Social Mula ageze kure imyitozo y’igitaramo cyo kumurika Album ye“Ma vie”(Video)

Yanditswe na Nsengiyumva Emmy
Kuya 20 Ugushyingo 2019 saa 02:02
Yasuwe :
0 0

Social Mula nyuma yo kudahirwa ngo yegukane igihembo cya Prix Decouvertes aho yari yageze mu icumi ba nyuma b’iri rushanwa, kuri ubu ageze kure imyiteguro y’igitaramo cyo kumurika Album ye ya mbere.

Ubwo twasuraga Social Mula aho ari gukorera imyitozo ikomeye y’iki gitaramo, yadutangarije ko yiteguye bikomeye ndetse ari kwitozanya bya hafi n’itsinda ry’abacuranzi bize mu ishuri rya muzika rya Nyundo bazamufasha ku rubyiniro.

Mu kiganiro na IGIHE, Social Mula yagize ati” Nditeguye bihagije, nshaka gukora igitaramo ku buryo ninkora ikindi nzabona abantu.”

Social Mula yasabye abakunzi ba muzika kuzitabira igitaramo cye cyane ko kizaba kinarimo abandi bahanzi bafite amazina akomeye.

Ati “ Nzi neza ko ririya joro rizaba ari iry’umuziki uryoshye, abahanzi bazaza kunshyigikira ni beza kandi nanjye sindi mubi. Mfite abakunzi b’ibihangano byanjye, ku nshuro ya mbere ngiye kumurika Album ya mbere nkeneye inkunga yabo.”

Muri aba bahanzi harimo na Big Farious bafitanye indirimbo bise “Hansange”, uyu usanzwe atuye mu Butaliyani byitezwe ko azagera i Kigali mbere y’iminsi mike ngo igitaramo nyiri izina kibe.

Social Mula uri mu myitozo byahuriranye nuko yari amaze gushyira hanze indirimbo nshya yise “Yayobye”.

Yavuze ko iyi ari indirimbo ivuga uburyo umuntu ashobora kwandikira ubutumwa mugenzi we ariko bukayoba bukajya k’uwo atashakaga bikaba byamuteza ibibazo.

Social Mula yavuze ko iyi ndirimbo atari inkuru mpamo ye ahubwo ari igitekerezo yagize nyuma yo kubona ko ari ibintu bibaho.

Iyi ndirimbo nshya ya Social Mula “Yayobye” yakozwe mu buryo bw’amajwi na Madebeat mu gihe amashusho yayo yafashwe akanatunganywa na Bagenzi Bernard.

Iyi ndirimbo izaba iri kuri Album yitegura kumurika mu mpera z’iki Cyumweru aho afite igitaramo gikomeye kizaba tariki 23 Ugushyingo 2019.

Muri iki gitaramo Social Mula azafatanya n’abahanzi nka; Big Fizzo, King James, Yvan Buravan,Bruce Melodie, Marina na Yverry.

Kwinjira muri iki gitaramo kizabera muri Camp Kigali bizaba ari amafaranga ibihumbi bitanu (5000 Frw) mu myanya isanzwe, ibihumbi icumi (10 000 Frw) mu myanya y’icyubahiro na 150 000 Frw ku meza y’abantu umunani azaba ateye mu myanya y’icyubahiro.

Reba hano ikiganiro kigufi twagiranye na Social Mula

Reba hano indirimbo nshya ya Social Mula "Yayobye"

Social Mula aritegura kumurika Album ye ya mbere
Social Mula ageze kure imyiteguro y'igitaramo cye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza