Ni mu gikorwa cyabaye ku wa Gatanu, tariki ya 20 Nzeri 2024, muri Camp Kigali aho abahungu n’abakobwa bahawe izina ry’Ibyanzu binyuze mu mushinga wa Rumaga yise Siga Rwanda.

Abasizi batsinze muri ArtRwanda-Ubuhanzi iheruka mu 2023, ni bo Rumaga yahereyeho ahugura aho mu bihe bitandukanye bagiye banyura imbere y’abari bitabiriye iki gikorwa bavuga imivugo mu buryo bwo kungikanya.

Rumaga yabwiye IGIHE ko yagize iki gitekerezo mu myaka itanu ishize ariko atinzwa no gushaka inzira azabinyuzamo kugira ngo agishyire mu bikorwa.

Ati “Ni kenshi nagiye nsabwa ko nagira icyo mara kuri barumuna banjye, nahoraga ngitekereza guhera muri Nzeri 2019. Kwari ukugira ngo ndebe ko nahuriza abantu hamwe mbahe ubumenyi mfite.”

“Ntabwo byangoye ndi umuntu wizirika, ndamutse nkoze ibyoroshye ntaho naba ntandukaniye na buri wese. Nezezwa n’uko mubona ko hari icyo byamaze. Ntibyari byoroshye ariko njye ntabwo nkora ibyoroshye gusa.”

Yabajijwe ubutumwa yaha aba basizi yashyize ku isoko, agaragaza ko icyo yabasubiriramo ari uko buri wese akwiriye kugira umwihariko, ariko nanone hakaba ubufasha bwatuma intego zikomeza kugerwaho.

Ati “Ndashaka ko buri umwe aba we, niba warakunze Rumaga burya ashobora kuba ari inyama ariko ishobora guhindurirwa kuko indyo imwe itera bwaki. Ntabwo nifuza kuzisanga muri iki kibuga njyenyine kuko njye sinakora uruganda. Ntabwo ari igihe kinini kugira ngo tugire uruganda rw’ubusizi kimwe n’izindi nganda z’ubuhanzi.”

“Turashaka ko iki gikorwa cyajya kibaho mu buryo buhoraho. Turashimira ArtRwanda-Ubuhanzi yadufashije, ariko turasaba ubufasha bwose buri wese, atari ubw’amafaranga gusa n’ubwo na bwo bukenewe.”

Niyera Milliam w’imyaka 20 witwaye neza, yavuze ko yakuranye impano y’ubusizi agatangira kwitabira amarushanwa atandukanye arimo na ArtRwanda-Ubuhanzi, ari nabyo byaje kumuhesha amahirwe yo kwitabira aya mahugurwa.

Ati “Ntaho mfite nabyize ahubwo nabyiyumvisemo ntangira kwandika. Nkimara kugera aho twitorezaga banyakiriye neza, nabonye inyigisho nyinshi mu mezi atatu. Tugiye kubereka ibitangaza, ibintu mutigeze mubona mu busizi, niteguye gukorana imbaraga.”

Mu mugoroba, buri umwe yari afite igisigo cye yasangije abari aho, harimo icyitwa ‘Ntikikuvamo’ cya Ndagijimana David; Ikindi cyivugo ni ‘Niba Nirya Ndamaze’ cya Uwanyirijuru Josiane; ‘Nazize Iki’ cya Uwamahoro Liliane n’ibindi.

Abandi basizi bitwaye neza ni Niyera Milliam wahembwe nk’uwahize abandi, Abayisenga Marceline, Umuhoza Nadine, Muheto Gad, Mwiseneza Jackrlo na Uwababyeyi Viviane.

Abantu bari bagiye gushyigikira Rumaga ku bwinshi

Abayisenga Marceline na Uwababyeyi Viviane uri iburyo ubwo bari ku rubyiniro

Abazwi muri sinema ntibari batanzwe muri iki gikorwa

Aha Muheto Gad uri ibumoso yari ari kuvugana igisigo na Niyera Milliam

Aha Muhoza Nadine yari ari kuvuga igisigo cye

Aha Mwiseneza Jackrlo uri iburyo yari ari gususurutsa abitabiriye iki gikorwa afatanyije na Mushabizi Theo

Abanyamakuru Mustafa Kido ubanza ibumoso, Rugemana Amen wamamaye nka Babu wa ISIBO na Akayezu Jean de Dieu wa RBA bari bitabiriye igikorwa cyo gushyigikira Rumaga

Andy Bumuntu ni umwe mu bari bitabiriye iki gikorwa

Muheto Gad uri ibumoso na Uwababyeyi ku rubyiniro

Icyiciro cya nyuma aba basizi baje bambaye imyambaro y'abameze nk'abari mu rukiko

Muhoza Nadine uri ibumoso na Uwanyirijuru Josiane ubwo bavuganaga igisigo imbere y'abari bitabiriye

Muyoboke Alex ubanza iburyo ni umwe mu bashyigikiye Rumaga

Ni igikorwa cyitabiriwe n'abantu batandukanye bakunda ubusizi

Rumaga yashimiye cyane Saranda wabaye hafi aba bana mu gihe we yabaga adahari

Rumaga yijeje Niyera Milliam witwaye neza kuzamukorera igisigo mu majwi n'amashusho

Rumaga yashimiye Riderman wamuhaye inzu y'Ibisumizi ku buntu agatangiramo amahugurwa

Rumaga yavuze ko adashaka kuguma mu kibuga cy'ubusizi wenyine akeneye abandi

Rumaga yavuze ko yikokoye ngo afashe abana umunani kubona ubumenyi mu busizi

Seburikoko ubanza iburyo, Bamenya, Rusine na Madedeli bahamagawe ngo batange amanota

Seburikoko yashimye ubuhanga bw'aba bana

Ubwo Mani Martin yaririmbaga, Andy Bumuntu yacinye akadiho

Umuhanzi Cyusa Ibrahim uri iburyo n'umunyamakuru Mutesi Scovia ni bamwe mu bari bitabiriye

Umuhanzi Mani Martin yahawe akanya aririmbira abari bitabiriye iki gikorwa

Umunyamakuru wa Kiss FM ndetse akaba n'umunyarwenya Rusine ari kumwe n'umugore we bari mu bitabiriye iki gikorwa

Uwanyirijuru Josiane ubwo yari ari ku rubyiniro afatanyije na Ndagijimana David ukunze kwiyita No Stress

Amafoto: Ingabire Nicole