Rudeboy yavuze ko yifuza gukorana indirimbo na Meddy, anahishura urukumbuzi afitiye abanyarwandakazi

Yanditswe na Nsengiyumva Emmy
Kuya 12 Ugushyingo 2020 saa 09:56
Yasuwe :
0 0

Paul Okoye uzwi nka Rudeboy wamenyekanye cyane mu itsinda rya P Square yahishuye ko akunda umuziki w’umuhanzi Ngabo Médard Jobert umaze kwamamara nka Meddy mu muziki, ndetse yifuza ko bakorana indirimbo.

Uyu muhanzi uherutse gutaramira mu Rwanda mu gitaramo cya AMA Awards mu 2018. Yahishuye ko yifuza gukorana indirimbo n’umuhanzi w’umunyarwanda Meddy umaze kwinjiza izina rye mu Banya-Nigeria by’umwihariko kubera indirimbo ye Slowly yakunzwe mu bihugu bitandukanye.

Ibi uyu mugabo yabivugiye mu kiganiro cyihariye yagiranye na Radiyo ya B&B FM-Umwezi.

Avuga kuri Meddy, Rudeboy yari abajijwe niba haba hari umuhanzi w’umunyarwanda azi, mu gusubiza, yahisemo guhita aririmba indirimbo yitwa “Slowly” ya Meddy.

Arangije ati ”Uyu ni umusore wanjye, ndamukunda cyane. Nkunda uko ameze, turavugana cyane kuri telefone ndetse n’indirimbo ze ni nziza.”

“Mu by’ukuri iyi ndirimbo ye yaramenyekanye cyane hano muri Nigeria, ikindi navuga ni uko igihe yakwifuza ko dukorana indirimbo, njye nditeguye rwose.”

Ubwo yari abajijwe ikintu akumbuye mu Rwanda, ntiyigeze azuyaza yahise avuga ko mu bintu akumbuye harimo n’abanyarwandakazi

Ati “Buriya se si abagore? Abakobwa bo mu Rwanda ni beza cyane, ariko n’u Rwanda muri rusange ni rwiza. Nkumbuye ijoro ryo mu Rwanda, kuko urebye neza ibintu by’aho biba biteguye neza cyane. U Rwanda rurakeye, rufite isuku, mufite imihanda myiza, mbega mufite byinshi byiza cyane.”

Si Rudeboy gusa mu byamamare mu muziki wo muri Nigeria uhishuye ko yifuza gukorana indirimbo na Meddy, kuko mu Ukwakira 2019 Patoranking yavugiye mu Rwanda ko bakoranye indirimbo ariko itarasohoka.

Usibye aba bahanzi, Meddy mu myaka mike ishize byavuzwe ko yagiye muri Tanzania akavayo akoranye indirimbo na Diamond, gusa izi zose ziracyategerejwe n’abakunzi b’umuziki.

Paul Okoye ni umwe mu bahanzi bakomeye muri Nigeria usigaye wiyita Rudeboy mu muziki nyuma yo gutandukana n’impanga ye Peter Okoye baririmbanaga muri P-Square.

Indirimbo Slowoly ya Meddy iri mu zakunzwe bikomeye mu ruhando mpuzamahanga

Meddy ni umwe mu bahanzi b'abanyarwanda bagezweho cyane unagaragaza amashagaga yo kwagura umuziki we akawukura mu Rwanda akawugeza ku rwego mpuzamahanga
Rudeboy aheruka mu Rwanda mu 2018 ubwo yari yitabiriye igitaramo cya AMA Awards

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .