Tete Loeper agiye gusohora igitabo gikubiyemo inkuru z’abakobwa bajyanwa i Burayi nk’ibicuruzwa

Yanditswe na Nsengiyumva Emmy
Kuya 30 Ugushyingo 2020 saa 12:40
Yasuwe :
0 0

Umuhanzikazi Umulisa Divine wamenyekanye cyane nka Tete Roca mu myaka ya 2011 kuzamura, nyuma akaza kubihinduramo Tete Divine, yinjiye mu kwandika ibitabo yitwa Tete Loeper, ndetse icya mbere yise ’Barefoot in Germany’ agiye kukimurika.

Iki gitabo cya mbere cya Tete Loeper gikubiyemo inkuru zinyuranye z’abakobwa n’abagore batuye ku mugabane w’u Burayi mu bihugu bitandukanye, bahajyanywe mu buryo bumeze nko kubacuruza.

Usibye ubuhamya bw’aba, Tete Loeper yabwiye IGIHE ko muri iki gitabo agaragaza ubuzima benshi mu bageze i Burayi babeshya ko babayemo kandi buhabanye n’ukuri. Ibi bikunze kuba intandaro ituma icuruzwa rya bagenzi babo ryoroha.

Ati ”Hari ukuntu mu Rwanda kimwe n’ibindi bihugu bya Afurika usanga abakobwa barota kujya ku mugabane w’u Burayi n’ahandi hanze y’uyu mugabane. Kenshi bakururwa n’ubuzima baba babonye kuri internet, bakibeshya ko aribwo bw’ukuri. Benshi mu bakobwa nk’abo rero usanga baguye mu mutego wo gucuruzwa kuko baba bararikiye kugenda, ariko batazi ubuzima bw’aho bagiye.”

Avuga ko hari ingero nyinshi z’abagenda ntibibagendekere uko babitekerezaga, ugasanga babayeho nabi, ku rundi ruhande binagoye ko banasubira iwabo.

Tete avuga ko igitabo cye kizaba gishingiye ku nkuru mpamo z’abantu banyuze muri ubwo buzima bushaririye, baganiriye.

Ati ”Hari benshi bajya gushaka i Burayi ameze nk’ugurishijwe ku mugabo bataziranye, benshi usanga muri iyi minsi bararikiye ibyitwa ‘passe’, hari ababaye abahuza impande zombi.”

Avuga impamvu zikomeye zatumye ahitamo kwandika kuri iki gitekerezo mu gitabo cye cya mbere, yahishuye ko byabitewe nuko ari ibintu yagendaga abona kuko biba ku rubyiruko rwinshi, utabashije kubitsinda akaba yagwa muri uyu mutego.

Ati ”Kenshi iyo tubonye umuntu uturutse hanze atashye mu biruhuko, agaragara nk’ubayeho neza cyane bigatera benshi kwifuza kujya kubaho nkawe, batazi neza uko aho atuye abayeho. Kenshi dukunda gukururwa n’iyo shusho cyangwa izo tubona ku mbuga nkoranyambaga, ariko tukirengagiza ukuri ku buzima baba babayemo.”

Ni igitabo Tete Loeper yatangiye kwandika mu 2018, bivuze ko agiye kukimurika nyuma y’imyaka ibiri agikoraho.

Byitezwe ko azakimurika ku wa 30 Ukuboza 2020 ku batuye ku mugabane w’u Burayi, mu gihe mu Rwanda avuga ko kizahagera mu ntangiriro za 2021.

Umulisa Divine ni umuhanzikazi wavuzwe cyane mu muziki wo mu Rwanda mu myaka ya 2011 kuzamura, icyakora ahagana muri 2014 yaje kuburirwa irengero.

Ubu asigaye atuye ku mugabane w’u Burayi aho yimukanye n’Umudage bamenyaniye mu Rwanda, bagashakana.

Ubu Tete afite umuryango w’abana babiri, umukuru w’umukobwa w’imyaka itanu ndetse na musaza we w’imyaka ibiri.

Nk’uko yabibwiye IGIHE, ngo umwana we w’imfura akunda umuziki ku buryo ubu yanatangiye kuwiga mu mashuri y’abato mu Budage.

Tete Roca agiyer gusohora igitabo cya mbere yanditse
Tete aherutse mu Rwanda mu 2019, hari amakuru ahamya ko mu byari byamuzanye harimo no guhura n'abandi bantu bagombaga kumuha ubuhamya bwo kuzuza igitabo cye
Barefoot in Germany izina ry'igitabo cya mbere Tete Loeper agiye gusohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .