00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Minisitiri Mbabazi yatangije ArtRwanda-Ubuhanzi aha urubyiruko umukoro (Amafoto)

Yanditswe na Uwiduhaye Theos
Kuya 11 June 2022 saa 10:37
Yasuwe :

Minisitiri w’Urubyiruko n’Umuco, Rosemary Mbabazi, yasabye urubyiruko gushishoza mu byo rukora byose, ubwo yatangizaga ku mugaragaro amarushanwa y’icyiciro cya kabiri cya ArtRwanda-Ubuhanzi.

Ni mu gikorwa cyabereye mu Karere ka Rubavu mu Ntara y’Iburengerazuba kuri uyu wa Gatanu tariki 10 Kamena 2022, cyitabiriwe n’abayobozi batandukanye.

Minisitiri w’Urubyiruko n’Umuco, Rosemary Mbabazi, yavuze ko hari hashize igihe kinini iri rushanwa ritaba ariko umusaruro wavuye mu bikorwa by’icyiciro cya mbere ari uwo kwishimirwa.

Ati “Twaherukanaga mu 2018 dutangira icyiciro cya mbere. Mwabonye ko imfura za ArtRwanda-Ubuhanzi zimaze gutera imbere. Ndashimira Nyakubahwa Perezida Paul Kagame ku rukundo akunda urubyiruko. Ndashimira na Madamu Jeannette Kagame. Bose turahorana mu rugamba rwo guteza imbere urubyiruko. Bababonamo imbaraga z’igihugu.”

Yakomeje abwira uru rubyiruko ko amahirwe yo kwiteza imbere umuntu ayashakisha.

Ati “Amahirwe ni wowe uba ugomba kuyashakisha, murebe igihe mwazindukiye, utaje ntabwo yabonye ayo mahirwe. Ikintu cyose ukora uhore utekereza gutera indi ntambwe. Niba hari ahantu uri gukora witware neza. Hari ubwo twifungira amahirwe cyangwa tukayafungura.”

Yahaye isomo urubyiruko rwari rwitabiriye ryo gushishoza no guha agaciro ikintu cyose bagiye gukora cyane ko akantu gato gashobora kubabuza amahirwe.

Bernardin Uzayisaba wari Uhagarariye Ishami ry’Umuryango w’Abibumbye ryita ku Iterambere, UNDP, yijeje ko bazakomeza gutera inkunga ArtRwanda- Ubuhanzi.

Ati “Urubyiruko rw’u Rwanda rufite amahirwe. Rufite umusingi, niba uhari bivuze ko hari amahirwe. N’ubuyobozi bushyira imbere urubyiruko abari mu mijyi no mu cyaro. Umusingi nyawo ni ufungura icyerekezo cy’igihugu.’’

Umuyobozi Mukuru wungirije wa Imbuto Foundation, Umutesi Geraldine yijeje abari aho ko ikiraje ishinga uyu muryango ari ugukomeza guteza imbere impano no kuzagura, yongeraho ko kuziteza imbere bidahagije ahubwo banafite gahunda yo gufasha abanyempano bo muri ArtRwanda-Ubuhanzi kuzibyaza umusaruro.

Ati “Tuzakomeza kwagura impano. Iyo tuvuze kwagura impano ntabwo ari ukugufasha kuyishyira mu bikorwa gusa ahubwo hazaho no kugufasha kuyibyaza umusaruro. Turi igihugu gito mu buso ariko ntabwo turi bato mu mitekereze. Muri Rubavu habaye ishuri ryatangiriyemo kwigisha ubugeni n’ubukorikori rero byari ngombwa ko dutangirira aha uyu munsi.”

Yabwiye urubyiruko gutekereza kuri ejo heza harwo n’imbogamizi zirwugarije. Yavuze ko ababyeyi n’igihugu ntacyo batakoze kandi n’aho batagejeje ubu na rwo rwagerageza kusa ikivi cyabo.

Ati “Iyo umuntu adafite aho ashinze imizi ntabwo ashobora gukura. Mukomeze guteza imbere igihugu muzagisige gisa neza kurusha uko abakurambere bagisize.”

Kanyana Nadine usanzwe ahanga imideli agaruka ku cyo kwitabira ArtRwanda-Ubuhanzi byamumariye, yagize ati “ Byaje kumwe amahirwe aba ari ayawe. Nari nsanzwe nkunda imideli. Nakoreraga abantu bo mu muryango.Nari mfite iyo mpano ariko ntaratangira kuyibyaza umusaruro. Inshuti zanjye nizo zangiriye inama yo kwitabira. Ubu ngeze ku rwego rushimishije ntabwo ndagera aho nifuza ariko ndi kuhabona. Natangiye nkorera mu cyumba ariko ubu mfite aho nkorera nanatanze akazi.”

Umuyobozi w’Akarere ka Rubavu, Kambogo Ildephonse, yashimye uburyo igihugu guha urubyiruko umwanya.

Ati “Turashimira ko iki gikorwa cyatangirijwe hano. Ni igikorwa kigiye kuba ku nshuro ya kabiri bigaragaza ko igihugu cyacu giha urubyiruko umwanya. Turashimira Minisiteri y’Urubyiruko n’umuco, Imbuto Foundation n’abandi bagize uruhare mu guteza imbere iki gikorwa gifasha urubyiruko kuko ari rwo mbaraga z’ejo hazaza.”

Minisitiri w'Urubyiruko n'Umuco, Rosemary Mbabazi, ubwo yafataga ijambo yavuze ko hari hashize igihe kinini iri rushanwa ritaba ariko umusaruro wavuye mu bikorwa by’icyiciro cya mbere ari uwo kwishimirwa
Aimable Twahirwa usanzwe ari Umuyobozi ushinzwe Iterambere ry'Umuco muri Minisiteri y'Urubyiruko n'Umuco, ari mu baganirije abitabiriye
Band ya Centre Culturel Vision Jeunesse Nouvelle yashimishije abitabiriye
Bernardin Uzayisaba wari Uhagarariye Ishami ry’Umuryango w’Abibumbye ryita ku Iterambere, UNDP, yijeje ko bazakomeza gutera inkunga ArtRwanda- Ubuhanzi
Hatangijwe icyiciro cya kabiri cya ArtRwanda-Ubuhanzi
Igikorwa cyabereye muri Centre Culturel Vision Jeunesse Nouvelle i Rubavu
Iki gikorwa cyari gikumbuwe
Umuhango wo gutangiza icyiciro cya kabiri cya ArtRwanda-Ubuhanzi witabiriwe n'abayobozi mu nzego zitandukanye
Imfura zo muri ArtRwanda-Ubuhanzi zahawe rugari
Kanyana Nadine yavuze ko ArtRwanda-Ubuhanzi yamufashije akava ku gukorera mu cyumba ubu akaba afite abandi bakoze yahaye akazi barenga batanu afite n'ibiro
Makembe yashimishije benshi. Uyu musore avanga umuziki gakondo n'injyana zigezweho
Micomyiza Yannick usanzwe ari umuririmbyi ariko ubikorera i Rubavu, yitabiriye iki gikorwa atangaza ko abahanzi bo mu ntara bakwiriye guhabwa agaciro
Uhereye ibumoso Aimable Twahirwa usanzwe ari Umuyobozi ushinzwe Iterambere ry'Umuco muri Minisiteri y'Urubyiruko n'Umuco, Kanyana Nadine usanzwe ahanga imideli n'umuhanzi Micomyiza Yannick
Umunyarwenya Fally Merci uri mu mfura za ArtRwanda-Ubuhanzi ni we wri umusangiza w'amagambo
Umuririmbyi Makembe watsinze mu cyiciro cya mbere cya ArtRwanda-Ubuhanzi yashimishije benshi
Umuyobozi Mukuru wungirije wa Imbuto Foundation, Umutesi Geraldine, aha impanuro abitabiriye
Umuyobozi w'Akarere ka Rubavu, Kambogo Ildephonse, yashimye kuba gutangiza igikorwa cya ArtRwanda-Ubuhanzi, byabereye muri aka karere
Urubyiruko rwitabiriye ku bwinshi
Nyuma y'igikorwa urubyiruko rwacinye akadiho

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .