TMC agiye gutangiza uruhererekane rw’ibiganiro bikubiyemo ubuhamya bw’ubuzima bw’ibyaha yanyuzemo

Yanditswe na Nsengiyumva Emmy
Kuya 27 Gashyantare 2021 saa 02:33
Yasuwe :
0 0

Mujyanama Claude benshi bazi nka TMC ni umwe mu byamamare mu muziki nyarwanda wamenyekanye mu itsinda rya Dream Boys, yatunguranye atangaza ko agiye gutangiza uruhererekane rw’ibiganiro bikubiyemo ubuhamya bw’ubuzima bw’ibyaha yanyuzemo.

Uyu muhanzi waciye amarenga ko yakiriye agakiza, ahamya ko hari imyaka myinshi yamaze yivuruguta mu byaha, ku buryo yafashe icyemezo cyo kwitangaho ubuhamya mu rwego rwo kugira bamwe yarokora akabahindurira inzira y’ubuzima.

Mu butumwa yanyujije kuri Instagram ye yagize ati “Ubundi sinkunze gukora ibiganiro nk’ibi, ariko hari impamvu idasanzwe, bizanakomeza kugeza igihe nzumva ko icyo nshaka kuganira n’abantu kigeze aho nifuza.”

Mu gace ka mbere k’ibi biganiro TMC yasohoye, yahishuye ko yavukiye muri Repubulika Iharanira Demokarasi ya Congo aza gutaha mu Rwanda nyuma ya Jenoside yakorewe Abatutsi mu 1994 ubwo we yari afite imyaka itandatu.

Mu Rwanda ahamya ko yahagiriye umugisha mwinshi kuko yahigiye amashuri ye kugeza mu cyiciro cya gatatu cya Kaminuza anahabera icyamamare mu muziki mu yari amazemo imyaka 11.

Nubwo ariko hari ibyiza Imana yamukoreye, yemeza ko hari ibyo atari akwiye. Ati “Nk’uko nabibabwiye, mu buzima bwanjye nagiye mpura n’ubuntu bw’Imana kandi nk’uko Bibiliya ibivuga, igushiriza imvura ababi n’abeza, nanjye yangezeho ntari mwiza.”

Uyu muhanzi yavuze ko yanyuze mu buzima bugoye bw’ubwamamare aca amarenga y’ibishuko yashowemo n’ibyo bihe. Icyakora ashimira Imana yamugiriye ubuntu ikamurinda.

Ati “Imana yangiriye ubuntu, hari aho umuntu agera akumva ari mu mudendezo wo kuba mu cyaha, nshima Imana ko numvise ijwi ryayo, nagiriwe ubuntu bwo kumenya ukuri kandi umenye ukuri kuramubatura.”

TMC avuga ko muri ibi biganiro azibanda ku buzima bwe, urugendo rwe mu muziki no mu buzima busanzwe.

Ati “Tuzaganira ku buzima bwanjye, urugendo nabayemo n’ibyo nakoze byose. Nzagenda mbabwira uko Imana yagiye ihaba […] imbabazi n’imbaraga zayo. Uko ishobora kugukura mu bubata bw’ibyaha runaka ukaba undi muntu.”

Muri iki kiganiro, TMC yavuze ko ari naho abamukurikira bazamenyera umujyo agiye kwerekezamo umuziki we.

TMC yavuye mu Rwanda mu ntangiriro z’umwaka ushize wa 2020 arangije Icyiciro cya gatatu cya Kaminuza mu byo gucunga no kugenzura imishinga.

Ageze muri Amerika yakomeje kwiga ‘Data Sciences’ muri Eastern University iherereye muri Leta ya Pennsylvania.

Reba indirimbo y’Imana TMC yaherukaga gusohora mbere y’uko ava mu Rwanda

TMC asigaye atuye muri Leta Zunze Ubumwe za Amerika aho yagiye gukomereza amasomo / ifoto: Instagram -TMC Dreamboys
TMC yavuye mu Rwanda arangije Icyiciro cya gatatu cya Kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .