00:00:00 IGIHE NETWORK KN KINYARWANDA EN ENGLISH FR FRANCAIS

Tekno Miles yatumiwe muri ‘Choplife Kigali’: Ibyaranze igitaramo aheruka gukorera mu Rwanda

Yanditswe na Nsengiyumva Emmy
Kuya 20 June 2022 saa 03:54
Yasuwe :

Abakurikiranira hafi imyidagaduro y’u Rwanda bahanze amaso imyitwarire ya Tekno Miles watumiwe mu gitaramo ‘Choplife Kigali’ nyuma y’imyaka itanu asize inkuru mbi i Kigali.

Tekno Miles aheruka gutaramira i Kigali ku wa 10 Nzeri 2017, mu gitaramo cyabereye muri Camp Kigali ahari hakubise huzuye abafana b’umuziki w’uyu muhanzi nubwo cyarimo n’abandi barimo Lilian Mbabazi na Bruce Melodie.

Ni igitaramo cyacuranzemo aba DJs batandukanye barimo Dream Team DJs barimo na Nyakwigendera DJ Miller, DJ Infinity n’abandi banyuranye.

Icyakora nubwo bari bakubise buzuye muri Camp Kigali, byageze mbere gato ya saa moya z’ijoro z’ijoro bamwe batangiye kwiheba batekereza ko Tekno Miles atacyiitabiriye cyane ko uyu muhanzi yari ataragera mu gihugu.

Icyizere gike cyaterwaga no guhinduranya gahunda z’ingendo z’uyu muhanzi kwa hato na hato.

Uyu muhanzi wari utegerejwe i Kigali saa kumi n’byiri z’igitondo cyo ku wa 10 Nzeri 2017, yatumye abamutumiye n’itangazamakuru bazinduka iya rubika babyukira ku Kibuga cy’Indege cya Kigali i Kanombe ariko baramutegereza baramuheba.

Uyu wari waraye akoreye igitaramo i Nairobi muri Kenya yaje kumenyesha abamutumiye ko indege yamusize kubera gutwarwa n’agatotsi, bituma bashyashyana bashakisha indi ndege ishobora kumugeza i Kigali hakiri kare.

Nyuma yo kuzenguruka babaririza itike ya vuba cyane babonye iyagombaga kumugeza i Kigali saa cyenda z’amanywa, ariko nabwo isaha zageze amakuru yo kuza kwe aratangazwa.

Icyo gihe amakuru nabwo yavuze ko indege yongeye gusiga uyu muhanzi icyakora aza guhita ahindurirwa itike ishyirwa saa moya n’igice z’ijoro.

Saa mbiri zirengaho iminota mike nibwo Tekno Miles yari asohotse mu kibuga cy’indege cya Kigali i Kanombe, iki gihe abahanzi bagombaga kumubimburira ku rubyiniro bari bageze kure igitaramo.

Ibi byatumye avanwa ku kibuga cy’indege yerekezwa kuri Park Inn Hotel aho yakoreye ikiganiro n’abanyamakuru, icyakora bitewe n’uko umwanya wari muto yagikoze ashushubikanywa ngo agere Camp Kigali ataramire ibihumbi byari byuzuye aho yagombaga gutaramira.

Tekno akigera muri Camp Kigali ahari hari kubera igitaramo ntabwo yagize umwanya wo kuruhuka kuko yasanze abari kumubanziriza ku rubyiniro barangije akazi kabo ndetse abafana bakomejwe kurangazwa n’aba DJs mu gihe yari atarahagera.

Ibi byatumye agera ahabereye igitaramo ahita yurizwa urubyiniro, icyakora nubwo yari yabanje kujujubya abamutumiye n’itangazamakuru ryari rimutegereje, abafana bo yatashye abamaze ipfa kuko bataramanye bigatinda.

Iki gihe amakuru yakurikiye igitaramo yavugaga ko amafaranga abamutumiye batakaje mu guhinduza amatike bayamukase mu yo bamusigayemo binateza umwuka mubi kuko abashinzwe kureberera inyungu ze bagerageje kumwishyuriza ariko bibutswa ko byahuriyemo bitewe n’amakosa yabakoreye.

Kugeza ubu Tekno Miles ategerejwe mu gitaramo ‘Choplife Kigali’ gitegerejwe ku wa 25 Kamena 2022, akazataramana n’abarimo; Fave, Nasty C, Khaligraph Jones kikazayoborwa na DJ Neptune uri mu bakomeye muri Afurika.

Uretse aba bazaba bavuye hanze bagiye gutaramira i Kigali, Abanyarwanda biganjemo abagezeho muri iyi minsi nabo batumiwe mu gitaramo Choplife Kigali, harimo; Bruce Melodie, Okkama, Kenny Sol, Bushali, Ariel Wayz,Afrique bakazafatanya na DJ Toxxyk na DJ Ira.

Tekno Miles agiye gutaramira i Kigali nyuma y'imyaka itanu ahasize inkuru mbi
Tekno wari utegerejwe i Kigali mu gitondo cya kare tariki 10 Nzeri 2017, yahageze igitaramo cyatangiye
Nubwo yari yajujubije abamutumiye, Tekno Miles ntabwo yatengushye abafana
Nubwo yahageze akererewe, abafana bo yabahaye ibyo bari bishyuriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .