero rwiswe "urw’Amavuko" [Church of Nativity], uru rukaba rwubatse aho bivugwa ko Yesu Kirisitu yavukiye.

Ukigera kuri uru rusengero uhasanga ba mukerarugendo benshi bagiye kwiragiriza Uwiteka muri ako gace.

Ni inyubako nini kandi iri ku rwego rwo hejuru, icyakora uyigezemo imbere usanga umubare muto w’abiragiza Uwiteka mu gihe abandi benshi baba bayizenguruka basobanurirwa amateka yayo.

Usibye kuba ari Umujyi ukurura ba mukerarugendo, Bethlehem ikorerwamo ubucuruzi bw’ibyo kurya n’ubushabitsi bwiganjemo ubwo gucuruza imitako ifite aho ihuriye n’ukwemera kw’abakirisitu.

Ku mihanda yerekeza i Bethlehem uhasanga ibyapa bikuyobora muri urwo rugendo

Uri gusatira Umujyi wa Bethlehem, urujya n'uruza ntabwo ruba ari rwinshi bitewe n'uko nta Munya-Israel wemerewe kuhinjira

Ukimara kwinjira i Bethlehem Umujyi uba uwureba imbere yawe

Umuhanda ugana mu mujyi rwagati wa Bethlehem wubatse mu buryo bugezweho

I Bethlehem hagati haba hari urujya n'uruza rw'abantu

Imineke n'ibindi biribwa biba bicuruzwa ku muhanda

Nubwo utawugereranya na Yeruzalemu ariko Bethlehem na wo ni umujyi wihagazeho

Muri uyu mujyi si henshi wabona utubari ducuruza inzoga, gusa navuyeyo ndabutswe ahari utwapa twa Amstel

Ni umujyi w'amahoteli yiganjemo adahanitse cyane

Uburyo bwo kohererezanya amafaranga burashoboka muri Bethlehem

Aha naho agacupa karahasomerwa, naje kumenya ko Amstel ari imwe mu nzoga zikundwa cyane i Bethlehem

Reka nikomereze njye gushaka aho umwami Yesu Kirisitu yavukiye

Bigusaba urugendo rw'iminota nk'icumi werekeza aho uru rusengero ruri

Coca Cola nayo ni kimwe mu binyobwa byamamazwa cyane mu Mujyi wa Bethlehem

Naho iyo byanze barazipakira...

Bethlehem umujyi w'amateka akomeye ya Yesu Kirisitu

Udafite ugusemurira kwivana muri Bethlehem byagorana kuko abenshi ntabwo bazi Icyongereza

Hoteli yitiriwe Bethlehem ni imwe mu zikomeye muri uyu mujyi

Bethlehem yiganjemo amahoteli kubera ba mukerarugendo badasiba kuyitemberamo

Aho bacururiza ibitabo by'iyobokamana bigaruka ku mateka baba basobanurirwa

Mu mujyi rwagati, iyo wahageze, Umujyi wa Bethlehem uba wawutashye

Ni umujyi wiganjemo inyubako ndende

Abafana b'amakipe atandukanye baba bari kwamamaza ayo bakunda ku muhanda

Ni umujyi uteyemo ibiti bituma haba hari akayaga ku bawutembera n'abawutuye

Usatira kuri rusengero rw'amavuko ya Yesu Kirisitu

Aha isuku ni yose no ku muhanda

Aha uba utangiye kubona ibimenyetso by'uko urusengero rw'amavuko uri kurusatira

Hakurya aha hubatse inzu nyinshi zagenewe guturwamo

Ku muhanda ugenda uhura n'utubendera tukwereka ko wageze muri Palestine

Urusengero rw'amavuko rw'i Bethlehem rwubatse ahantu ku musozi, rukikijwe n'inzu nyinshi

Mu marembo y'i Bethlehem hasa neza

Urusengero rw'amavuko, aha ni ho bivugwa ko Mariya yabyariye Yesu Kirisitu

Icyicaro cy'Ikigo cy'Amahoro cy'i Bethlehem kiri muri iyi nyubako

Ba mukerarugendo baba ari benshi muri aka gace

Imbere mu rusengero rw'amavuko, aho bivugwa ko Yesu Kirisitu yavukiye ni uku hasa

Buri wese aba yifuza kuhafatira agafoto k'urwibutso, itsinda ryari ryitabiriye urugendo 'Twende Jerusalem' naryo ntabwo ryaviriyemo aho

Gutaha, Tax ziba ari nyinshi ku muhanda

Bethlehem ni umujyi w'ubushabitsi. Ubucuruzi bukorwa amanywa n'ijoro

Ibiti bituma haboneka akayaga byatewe ku bwinshi i Bethlehem

Bethlehem ni Umujyi urimo imidugudu igezweho yo guturamo

Isuku ntirangwa hose mu Mujyi wa Bethlehem, biterwa n'agace

Ibikorwaremezo bisenywa umunsi ku wundi n'intambara z'urudaca zirangwa muri iki gihugu

Mu Mujyi wa Bethlehem hubatswe ibibumbano bifite amateka yihariye

Mu gutaha nabwo urujya n'uruza ntabwo rwari rwinshi kuko nta Munya-Palestine wemerewe kujya muri Israel gutyo gusa

Aberekeza muri Israel bavuye muri Palestine barabarika bitewe n'impamvu zikomeye zirimo n'umutekano wabo

Agace gasohoka i Bethlehem kerekeza i Yeruzalemu

Umutekano uba wakajijwe, buri wese abazwa ikimuvanye i Bethlehem n'ikimujyanye i Yeruzalemu

Ubwo nahatembereraga, urujya n'uruza ku mupaka ntirwari rwinshi

Amafoto: Nsengiyumva Emmy