00:00:00 IGIHE NETWORK KN KINYARWANDA EN ENGLISH FR FRANCAIS

Si Will Smith gusa! Ibindi byamamare byasebeye mu birori byo gutanga ibihembo

Yanditswe na Muyisenge Jean Felix
Kuya 17 April 2022 saa 08:21
Yasuwe :

Ijoro rya tariki 27 Werurwe 2022 ntirizigera ryibaginara mu mateka y’abakunzi ba sinena by’umwihariko icyamamare muri filime zitandukanye zabiciye bigacika, Will Smith waje kwegukana igihembo cya Oscars gihabwa umukinnyi werekanye ubuhanga muri filime.

Iki gihembo yagitwaye hagendewe ku buryo yitwaye muri filime yitwa “King Richard.”

Mu bisanzwe iri ryakagombye kumubera rimwe mu majoro meza yigeze mu buzima bwe, nyamara ahubwo byarangiye ribaye iryo yifuza kwibagirwa.

Ibi ni kubera igikorwa kigayitse yakoze akubita urushyi Chris Rock, ibintu byamusigiye igisebo n’ingaruka zitandukanye nko guhagarikwa mu bikorwa bitandukanye bya Hollywood.

Nubwo Will Smith akomeje kuba iciro ry’imigani kubera ibyo yakoze mu itangwa ry’ibihembo bya Oscars, ntabwo ari we byabayeho gusa ahubwo hari n’abandi batandukanye bagiye bata ibaba mu birori bihanzwe amaso n’abantu benshi.

Nicki Minaj 2014 muri MTV video Music Awards

Nicki Minaj ikanzu yamucikiyeho ari ku rubyiniriro kandi nta myenda y'imbere yari yambaye

Umuraperikazi Onika Tanya Maraj [Nicki Minaj], ntazibagirwa ibirori byo gutanga MTV Video Music awards muri 2014.
Muri ibi birori biba bigamije guhemba indirimbo zifite amashusho meza, Nicki Minaj yahuye n’uruva gusenya ubwo umwambaro we wamucikiragaho ari ku rubyiniro.

Ubwo yari ari ku rubyiniro hamwe na Jessie J na Ariane Grande baririmba indirimbo "Bang Bang" yabicaga bigacika muri icyo gihe, umwambaro Minaj yari yambaye waje gucika mu gice cyo hagati y’agatuza no mu nda.

Ibi byatumye aririmba iyo ndirimbo awufatiye mu gituza ngo utavamo, ibintu byamuteye ikimwaro.

Nyuma y’iminsi bibaye uyu muhanzi yaje gutangaza ko ikanzu yari yayambaye nta myambaro y’imbere yashyizemo kubera kubura umwanya cyane ko yari afite amasegonda 40 gusa yo guhindura imyambaro yari yambaye aririmba Anaconda.

Ibi bivuze ko ikanzu ye iyo aza kuyirekuraho gato yari gusigara yambaye ubusa buri buri.

Katy Perry 2008 muri MTV Latino America awards

Mu bakurikiranaga hafi ibikorwa bya muzika, ntawakwibagirwa mu mwaka wa 2008 ubwo umuhanzi Katheryn Elizabeth Hudson (Katy Perry) yahuriraga n’isanganya ku rubyiniriro mu birori byo gutanga ibihembo bya MTV Latino America awards.

Ubwo yasusurutsaga abari bitabiriye ibyo birori, Katy Perry yijugunye mu mutsima munini (Gato) yari iri imbere ye ku rubyiniro, maze afata ibice byayo abijugunyira abafana mu rwego rwo kubasusurutsa.

Gusandaza iyi gato ku rubyiniro byatumye hanyerera maze agerageza guhaguruka inshuro zirenga enye yongera yikubita hasi, birangira yiyakiriye agenda yikuruza hasi mpaka avuye ku rubyiniro.

Christine Lahti, 1998 muri Golden Globe Awards

Christine Lahti bamaze igihe bamutegereje yagiye mu bwiherero

Mu birori byo gutanga ibihembo bya Golden Globe awards bihabwa abakinnyi ba filime bitwaye neza, byatangagwa ku nshuro ya 55 mu 1998, Christine Lahti yahawe igihebo cy’uwakinnye neza muri filime z’uruhererekane kubera uko yigaragaje muri filime Chicago Hope.

Nyamara ubwo bamuhamagaraga nk’uwatsinze, Lahti we yari yibereye mu bwiherero bituma hacamo umwanya bamutegereje.

Ubwo yari avuyeyo yahitiye ku rubyiniro bamuhereza agatambaro ko kwihanagura ibiganza, n’uko akomeza ajya kwakira igihembo cye.

Akimara kucyakira yahise agira ati “Ntababeshye,bampamagaye ndi mu bwiherero”

Miguel 2013, muri Billboard Music Awards

Miguel yagwiriye umufana mu gitaramo

Hari byinshi umuhanzi uri ku rubyiniro akora kugira ngo ashimishe abafana, bimwe muri ibyo harimo kwijugunya mu bafana bakamuterura.

Ibi bikorwa inshuro nyinshi zitandukanye ndetse bikarushaho gushyushya abafana. Nyamara kuri iyi nshuro si uko byagendekeye umuhanzi Miguel ukomoka muri Amerika.

Mu mwaka wa 2013 ubwo yari ari kuririmba mu birori byo gutanga ibihembo bya Billboard Awards, uyu muhanzi yasimbutse mu bafana akubita umugore umwe umugeri mu maso mu gihe undi yamutsikamiye ku rubyiniro.

Aba bombi nyuma baje kumushyikiriza ubutabera bamwaka indishyi z’akababaro.

Ye na Taylor Swift 2009, muri MTV Video Music awards

Muri 2009, mu birori byo gutanga MTV Video Music awards ku nshuro ya 26, umuhanzi Kanye West (Ye) yakoze igikorwa gifatwa nk’igikorwa cya mbere gisebetse mu mateka y’ibi birori.

Ubwo Taylor Swift wari ufite myaka 19 yajyaga ku rubyiniro kwakira igihembo cy’indirimbo yakozwe n’umugore ifite amashusho meza kurusha izindi uwo mwaka cyahawe indirimbo “You Belong With Me”, Ye yiroshye ku rubyiniro amwambura indangururamajwi atangaza ko Beyonce ari we wari ukwiye icyo gihembo.

Yagize ati “Nyihanganira Taylor ndakwishimiye ariko Beyonce yakoze indirimbo ifite amashuho meza y’ibihe byose”.

Iki gikorwa cyamaganywe n’ibyamamare bitandukanye ku Isi kugera no k’uwari Perezida wa Amerika icyo gihe, Barack Obama wise Kanye West injiji.

Iki gikorwa kandi cyasigiye Ye ikimwaro gikomeye ku buryo yagiye akora ibiganiro bitandukanye asaba imbabazi ndetse anemeza ko we na Taylor baje kwiyunga.

Will Smith yishyize mu menyo y'abasetsi akubita Chris Rock urushyi
Katy Perry yanyereye inshuro nyinshi kugeza ubwo afashe umwanzuro wo kuva ku rubyiniro akambakamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .