Ruti umaze iminsi itanu amurikiye abakunzi be album yise ’Musomandera’, yaririmbye zimwe mu ndirimbo ziyiriho, bwa mbere mu gitaramo.

Nubwo kuri bamwe bwari ubwa mbere bumvise izi ndirimbo, banyuzwe n’ubuhanga bw’uyu muhanzi uririmba anabyina mu buryo gakondo.

Uyu muhanzi akigera ku rubyiniro yakirijwe amashyi menshi, ahera ku ndirimbo yise ’Cyane’, abona kuramutsa abari bitabiriye iki gitaramo.

Zimwe mu ndirimbo yaririmbye ziri kuri iyi album zirimo ’Rwagasabo’, indirimbo yishimiwe cyane bitewe n’imicurangire yayo. Mbere y’uko akomeza, yasabye abakobwa guhaguruka abaririmbira iyo yise ’Cunda’, yanzika agira ati ‘Nakuboneye akazina nkwita Cunda we, Cunda amata we."

Ruti Joël yahise akomereza ku ndirimbo irata ubwiza bw’umukobwa yandikiwe na Yvan Buravan, ahishura ko bahisemo kuyita ’Nyambo’’

Uyu muhanzi wishimiwe na benshi yahise akomereza ku ndirimbo yise ’Amaliza’, ayitura abakobwa bazi ko ari beza.

Uyu muhanzi mbere y’uko asoza, yavuze ijambo ryakoze benshi ku mutima, ko yagize amahirwe yo kumenya no guhura na Yvan Buravan watumye amenya no gukunda Imana kurushaho.

Yagize ati "Nkongi yamfashije gukora umuzingo wanjye wa mbere, nagize amahirwe yo kumugira, yansigiye Imana, nanjye reka mbaririmbire indirimbo yansigiye, nyibaririmbire uko yayiririmbye."

Uyu muhanzi yahise aririmba indirimbo ’Ni Yesu’ ya Yvan Buravan, yasohotse kuri album ’Twaje’, imaze umwaka isohotse.

Iyi ndirimbo yakoze benshi ku mutima, barahaguruka bazamura amatoroshi, baririmbana na we ijambo kurindi.

Iyi ni yo ndirimbo uyu muhanzi wanyuze benshi muri iki gitaramo yasorejeho, aherekezwa n’urufaya rw’amashyi yakomewe n’abari bamukurikiye bifuza ko akomeza.

Abato n'abakuru bari bitabiriye iki gitaramo

Buri wese yabyinaga uko ashoboye

Abitabiriye iki gitaramo banyuzwe n'imbyino gakondo zinogeye amaso

Ruti Joel yaririmbye zimwe mu ndirimbo ziri kuri album ye ya mbere

Ibinezaneza byari byose ku bitabiriye iki gitaramo

Imbyino za Ruti Joel zanyuze benshi

Ukwibyara gutera ababyeyi ineza: Ababyeyi ba Yvan Buravan bakomeje gushimirwa cyane mu bikorwa bitandukanye

Iyi nyubako yari yuzuye, uretse uruhande rw'inyuma y'urubyiniro

Amafoto: Shumbusho Djasiri