00:00:00 IGIHE NETWORK KN KINYARWANDA EN ENGLISH FR FRANCAIS

Sucrière ibaje mu giti n’inganzo irata u Rwanda: Umwihariko wa ArtRwanda-Ubuhanzi i Rubavu

Yanditswe na Israel Ishimwe
Kuya 23 August 2022 saa 10:10
Yasuwe :

Gahongayire Olive ufite ubumuga bwo kutavuga ni umwe mu banyempano 41 baserutse muri Art Rwanda-Ubuhanzi yakomereje mu Ntara y’Iburengerazuba.

Nyuma y’amarushanwa yo ku rwego rw’intara yabereye mu Burasirazuba, kuri uyu wa 23-24 Kanama 2022, yakomereje mu Karere ka Rubavu aho yabereye kuri Vision Jeunesse Nouvelle.

Ku ikubitiro, kuri uyu wa kabiri hakiriwe abanyempano bo mu Turere twa Nyabihu na Ngororero.

Muri bo Gahongayire Olive ni umwe mu banyuze imbere y’Akanama Nkemurampaka ndetse impano ye yishimiwe cyane.

Uyu muhanzikazi ni umunyabugeni. Nubwo afite ubumuga bwo kutavuga ntibimuzitira kwerekana impano ye yo gushushanya ibikoresho bitandukanye yifashishije ibiti.

Imbere y’akanama nkemurampaka yerekanye ibyo yakoze birimo agakoresho kabikwamo isukari “Sucrière”, ishusho y’umubyeyi werekana umuco, kurera umwana n’ubufatanye bukwiye hagati y’abashakanye.

Gahongayire yiga mu Ishuri ry’Abana bafite Ubumuga bwo kutumva no kutavuga muri Nyabihu.

Umwihariko w’ibihangano bye, utasanga ku isoko n’amabara akoresha uri mu byatumye impano ye yishimirwa cyane.

Umunyempano Mico Temperance werekanye impano ye mu kubyina, yifashishije indirimbo “Yeah” ya Chris Brown binyura benshi.

Impano ye yanyuze abagize Akanama Nkemurampaka ndetse bafatanya no kuririmba.

Uyu musore wo mu Karere ka Nyabihu yashimye imitegurire y’iri rushanwa, avuga ko naritsinda rizamufasha kumenyekanisha u Rwanda.

Ati “Turashima byimazeyo abatekereje aya marushanwa kuko byongera urwego rw’impano zacu. Biradufasha cyane kuko iyo habayeho amarushanwa hari ibihembo byongera igishoro n’iterambere.’’

Art Rwanda-Ubuhanzi igamije gushakisha no gushyigikira urubyiruko rufite impano. Ni irushanwa rizenguruka igihugu hashakishwa abanyempano mu Bugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo.

Abasizi bari mu bayitabiriye i Rubavu, barimo na Asifiwe Nadia watatse u Rwanda mu muvugo we yise “Amahoro”, ashimangira ko ayo u Rwanda rwifitemo, atari ayo rwashakiye ahandi.

Umuhuzabikorwa w’Ishami rigamije kubaka ubushobozi bw’Urubyiruko muri Imbuto Foundation, Joël Murenzi, yavuze ko banyuzwe n’abanyempano babonye.

Yagize ati “Mu Burengerazuba hari abanyempano beza cyane uhereye ku banyamuziki, abasizi bafite ubutumwa bwiza bwahindura umuryango Nyarwanda. Twanashimye ko abafite ubumuga na bo bari mu bagaragaje impano z’ubugeni kandi banatsinze.’’

Amarushanwa y’Icyiciro cya Kabiri cya Art Rwanda- Ubuhanzi yatangirijwe ku mugaragaro mu Karere ka Rubavu ku wa 10 Kamena 2022.

Abahanzi bakomeza ku rwego rw’intara bagera mu cyiciro cya nyuma ku rw’igihugu ari na cyo kizagena uwatsinze muri buri cyiciro. Batatu ba mbere muri buri cyiciro bazahembwa miliyoni 1 Frw mu gihe imishinga itatu ya mbere izahabwa miliyoni 10 Frw kuri buri wose.

ArtRwanda- Ubuhanzi yatangijwe bwa mbere mu 2018 ariko idindizwa n’Icyorezo cya COVID-19. Abahanzi 68 batoranyijwe mu cyiciro cya mbere bashyizwe ku isoko ry’umurimo muri Mata 2022.

Mu mwaka ushize habarurwaga ibigo 11 bashinze, byatanze imirimo ku rubyiruko rugera kuri 400 aho bashobora kwinjiza miliyoni 80 Frw.

ArtRwanda-Ubuhanzi itegurwa na Imbuto Foundation ifatanyije na Minisiteri y’Urubyiruko ibinyujije mu Nteko y’Umuco (RCHA), Ishami ry’Umuryango w’Abibumbye ryita ku Iterambere (UNDP) n’Ikigega cya Koreya y’Epfo gishinzwe Iterambere (KOICA).

KANDA HANO UREBE ANDI MAFOTO MENSHI:

Gahongayire Olive ufite ubumuga bwo kutavuga yerekanye impano ye yo gushushanya ibihangano no gukora ibikoresho bitandukanye yifashishije ibiti
Nyuma yo kureba impano ya Gahongayire, abagize Akanama Nkemurampaka bamuhundagajeho za "Yego"
Gahongayire yari afite uri kumusemurira, usanzwe ari umuyobozi ku Ishuri ryigisha abafite ubumuga muri Nyabihu
Abagize Akanama Nkemurampaka bitegereza kimwe mu bihangano bya Gahongayire byerekana umubyeyi wizihiwe ari konsa umwana we
Umusizi Malaika Uwamahoro yitegereza kimwe mu bikoresho byabajwe na Gahongayire Olive ufite ubumuga bwo kutavuga
Umunyamideli Laurene Rwema uri mu bashinze Uzi Collections uri mu Kanama Nkemurampaka ka ArtRwanda-Ubuhanzi aha yari afite Sucrière yabajwe na Gahongayire Olive
Yasobanuye uko ibikoresho abikora n'ibyo yifashisha
Uwamuremyi Pacifique Jackson yaririmbye yicurangira gitari indirimbo ye yise “Ubikoraho iki?”, igaruka ku kwimakaza umuco gakondo
Abarimo abakina Filimi n'Ikinamico bagaragaje impano zabo imbere y'Abagize Akanama Nkemurampaka
Murwanashyaka Dan ni Umunyabugeni. Yahanze ibihangano 2 birimo "Rwanda Nziza" cyerekana ibyiza bitatse u Rwanda na “Intambwe iganje y’Umunyarwanda’’ kigaragaza uko Abanyarwanda babonye umucyo nyuma yo kunyura mu mateka ashaririye ya Jenoside yakorewe Abatutsi mu 1994
Abafotora bitwaza amafoto bafashe mu bihe bitandukanye ariko uwifuje agafoto k'ako kanya bahita bakamufata mu kwerekana ubushobozi bwe
Abagize Akanama Nkemurampaka bitegereza amwe mu mafoto yafashwe n'umwe mu banyempano mu cyiciro cyo Gufata amafoto n'amashusho
Dusengimana Emmanuel yerekanye impano ye yo gufata amafoto, umwuga amazemo imyaka itanu
Tuyizere Adelaide yaririmbye anicurangira piano, yahereye ku ndirimbo “Chiquitita” ya Abba; ayiherekesha indi iri mu Njyana ya Opera
Aha yasobanuraga aho yafatiye ifoto n'ubutumwa yashakaga gutanga
Cyuzuzo Nkundabagenzi Sylvere ni umwanditsi w’Ibitabo. Yanditse icyo yise “Amateka y’u Rwanda unyuze ku Mukore wa Rwabugiri”
Umuhanga mu bya Sinema, Mazimpaka Kennedy, yashimye imyandikire ye, nyuma yo kunyura mu gitabo yanditse
Niyirera Deborah ni umubyinnyi gakondo ufite ubuhanga budasanzwe! Ni umuririmbyi ndetse ashobora no kuvuga amazina y'inka
Uburyo abikoramo, akanyamuneza agaragaza ku maso byanyuze abagize Akanama Nkemurampaka
Umunyamakuru uzwi cyane mu cyiciro cy'abakora inkuru z'imyidagaduro kuri Televiziyo y'u Rwanda, Nzeyimana Luckman, ni we uyobora iri rushanwa nk'umushyushyarugamba
Mico Temperance yerekanye impano ye mu kubyina bigezweho. Yifashishije indirimbo “Yeah” ya Chris Brown
Umusizi Malaika Uwamahoro aganira n’Umuhanzi Mani Martin, bombi bari mu bagize Akanama Nkemurampaka
Uhereye ibumoso: Umunyabugeni Bushayija Pascal, Umuhanzikazi Nirere Shanel, Umuhanga mu bya Sinema Mazimpaka Kennedy, Umunyamideli Laurene Rwema, Umuhanzi Mani Martin n'Umusizi Malaika Uwamahoro ni bo bagize Akanama Nkemurampaka mu Burengerazuba
Amarushanwa ya ArtRwanda-Ubuhanzi ku rwego rw'Intara y'Iburengerazuba yatangiriye mu Karere ka Rubavu
Aho amarushanwa yabereye ni muri metero nke uvuye ku Kiyaga cya Kivu

Amafoto: ArtRwanda-Ubuhanzi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .