Abinyujije ku mbuga nkoranyambaga mu butumwa atamajijeho umwanya munini kuko yahise abusiba, yibukije ADEPR ko batinze kwandika ibaruwa isaba ko ibikorwa bye byahagarikwa kuko yasohotse ari kubisoza.

Iyi baruwa ADEPR Paruwasi ya Tyazo yayandikiye umuyobozi wa Guest House Ltd ikodesha inyubako Turahirwa Moses yamurikiragamo imyenda ye yise “Ituro” kuva ku wa 13-15 Werurwe 2025.

Muri iyi baruwa yanditswe ku wa 15 Werurwe 2025, ubuyobozi bwa ADEPR bwibukije ubuyobozi bwa Guest House Ltd ko bagomba guhagarika ibikorwa byo kumurikira imyenda ya ‘Moshions’ mu nyubako yabo kuko ibyaberagamo binyuranyije n’imyemerere y’Itorero.

Bimwe mu byo batemeraga nkuko bigaragara mu ibaruwa ADEPR yandikiye abakodesheje iyi nyubako harimo gukoresha ibirango by’Itorero ibyo bitagenewe, bavuze kandi ko ibyaberagamo bihungabanya abakirisitu kandi aribo bashinzwe kureberera no guhindura icyumba cyamurikirwagamo iyi myenda uko batagisanze kandi nta burenganzira babifitiye.

ADEPR yasabaga ko ibi bikorwa bihagarikwa bitarenze saa kumi n’imwe z’umugoroba mu gihe nubundi wari umunsi wa nyuma w’iri murika ryahereye mu Karere ka Nyamasheke mbere y’uko Turahirwa Moses abikomereza hanze y’u Rwanda.

Byitezwe ko iri murika azarikomereza mu Bushinwa, i Kampala ndetse no muri Leta Zunze Ubumwe za Amerika ari naho azasoreza iri murika.

ADEPR yari yasabye ko ibikorwa byo kumurika imyenda ya Moshions bihagarikwa

Imyenda ya Moshions yamurikirwaga mu nyubako ya ADEPR

Ubuyobozi bwa ADEPR bwavuze ko iyi nzu yahinduwe mu buryo batemeranyijweho

Moshions yahereye i Nyamasheke gahunda zo kumurika imyenda ye