The Ben yiyemeje kwitura DJ Bob wamufashije agitangira umuziki

Yanditswe na Nsengiyumva Emmy
Kuya 23 Ugushyingo 2020 saa 04:53
Yasuwe :
0 0

Umuhanzi The Ben umaze kwamamara mu muziki Nyarwanda, yiyemeje gufasha Dj Bob wagize uburwayi bigatuma ibikorwa bye byo guteza imbere abahanzi bidindira.

Mugisha Benjamin cyangwa The Ben nk’uko benshi bamwita mu muziki, yasuye DJ Bob ku Cyumweru tariki 22 Ugushyingo, aho atuye mu Murenge wa Nyamirambo mu karere ka Nyarugenge.

Yavuze ko Dj Bob yigeze kugira uburwayi bwamukomereye ku buryo hari igihe cyageze akabura burundu, nyuma yo gukiruka yasanze ikibuga cyarahindutse kubera umuvuduko w’iterambere n’ikoranabuhanga, ariko amwizeza ko agiye gukora ibishoboka byose akagaruka mu kibuga.

Yagize ati "DJ Bob yahuye n’uburwayi bwamaze igihe, agiye koroherwa yasanze hari ibyamucitse [...] Yigeze kurwara bikabije bituma habaho uko gusigara. Tugiye gukora ibishoboka byose agaruke mu kibuga yongere abe umwami w’umuhanda."

DJ Bob yashimiye The Ben ahamya ko igihe azaba afashijwe kugaruka mu kibuga yiteguye gutanga byose afite kugira ngo yongere gutera itafari ku iterambere ry’umuziki.

Abajijwe uburyo ateganya kugarukamo mu ruhando rw’imyidagaduro, DJ Bob yavuze ko abantu bakwiye kwitegura bagashyira ibintu ku murongo gusa yizeza abakunzi b’umuziki kuzamubona mu isura nshya.

The Ben na DJ Bob bahujwe n’umuziki kuva mu myaka ya 2009 baba inshuti z’akadasohoka kuva icyo gihe kugeza ubu.

Uyu mugabo kugeza ubu ufite umugore n’abana babiri banabana, yashimiye The Ben umutima mwiza afite amusaba kuwukomeza.

Ndacyayishimira Jean Bosco wamenyekanye nka Dj Bob ni umwe mu bantu b’ibyamamare muri muzika y’u Rwanda. Uruhare rwe mu iterambere ry’umuziki aherutse kurushimirwa ubwo hatangwaga itangwa ry’ibihembo bya Kiss Summer Awards.

Uyu mugabo yamenyekanye ubwo yari afite studio ishyira indirimbo ku ma CD akazicuruza. Ni umwe mu ba mbere babyadukanye ndetse akabikuramo izina n’amafaranga. Benshi mu bahanzi bamushimira uko yabafashije kumenyekanisha ibihangano byabo.

Urukundo rw’umuziki kuri we, rwatangiye yiga mu mashuri yisumbuye kuko yawukuragamo ubushobozi bwamufashaga kwiga.

Mu 1997 nibwo yinjiye mu muziki. Iki gihe yakoraga mu mujyi rwagati, muri studio yitwa Taxman aho yari DJ, ariko akaba yaranacuranga mu bukwe no mu birori by’iminsi mikuru y’amavuko.

Ati “Njye nakuriye mu banyamuziki, ba marume bose bari aba DJ. Nanjye nisanze nabikunze mbyinjiramo gutyo.”

Guhuza umuziki n’amasomo byari akazi gakomeye, icyakora nta na kimwe ngo yagombaga guhagarika kuko amafaranga yakuraga mu muziki ariyo yamwunganiraga ku ishuri.

Akirangiza amashuri yisumbuye, DJ Bob yatangiye kwiga ibijyanye n’ikoranabuhanga muri KIST. Icyakora ngo ntabwo yabashije kurangiza kuko amafaranga y’ishuri y’umwaka wa kabiri yayaguzemo ibyuma byo kwinjira mu bucuruzi bw’umuziki.

Nyuma yo guhagarika amasomo mu 2005, DJ Bob wakoreraga abandi icyo gihe yatangiye gutekereza uko yakwikorera.

Mu 2007-2008, nibwo yashinze studio ye, agiriwe inama na Muyoboke Alex na Tom Close bari inshuti ze zikomeye.

Usibye guha abakunzi b’umuziki indirimbo zinyuranye z’abahanzi, DJ Bob yagezaga iyi miziki no ku banyamakuru batandukanye by’umwihariko ku ba Radio Salus yari igezweho icyo gihe kandi itari mu mujyi wa Kigali.

DJ Bob avuga ko uretse abahanzi bashya kuri ubu, yakoranye na buri wese wagize izina mu muziki w’u Rwanda mu myaka itambutse.

Urukundo yakundaga umuziki ni cyo kintu avuga ko cyamufashije kubirambamo no kugera ku rwego abishimirwa.

Ati”Narabikundaga, urukundo nabikundaga nibaza ko arirwo rwamfashije gukora ibyo nakoze byose.”

Igihembo yahawe muri Kiss Summer Awards muri Nzeri uyu mwaka, nicyo cye cya mbere yari ahawe mu myaka amaze mu muziki. Icyakora ngo ntibyigeze bimuhangayikisha.

The Ben na DJ Bob ni inshuti magara zimaranye imyaka myinshi
The Ben yishimiye kubona umuryango w'inshuti ye DJ Bob
Bahanye gahunda yo kongera guhura bakarebera hamwe ibikenewe ngo DJ Bob asubire mu ruhando rw'imyidagaduro yemye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .