Senderi ari kwandika igitabo cy’ibyo yabonye muri Jenoside yakorewe Abatutsi n’urugendo rwe rwo kwiyubaka

Yanditswe na Nsengiyumva Emmy
Kuya 10 Mata 2020 saa 02:59
Yasuwe :
0 0

Senderi usanzwe ari umuhanzi w’icyamamare mu Rwanda, ari kwandika igitabo kizaba gikubiyemo ibyo yiboneye n’amaso muri Jenoside yakorewe Abatutsi mu 1994 ndetse n’urugendo rwe rwo kwiyubaka rwari rugoye.

Uyu muhanzi wamenyekanye mu ndirimbo zikangurira Abanyarwanda kwitabira gahunda za Leta ndetse n’izo Kwibuka Jenoside yakorewe Abatutsi, yavuze ko ari kwandika igitabo cy’ibyo yanyuzemo muri Jenoside yakorewe Abatutsi.

Iyo ugerageje kuvugisha Senderi ukamubaza ibijyanye n’urugendo rwe muri Jenoside yakorewe Abatutsi mu 1994, avuga ko atajya yifuza kubivugaho cyane kuko bikubiye mu gitabo ari kwandika azamurika mu myaka iri imbere.

Ati” Hari igitabo ndi kwandika ubu ngeze ku rupapuro rwa 117 nateganyije byibuza impapuro 300, ni igitabo kizaba gikubiyemo ibyo niboneye n’ubuzima nabayemo kuko harimo ibimenyetso niboneye abandi batajya bakoresha iyo bandika.”

Senderi ni umwe mu bahanzi bakomeye ariko yari mu ngabo za RPA zahagaritse Jenoside yakorerwaga Abatutsi mu 1994.

Ahamya ko ibizaba bikubiye muri iki gitabo ari ibyo yabonye n’amaso ye mu rugendo rwe yabayemo ari umusirikare, cyane ko yaturutse mu cyahoze cyitwa Umutara akagera Gisagara n’amaguru kandi arwana nk’umusirikare.

Ati “Urumva ko nabonye byinshi n’amaso yanjye. Ibyo ndirimba ni ibintu akenshi mba nariboneye n’amaso yanjye ntabwo ari byabindi ngo barambwiye, no mu gitabo cyanjye rero niko bizaba bimeze kuko nzaba mvuga ibyo niboneye.”

Urugendo rwa Senderi mu gisirikare na nyuma yo kukivamo

Uyu muhanzi avuga ko yinjiye mu gisirikare muri Mutarama 1994 aza kugisezeramo mu 1999 bitewe nuko yari atorohewe n’ibikomere by’amateka yari afite ku mutima.

“Nasezeye igisirikare ariko sinasezeye gukorera igihugu kuko nahise ntangira kugikorera mu bundi buryo, kandi n’ubu ndacyagikorera binyuze mu bihangano byanjye.”

Ubwo urugamba rwasaga n’uruhosheje muri Kanama 1994 nibwo Senderi yatse uruhushya ajya iwabo bwa mbere asanga naho abenshi barabishe.

Uyu muhanzi nyuma yo kuva mu gisirikare yahise yinjira mu mwuga w’ubushoferi, yatwaye abantu banyuranye bakomeye cyane cyane abagiye bayobora icyari Perefegitura ya Kibungo.

Yatwaye ba Perefe barimo; Rwakazina, Rumanzi, Kimonyo, Ntabana, Perefegitura zivuyeho haje Intara Senderi yatwayeho Mutsindashyaka Theoneste, nyuma aza gufata icyemezo cyo kureka ako kazi ko gutwara abayobozi yinjira mu muziki.

Senderi avuga ko yatangiye umuziki kera none niwo umufasha kwiyubaka

Senderi avuga ko kuva yiga mu mashuri abanza yari umuhanzi kuko yigeze guhagararira komine ya Rusumo iwabo mu marushanwa y’umuziki icyo gihe nabo bari baserukanye baba aba kabiri ku rwego rw’igihugu.

Igihe cyose yabayeho yaba mu gisirikare cyangwa ari umushoferi Senderi yakoraga umuziki nubwo yabaga atarabona ko ari byo byamutunga.

Nyuma yo gufata icyemezo cyo kureka gutwara abantu Senderi avuga ko aribwo yatangiye kuririmba by’umwuga.

Iki gihe ngo nibwo yinjiye mu muziki akora indirimbo zinyuranye zirimo iz’ubuzima busanzwe, izishishikariza abantu gahunda za Leta ndetse n’izo kwibuka.

Senderi avuga ko kugeza ubu agikomeje urugamba rwo kwiyubaka gusa ahamya ko usibye na we, iterambere igihugu kigezeho ntawabura kuryishimira.

Ikiganiro na Senderi

Senderi mu myaka yo ha mbere
Usibye kuba yarabaye umusirikare Senderi yanabaye umushoferi
Senderi avuga ko ibyo aririmba akenshi ari ibyo aba yariboneye n'amaso ye
Senderi ari mu rugendo rwo kwiyubaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .