00:00:00 IGIHE NETWORK KN KINYARWANDA EN ENGLISH FR FRANCAIS

Slaï, Lilian Mbabazi na Ruti Joël batumiwe muri Kigali Jazz Junction

Yanditswe na Uwiduhaye Theos
Kuya 3 June 2022 saa 09:47
Yasuwe :

Umuhanzi ufite izina rikomeye mu bakunda indirimbo ziri mu rurimi rw’Igifaransa zo mu njyana ya Zouk, Slaï; Lilian Mbabazi ufite inkomoko mu Rwanda ariko uba muri Uganda na Ruti Joël uri mu bahanzi bakunzwe muri iki gihe mu Rwanda, batumiwe mu gitaramo cya Kigali Jazz Junction.

Iki gitaramo kizaba ku wa 1 Nyakanga 2022 muri Camp Kigali. Aba bahanzi bazagera mu Rwanda nyuma ya Timaya wo muri Nigeria waherukaga kuririmba muri iki gitaramo cya Jazz Junction ku wa 25 Werurwe.

Slaï w’imyaka 49 yaherukaga kuririmba muri Kigali Jazz Junction ku wa 22 Gashyantare 2019 muri Serena Hotel.

Uyu muhanzi Yamamaye mu ndirimbo zitandukanye nka ‘Après la tempête’, ‘Autour de toi’, ‘Ce soir’, ‘Flamme’ n’izindi nyinshi zinyura abakunda umuziki ugenda gake.

Amazina ye asanzwe ni Patrice Sylvestre, yavukiye mu gace ka Val-d’Oise mu Majyaruguru y’u Bufaransa; ni umuririmbyi w’Umufaransa ufite inkomoko muri Guadeloupe.

Mu 1998 yashyize hanze indirimbo yise ‘Flamme’ imumenyekanisha mu buryo bukomeye mu gace akomokamo ndetse aba umwe mu bahanzi bihariye igikundiro muri Caraïbe.

Mu 2000, Slaï yatwaye ibihembo bikomeye muri Tropical Music Awards. Icya mbere cyari icy’indirimbo yagurishijwe cyane abikesheje ‘Flamme’, icya kabiri ari icy’umuntu wigaragaje cyane muri uwo mwaka. Amaze gukora album zirimo Florilège, Caraïbes, Escale n’izindi.

Lilian Mbabazi ni Umunyarwandakazi wavukiye mu Mujyi wa Kampala gusa yaje mu Rwanda nyuma ya Jenoside yakorewe Abatutsi. Yahabaye igihe kinini mbere y’uko asubira i Kampala gukomeza amashuri muri Kaminuza ya Makerere.

Mbabazi yakundanye na Radio wahoze mu itsinda rya GoodLyfe akitaba Imana mu 2018, bafitanye abana babiri; umukuru yitwa Asante afite imyaka 10 naho umuhererezi yitwa Izuba; bose bavukiye muri Uganda.

Yamenyanye na Mowzey Radio bahuriye muri Makerere University aho yize ibijyanye n’ubumenyi rusange. Icyo gihe bombi bakundaga kuririmba gusa yatinyutse kwiyerekana nk’umuhanzi ukomeye abifashijwemo na Radio babaga bari kumwe igihe kinini.

Uretse aba bahanzi, muri iki gitaramo hazaririmba na Ruti Joël uri mu bahanzi bagezweho mu Rwanda.

Azwi mu ndirimbo nka “Rasana” yakoranye na Mike Kayihura, “Igikobwa”, “Rumata”, “Oulala” n’izindi zitandukanye. Mu 2018 nibwo bwa mbere uyu muhanzi yagiye muri studio akorana indirimbo na King Bayo uherutse kwitaba Imana na Jules Sentore bise ‘Diarabi’.

Igitaramo cya Kigali Jazz Junction aba bahanzi bose kigiye kuba muri Nyakanga kwinjira bizaba ari 10. 000 Frw ahasanzwe, 20.000 Frw muri VIP, 30.000 Frw muri VVIP ndetse na 240.000 Frw ku meza azagurwa n’abantu barenze umwe.

Reba zimwe mu ndirimbo z’aba bahanzi bagiye kuririmba muri iki gitaramo

Lilian Mbabazi ategerejwe mu gitaramo mu Rwanda
Ruti na we ari mu bahanzi bagiye gusurutsa abazitabira Kigali Jazz Junction muri Nyakanga
Slaï yaherukaga mu Rwanda mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .