00:00:00 IGIHE NETWORK KN KINYARWANDA EN ENGLISH FR FRANCAIS

Hazaca uwambaye mu cyiciro cy’abagabo mu marushanwa ya The Choice Awards

Yanditswe na Nsengiyumva Emmy
Kuya 20 Mutarama 2021 saa 08:40
Yasuwe :
0 0

ISIBO TV ibinyujije mu kiganiro cy’imyidagaduro cyitwa ‘The Choice’ gikorwa na Phil Peter, M. Irene na Moses Iradukunda yatangiye gutegura ibihembo ngarukamwaka yise ‘The Choice Awards’ igamije gushimira abateje imbere uruganda rw’imyidagaduro.

Abahatanira ibi bihembo bashyizwe mu byiciro bitandukanye, mu rwego rwo kurebera hamwe uko abahatana bitwaye mu mwaka wa 2020 ari nawo uzareberwaho ibikorwa.

Mu cyiciro cy’Umuhanzi w’umugabo w’umwaka tugiye kwibandaho muri iyi nkuru hari guhatana Bruce Melodie, Davis D, Israel Mbonyi, Mico The Best na Platini P. Aba bose bahuriye ku kuba barakoze cyane, igisigaye ni uko hazaca uwambaye naho ibikorwa bya buri umwe birivugira.

Mbere yo kureba ibikorwa bya buri muhanzi uri muri iki cyiciro, Israel Mbonyi, Bruce Melodie na Mico The Best nibo barusha abandi amahirwe yo kwegukana iki gihembo.

Bruce Melodie

Uyu muhanzi ni umwe muri bake bashyize imbaraga mu muziki mu mwaka wari ugoye wa 2020 bitewe nuko aribwo hahise haduka icyorezo cya Covid-19.

Bruce Melodie wari usoje umwaka wa 2019 asohoye indirimbo ‘Fresh’ ahagaze neza, yinjiranye imbaraga mu mwaka wa 2020.

‘Henzapu’ niyo ndirimbo ya mbere Bruce Melodie yakoze mu mwaka wa 2020, yakurikijeho ‘Saa moya’, yaririmbye muri ‘Mahwi’ yakoranye n’umuhanzikazi Meek Rowland usanzwe atuye muri Leta Zunze Ubumwe za Amerika.

Bruce Melodie yakoze kandi ‘Abu Dhabi’ asoreza umwaka ku ‘Ikinyafu’ yakoranye na Kenny Sol, mu mpera za 2020 ihita inakundwa bikomeye.

Uyu muhanzi yatowe nk’umuhanzi w’umwaka mu Isango na Muzika Awards ndetse anegukana igihembo cy’umuhanzi mwiza witwaye neza mu mpeshyi ya 2020.

Ni umwe mu bahanzi bahabwa amahirwe bikomeye muri iki cyiciro nkuko n’ubusanzwe yagiye atorwa nk’umuhanzi w’umwaka.

Davis D

Davis D yatangiye umwaka wa 2020 afite gaunda yo kumurika Album ye ya mbere yise Afro killa. Ibi byatumye yanga kwitabira ibitaramo bitandukanye byacaga kuri Internet ubwo Covid-19 yadukaga.

Uyu muhanzi yashyize imbaraga mu gusohora indirimbo azamura urwego rw’ibihangano bye.

Uyu musore wasoje umwaka wa 2019 afite Dede yari iri mu zigezweho, yinjiye muri 2020 akorana indirimbo ‘Like you’ n’abandi bahanzi nka Seyn na Kevin Kade bakoranaga mu nzu ifasha abahanzi ya Incredible Records.

Davis D yaje gusohora indi ndirimbo yise ‘Micro’ imwe mu zafashije uyu muhanzi guhangwa amaso mu mwaka ushize. Nyuma yaho yakurikijeho indirimbo ‘Ifarasi’ nayo yakunzwe cyane. Umwaka wa 2020 Davis D yawusoje asohora iyitwa ‘Bon’ yafatiye amashusho yayo i Dubai.

Uyu wari umwe mu bahanzi bato batangiye kugaragaza amashagaga mu muziki, kuba ari guhatana n’ibi bigugu bitanu kubwe biranahagije kwegukana igihembo byo byaba ari ugutungurana.

Israel Mbonyi

Israel Mbonyi niwe muhanzi w’indirimbo zo kuramya no guhimbaza Imana uri mu cyiciro gihatanira igihembo cy’uwitwaye neza mu mwaka wa 2020.

Uyu musore mu mwaka ushize yasohoye album ye nshya yise ‘mbwira’ iriho indirimbo nyinshi zakunzwe zirimo Mbwira, Karame, Intashyo, Number one, Yankuyeho urubanza, Indahiro, Sinzibagirwa, Hari ubuzima, Nzi ibyo nibwira.

Ni umwaka Israel Mbonyi yegukanyemo igihembo cya Maranatha Awards, anatumirwa mu bitaramo bikomeye byateguwe byo gususurutsa abari muri gahunda ya Guma mu rugo hirindwa ikwirakwira rya Covid-19.

Nk’umuhanzi rukumbi w’indirimbo zo kuramya no guhimbaza Imana wakoze cyane mu mwaka wa 2020 akaba n’umwe mu bakunzwe cyane, ari mu bahabwa amahirwe akomeye yo kwegukana iki gihembo.

Platini

Umwaka wa 2020 wari uw’impinduramatwara ku muziki wa Nemeye Platini wari ukimara kuva mu itsinda rya Dream Boys atangiye gukora ku giti cye.

Uyu muhanzi watangiranye ingufu urugendo rwe rushya, yasoje 2019 asohoye indirimbo ‘Ya motema’ yakoranye na Nel Ngabo, isa n’imutangije urugendo rwe rushya.

Umwaka wa 2020, Platini yakoze indirimbo zakunzwe ahereye ku yitwa Fata Amano yakoranye na Safi Madiba. Nyuma y’iyi ndirimbo yakurikijeho iyo yise ‘Veronika’, asohora Ntabirenze yakoranye na Butera Knowless, asoreza kuyo yise Atansiyo yafatiye amashushusho i Dubai.

Wari umwaka ugoranye kuri Platini ariko yawugaragajemo imbaraga nyinshi, byatumye atumirwa mu bitaramo bikomeye byagiye bibera ku mbuga nkoranyambaga.

Usibye The Choice Awards, Platini yagiye agaragara ku rutonde rw’abitwaye neza mu mwaka ushize.Nk’umuhanzi mushya, kuba amaze umwaka ahatanira ibihembo by’abitwaye neza birahagije, kwegukana igihembo byaba ari ugutungurana gukomeye.

Mico The Best

Nyuma y’imyaka itari mike agerageza uko ashoboye mu muziki w’u Rwanda, umwaka wa 2020 wamubereye mwiza. Ni umwaka uyu muhanzi yagaragaje imbaraga nyinshi mu gukora asohora indirimbo nyinshi zakunzwe.

Uyu muhanzi wasohoye indirimbo ‘Igare’ igakundwa cyane, yaramuherekeje kugeza mu mpera z’umwaka ubwo yasohoraga iyitwa ‘Umunamba’.

Umwaka wa 2020, Mico The Best yawugiriyemo umugisha kuko yegukanye ibihembo bibiri birimo Kiss Summer Awards na Isango na Muzika Awards aho indirimbo ‘Igare’ yahembwaga nk’iyakunzwe muri uri uwo mwaka.

Abahatana mu byiciro bitandukanye bya The Choice Awards

Abashyizwe muri ibi byiciro ni abakoze bakagaragaza imbaraga nyinshi kuva muri Mutarama kugeza mu Ukuboza 2020. Bashyizwe mu byiciro 10. Amatora ari gukorerwa ku rubuga rwa internet www.thechoicelive.com. Abazahiga abandi bazahabwa ibihembo bidaherekejwe n’amafaranga ariko nayo ashobora kuzajya atangwa mu minsi iri imbere.

Mu cyiciro cy’Umuhanzi w’Umwaka harimo Bruce Melodie, Davis D, Israel Mbonyi, Mico The Best na Platini P. Mu cyiciro cy’Umuhanzikazi w’Umwaka harimo Aline Gahongayire, Alyn Sano, Clarisse Karasira, Knowless Butera na Marina.

Mu cyiciro cy’Umukinnyi wa Filime w’Umugabo w’Umwaka harimo Benimana Ramadhan [Bamenya], Mugisha Clapton [Kibonge], Ndayizeye Emmanuel [Nick Dimpoz], Niyitegeka Gratien [Seburikoko] na Uwihoreye Jean Bosco Mustapha [Ndimbati].

Mu cyiciro cy’Umukinnyi wa Filime w’Umugore w’Umwaka harimo Ingabire Pasclaine wamamaye nka Samantha, Mukayizere Djaria Nelly [Kecapu], Uwamahoro Mutoni Assia , Uwase Bahavu Jeannete na Uwimpundu Sandrine uzwi nka Rufonsina muri Filime yitwa ‘Umuturanyi.

The Choice Influencer of the Year harimo DJ Brianne, Junior Giti na Rocky Kirabiranya bazwi mu gusobanura filime, Papa Cyangwe na Super Manager.

Umuhanzi ukorera indirimbo hanze y’u Rwanda harimo Adrien Misigaro, Priscillah [Scillah], Meddy, Emmy na The Ben.

Mu cyiciro cy’Indirimbo y’Amashusho y’Umwaka harimo Atensiyo ya Platini, Bon ya Davis D, Player ya Butera Knowless, Saa Moya ya Bruce Melodie na Zoli ya Nel Ngabo.

Icyiciro cy’Umugabo utunganya meza amashusho kirimo Bagenzi Bernard, Cedric Dric, Fayzo Pro, Meddy Saleh na Serge Girishya.

Icyiciro cya Dj w’umwaka Dj Bisoso, Dj Diallo, Dj Ira, Dj Marnaud na DJ Toxxyk. Icyiciro cy’umuhanzi mushya w’umwaka harimo Calvin Mbanda, Ish Kevin, Juno Kizigenza, Papa Cyangwe n’itsinda rya Vestine na Dorcas.

Bruce Melodie ubitse ibikombe bibiri yegukanye mu mwaka wa 2020. Ni umwe mu bahabwa amahirwe yo kwegukana igihembo muri iki cyiciro
Israel Mbonyi niwe muhanzi rukumbi w'indirimbo zo kuramya no guhimbaza Imana uri guhatana muri iki cyiciro
Davis D ni umwe mu bahanzi bagaragaje imbaraga nyinshi mu mwaka wa 2020
Mico The Best abitse ibihembo bibiri bya muzika mu mwaka w' 2020
Platini wari mushya mu muziki kuba muri batanu bahatanira iki gihembo ni intambwe ishimishije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .