Iri tsinda ryakoze impanuka ubwo ryari rivuye gucuranga mu Nama y’Ihuriro ry’Abagore bo muri ‘Commonwealth’ muri Kigali Serena Hotel, bari kwerekeza ku Gisimenti aho bari bagiye gucuranga.

Ubwo bari bakirenga kuri St Famille, amakuru IGIHE ikesha uwari ahabereye iyi mpanuka avuga uwari utwaye Symphony Band yatambutse ku modoka yari imuri imbere, agerageje kuyigarura mu murongo we biranga, bityo agonga ku ruhande rw’umuhanda imodoka yikaraga mu muhanda rwagati irahindukira ireba aho yari ivuye.

Umwe mu bagize iri tsinda twaganiriye yagize ati “Urebye impanuka uko yari imeze wagira ubwoba, ariko igitangaje ni uko nta n’umwe muri twe wagize icyo aba nta n’uwakomeretse rwose.”

Uyu yavuze ko nyuma yo gukora impanuka hari umuntu wabanyuzeho asanzwe abazi ahita yemera kubageza ku Gisimenti batishe amasaha.

Nubwo bari barokotse impanuka ikomeye, Symphony Band bageze aho igitaramo cyari bubere bahita burira urubyiniro batangira gutaramira imbaga y’abakunzi b’umuziki bari bahakoraniye, ndetse byari bukugore kubona ko aba basore bagize ibibazo mu rugendo rwabo.

Amakuru avuga ko Frank wo muri iryo tsinda ari we wagize ububabare mu gatuza, uretse ko nawe bitamubujije kugaragara ku rubyiniro ndetse no kwitwara neza, aho we na bagenzi be bagaragaje imbaraga zidasanzwe.

Frank wo mu itsinda rya Symphony Band ni we wababaye cyane mu gatuza nubwo bitamubujije gukomeza akazi

Abagize Symphony Band bakoze impanuka bavuye mu gitaramo muri Kigali Serena Hotel

Nubwo bari bakirokoka impanuka ntabwo wari kubareba mu maso ngo ubyibwire

Imbaraga bakoreshaga ku rubyiniro rwo mu Gisimenti ntabwo zari gutuma umenya ko hari impanuka bamaze guhura nayo