Mu kiganiro yagiranye na IGIHE, Teta Diana yavuze ko ari mu myiteguro yo gutaha i Kigali kugira ngo abashe kwitegura neza ibi bitaramo.

Mu minsi ishize ni bwo ‘Institut Français du Rwanda’ yari yatangaje urutonde rw’ibitaramo bizahabera birimo icya Teta Diana giteganyijwe ku wa 6 Ukuboza 2024.

Ku rundi ruhande muri ‘Atelier du Vin’ bahise baha ikaze uyu muhanzikazi mu gitaramo cyiswe ‘Ingata y’umuco’ giteganyijwe ku wa 8 Ukuboza 2024.

Mu kiganiro na Frank Mihigo Wamugabo wateguye iki gitaramo, yabwiye IGIHE ko bahisemo kucyita ‘Ingata y’umuco’ mu rwego rwo gushimangira intego z’ibitaramo bye.

Ati “Njye intego yanjye ni ugusigasira umuco, rero abantu baturuka mu byaro bazi ko ingata yifashishwa mu gusigasira ikintu umuntu yikoreye,bityo ibitaramo byacu nabyo bigamije gusigasira umuco ari na yo mpamvu twabyise Ingata y’umuco.”

Iki gitaramo Teta Diana azaba agihuriramo n’Itorero Inganzo Ngari, n’Intore Umukondo Gatore.

Teta Diana azataramira i Kigali nyuma y’imyaka irenga ibiri atahakorera igitaramo dore ko icyo yaherukaga cyabaye ku wa 8 Werurwe 2022.

Igitaramo cya mbere cya Teta Diana byitezwe ko kizabera muri ‘Institut Français du Rwanda’

Teta Diana azakorera ikindi gitaramo muri Atelier du Vin