Tom Close yagizwe umuyobozi w’akanama nkemurampaka muri Miss Career Africa 2019

Yanditswe na Uwiduhaye Theos
Kuya 8 Ukuboza 2019 saa 12:32
Yasuwe :
0 0

Muyombo Thomas[Tom Close] uri mu bahanzi bafite izina rikomeye mu Rwanda, yashyizwe mu kanama nkemurampaka ka Miss Career Africa igiye kubera mu Rwanda ku nshuro ya mbere.

Tom Close niwe wenyine uri mu bazaba bagize akanama nkemurampaka k’iri rushanwa wamaze gutangazwa ariko hari n’abandi bazamenyekana mu minsi iri imbere.

Uretse uyu muhanzi, na Bruce Melodie yatangajwe nk’umuhanzi uzasusurutsa abazaba bitabiriye iki gikorwa cyo gutoranya Miss Career Africa, kizabera muri Kigali Conference and Exhibition Village[Camp Kigali].

Kwinjira bizaba ari 3 000 frw ku banyeshuri ,5 000 frw ahasanzwe , 10 000 frw na 30 000 frw mu myanya y’icyubahiro, ndetse na 200 000 frw ku meza y’abantu umunani.

Abakobwa 30 bagomba kujya mu mwiherero wa Miss Career Africa 2019 baherutse gutangazwa barimo abanyarwandakazi 22.

Icyo gihe, Frank Rubaduka uri mu bategura iri rushanwa yabwiye IGIHE ko impamvu abanyarwanda batoranyijwe ari benshi ari uko mu Rwanda ariho irushanwa rizabera.

Abatoranyijwe barimo umunya-Sudan y’Epfo umwe, umunya-Kenya umwe, uwo muri RDC umwe, abarundikazi bane, umunya-Uganda umwe ndetse n’abanyarwandakazi 22.

Abakobwa batoranyijwe bo mu Rwanda ni Mukamwiza Yvette, Musemakweri Delphine, Iradukunda Faustine, Uwihirwe Roselyne, Uwingeneye Frida, Ishimwe Gaella, Mpano Umuhumuriza Yvonne, Rutayisire Alice Lambert, Umulisa Rose Mary , Mahoro Mirreille Chadia, Umutoni Grace, Uwinema Diana, Umulisa Solange na Manzi Muneza Assoumer Redempta.

Harimo kandi Munsabe Sheillah, Ruzindana Wendy Ornella, Mutesi Celine, Mazimpaka Christella, Uwimana Martine, Umutoni Ange, Igihozo Mireille na Uwizeye Jeannette.

Harimo abo mu Burundi nka Munezero Ornella, Kundusenge Ritha Marie Ange, Habonimana Hyacinthe na Nivyumuremyi Emmanuella.

Uwo muri Uganda ni Baluubu Jaliyah, Fundiko Elysee wo muri RDC, Otieno Josephine wo muri Kenya na Mona Ibrahim wa Sudani y’Epfo.

Umwiherero w’iri rushanwa uzatangira ku 10 Ukuboza usozwe ku wa 13 Ukuboza ari nabwo hazatangwa ikamba nyir’izina rya Miss Career Africa 2019 muri Afurika y’Iburasirazuba. Umwiherero uzabera ahitwa ku Mbuto z’Amahoro kuri Muhazi mu Karere ka Kayonza.

Abakobwa bose bazajya mu mwiherero bazahabwa amahugurwa banafashwe mu mishinga.

Umukobwa uzahiga abandi azahembwa $5 000 ndetse anafashwe mu gushyira mu ngiro umushinga we anagire umushahara wa buri kwezi. Azanishyurirwa kaminuza.

Hazatangwa andi makamba arimo Miss Speaker, Miss Technology, Miss Hospitality, Miss Science, Miss Talent na Miss Art.

Aba bazaba bafite amahitamo abiri arimo guhabwa amafaranga yo gushora mu mishinga yabo bazerekana muri iri rushanwa cyangwa se basabe kujya kwiga muri imwe muri Kaminuza ibarizwa muri Afurika.

Irushanwa ntabwo rizabera mu Rwanda gusa, kuko rizakomereza mu bihugu byo mu Burengerazuba bw’Afurika guhera ku wa 30 Ugushyingo 2019 kugera ku wa 30 Ukuboza 2019, aho rizabera muri Nigeria.

Mu bihugu byo hagati muri Afurika iri rushanwa rizabera muri Angola. Abakobwa bazatangira kwiyandikisha guhera kuwa 03 Werurwe 2020; ikamba ritangwe kuwa 04 Mata 2020 nyuma abazaba bahagarariye abandi mu turere ibihugu byabo birimo bazahurira hamwe hatoranywe uhiga abandi ku rwego rwa Afurika.

Tom Close Tom yashyizwe mu kanama nkemurampaka ka Miss Career Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza