R. Kelly arashinjwa gutanga ruswa ngo arongore Aaliyah ku myaka 15 y’amavuko

Yanditswe na Uwiduhaye Theos
Kuya 9 Ukuboza 2019 saa 12:23
Yasuwe :
0 0

Uko bukeye n’uko bwije umuhanzi mu njyana ya RnB muri Leta Zunze Ubumwe za Amerika, Robert Kelly [R. Kelly] ntasiba mu manza ashinjwa ibyaha bitandukanye. Ubu noneho ari gushinjwa gutanga ruswa ngo ashyingiranwe na Aaliyah.

R. Kelly yajyanywe mu rukiko rukuru rwo muri New York. New York Times itangaza ko icyaha aregwa gifitanye isano no gukoresha ibyangombwa by’ibihimbano ngo asezerane n’umuhanzikazi Aaliyah Dana Haughton wari ufite imyaka 15.

Byemejwe mu kirego kivuguruye cy’abashinjacyaha bo mu Burasirazuba bwa New York, bahamya R. Kelly guha ruswa umukozi wa leta ya Illinois mu bihe byo ku wa 30 Kanama 1994 akamuha ibyangombwa by’ibihimbano.

Iki kirego gifitanye isano n’umubano wa Aaliyah Haughton wari ufite imyaka 15 mu 1994 ubwo byavugwaga ko yashyingiranywe na R. Kelly muri icyo gihe.

Nyuma gusezerana kwabo kwaje guseswa n’urukiko rwa New York bigizwemo uruhare n’umuryango wa Aaliyah wari wongerewe imyaka ku byangombwa R. Kelly yari afite ngo bigaragare ko yujuje imyaka y’ubukure.

Steve Greenberg uburanira R. Kelly yavuze ko iki kirego gishya bagiye kugisuzuma.

Ati “Ikirego tugiye kugisuzuma. Bigaragara ko nta kintu cyahindutse muri iki kirego. Tugiye gukomeza kubikurikirana kugeza igihe R. Kelly azabera umwere.”

Urukiko rwo New York biteganyijwe ko ruzasubukura uru rubanza rwa R. Kelly muri Gicurasi 2020.

Aaliyah bari gushinja R. Kelly gushyingiranwa nawe yatanze ruswa, yitabye Imana mu 2001 afite imyaka 22 nyuma y’impanuka y’indege yari arimo.

Uyu munyamerikakazi wari umunyamideli, umuhanzikazi, umubyinnyi n’umukinnyi wa Filime yavutse mu 1979 i Brooklyn muri New York akurira i Detroit muri Leta ya Michigan muri Amerika. Yitaba Imana mu 2001 mu mpanuka y’indege yabereye muri Bahamas.

Iki kirego kije nyuma y’ibindi byinshi uyu muhanzi yagiye ashinjwa muri Leta zitandukanye, aho akurikiranyweho ibyaha bijyanye no gusambanya abana bataruzuza imyaka y’ubukure.

Ubushinjacyaha bwa Leta za Illinois na New York bwamushinjije gushaka abagore ajyana mu buraya, kwishyura abantu kugira ngo bamuhishire no gutanga amafaranga kugira ngo asubizwe amashusho yamugaragazaga asambana n’abana batarageza ku myaka y’ubukure n’ibindi.

Muri Gashyantare yahakanye ibyaha 10 yashinjwaga n’ubushinjacyaha bwo muri Leta ya Illinois arafungwa aza kurekurwa atanze ingwate y’ibihumbi $100.

R. Kelly arashinjwa kuba yarakoresheje ibyangombwa by'ibihimbano agashyingiranwa na Aaliyah mu ibanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .