Riderman yongeye kunyura abakurikiye igitaramo Iwacu Muzika Festival

Yanditswe na Nsengiyumva Emmy
Kuya 2 Kanama 2020 saa 07:20
Yasuwe :
0 0

Ibitaramo bya Iwacu Muzika birakomeje kugeza abahanzi 15 barangiye, kuri uyu wa 1 Kanama 2020 hari hatahiwe Riderman na we utatengushye abakunzi be, kuko yagaragaje ubuhanga n’imbaraga mu gushimisha abari bakurikiye igitaramo cye.

Ku rubyiniro habanjeho umusore w’umunyarwenya Mercy wagaragaje impano ye muri Art-Rwanda Ubuhanzi, uyu akaba anamaze kubaka izina mu ruganda rw’imyidagaduro mu Rwanda.

Nyuma y’uyu munyarwenya hakurikiyeho abanyempano mu kubyina Cedric Marquez na Adelard, nabo basusurutsa abakunzi b’umuziki bari bakurikiye iki gitaramo.

Hakurikiyeho umuhanzi wa Gakondo, Michael Gakembe wamenyekanye muri Art-Rwanda Ubuhanzi, ariko umaze no kugaragaza impano ikomeye mu muziki.

Uyu ukunze kwiyita Sebuja w’Icyembe yataramye afatanyije n’itsinda ry’abacuranzi, Umurage Band.

Nyuma y’aba bahanzi hakurikiyeho Riderman wari umuhanzi w’umunsi, Umugaba mukuru w’Ibisumizi wafatanyaga na Symphony Band. Yinjiriye mu ndirimbo ye “Inyuguti ya R”.

Nyuma y’indirimbo ya gatatu Riderman yafashe umwanya aganiriza abamukurikiye kuri Televiziyo Rwanda no kuru YouTube, akangurira imiryango itandukanye y’abanyarwanda kongera ibiganiro hagati yabo, kuko ibiganiro aribyo byatuma "twubaka igihugu cyacu."

Nyuma y’ako kanya gato yakurikijeho indirimbo ahuriyemo n’abahandi bahanzi yise “Ntakibazo”, akurikizaho Nisamehe na Comeback yakoranye na Safi Madiba.

Riderman yaririmbye nyinshi mu ndirimbo ze zakunzwe, kugeza saa yine z’ijoro ubwo yasozaga igitaramo cye cyari cyatangiye saa mbiri n’iminota 45.

Riderman yasoje igitaramo yibutsa abantu ingamba zo kwirinda Covid-19 zirimo guhana intera, gukaraba kenshi ndetse no kwambara agapfukamunwa kandi neza.

Yongeye gusaba abanyarwanda kwizerana, gusabana, kugira ngo bakomeze biyubakire igihugu. Hahise hatangazwa Yvan Buravan nk’umuhanzi uzatarama tariki 8 Kanama 2020.

Ibitaramo bya Iwacu Muzika Festival byatewe inkunga na Banki ya Kigali, Inteko Nyarwanda y’Ururimi n’Umuco (RALC), Minisiteri y’Urubyiruko n’Umuco, Tembera u Rwanda na Art-Rwanda-Ubuhanzi.

Iwacu Muzika Festival ni ubwa kabiri iri kuba. Mu mwaka wa 2019 bwo yazengurutse mu ntara zose z’igihugu, abahanzi batandukanye bashimisha abakunzi babo.

Umunyarwenya Mercy niwe wafunguye urubyiniro
Hakurikiyeho umuhanzi wa Gakondo, Michael Gakembe wamenyekanye muri Art Rwanda Ubuhanzi
abanyempano mu kubyina Cedric Marquez na Adelard nabo basusurukije abakunzi b'umuziki bari bakurikiye iki gitaramo
Riderman yafashwaga n'umuraperi ukizamuka Kaligombe
Riderman yongeye kugaragaza ubuhanga bwe mu muziki
Igitaramo cyasojwe kigeze aharyoshye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .