Sherrie Silver yitabiriye iserukiramuco rikomeye muri Amerika (Amafoto)

Yanditswe na Uwiduhaye Theos
Kuya 16 Ukwakira 2019 saa 11:35
Yasuwe :
0 0

Sherrie Silver yitabiriye iserukiramuco rya The Austin City Limits (ACL) Music Festival, rikomeye muri Leta Zunze Ubumwe za Amerika afatanya na Childish Gambino ku rubyiniro.

Uwavuga ko Sherrie Silver amaze kuba umubyinnyi w’igitangaza ku Isi ntabwo yaba yibeshye kuko yegukanye ibihembo birimo icya MTV VMA mu 2018 n’ibindi.

Yayoboye imbyino zose zakoreshejwe mu ndirimbo yiswe ‘This Is America’ ya Childish Gambino yagiye hanze umwaka ushize igaca ibintu ku Isi yose ikanahesha uyu munyarwandakazi ibihembo bitandukanye.

Yayoboye kandi imbyino zo mu ndirimbo ‘Rescue me’ y’itsinda rikomeye ku Isi rya One Republic nayo yakunzwe n’ab’ingeri zitandukanye.

Ni nawe wagize uruhare mu mbyino zifashishijwe mu mashusho y’indirimbo ya Afro B ukomoka muri Côte d’Ivoire ariko uba mu Bwongereza yise ‘Joanna’ (Drogba) yahuriyemo na French Montana.

Uyu mukobwa kandi ubu ni Ambasaderi w’Ikigega Mpuzamahanga cy’Iterambere ry’Ubuhinzi (IFAD).

Aherutse kwitabira The Austin City Limits (ACL) Music Festival, iserukiramuco ryasojwe ku Cyumweru gishize aho yabyinanye na Childish Gambino wagize uruhare rukomeye mu gutuma izina rye ritumbagira.

Ni igikorwa ngarukamwaka kibera ahitwa Zilker Park i Austin, muri leta ya Texas muri Amerika.

Iri serukiramuco ryatijwe umurindi n’ikiganiro cya The Austin City Limits (ACL) cyatumye ubwo ryabaga bwa mbere ryitabirwa, ndetse guhera ubwo kugeza ubu rikaba riri mu maserukiramuco ahagaze neza muri Leta Zunze za Amerika.

Iki gitaramo kiba mu minsi itatu mu byumweru bibiri bikurikiranye, guhera ku wa Gatanu, ku wa Gatandatu no ku Cyumweru. Iry’uyu mwaka ryabaye kuva ku wa 5 Ukwakira kugeza ku wa 7, yongera kuva ku wa 12 kugeza ku wa 14 Ukwakira 2019.

Nibura abantu basaga ibibumbi 450 nibo baba bateganyijwe kwitabira iki gikorwa buri mwaka. Nyuma yo kuba hari umuziki uyunguruye haba hari icyo kunywa, kurya, imurikabikorwa, agace kahariwe imikino y’abana, ubwiyuhagiriro n’ibindi.

Iki gikorwa cyatangiye mu 2002 kiba muri weekend imwe ariko mu 2012, ubuyobozi bw’Umujyi wa Austin bwemeza ko kizajya kiba muri weekend ebyiri zikurikirana, bitangira kuba gutyo mu 2013.

Igikorwa cy’uyu mwaka cyari kirimo abahanzi bakomeye nka Cardi B, 21 Savage, Childish Gambino wanafatanyije na Sherrie Silver ku rubyiniro n’abandi.

Sherrie Silver yavukiye mu Rwanda mu 1994, nyuma mu 1999 we n’umuryango we baza kwimukira mu Bwongereza aho abana na nyina. Ni umubyinnyi w’umwuga ndetse abihuza no gukina filime.

Yakinnye mu yitwa Africa United yasohotse mu 2010 ivuga ku rugendo rw’abana batatu b’Abanyarwanda bajya kureba imikino y’igikombe cy’Isi muri Afurika y’Epfo.

Umwaka ushize nabwo yitabiriye iserukiramuco rya Choachella rikomeye cyane ryitabiriwe n’ibihangange mu muziki birimo Beyonce, Burna Boy n’abandi bahanzi bafite izina ntavogerwa.

Abahanzi benshi muri Afurika no hanze yayo basigaye bifuza gukorana nawe
Sherrie Silver afite impano ikomeye mu kubyina
Sherrie Silver yitabiriye The Austin City Limits (ACL) Music Festival aho yafatanyije na Childish Gambino ku rubyiniro
Uyu mukobwa amaze kuba ikirangirire ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza