Iri siganwa ryabanjirijwe n’igikorwa cyo kwibuka Jenoside yakorewe Abatutsi, aho abakinnyi bitabiriye babanje gusura Urwibutso rwa Musha.

Nyuma yo guhabwa ikaze n’Umuyobozi w’Akarere ka Rwamagana, aba bakinnyi basobanuriwe amateka yo mu gace ka Musha muri Jenoside yakorewe Abatutsi ndetse umwe mu baharokokeye agira umwanya wo guha ubuhamya abari bitabiriye ‘Sprint Rally GMT’.

Inkuru ya mbere yari yitezwe muri iri siganwa ni ukubona Ish Kevin ahinguka aho ryagombaga kubera cyane ko ari ubwa mbere yari agiye kurikina.

Ikindi cyari cyitezwe ni ukubona uyu muraperi ahatana n’abarimo umubyeyi we (utanabashije kurangiza isiganwa kubera ikibazo imodoka yaje kugira).

Ubwo yiteguraga gutangira isiganwa, Ish Kevin yaje gutungurwa n’inshuti ye, Shaddyboo yari yitabiriye iri siganwa mu rwego rwo kumushyigikira.

Ish Kevin atitaye ko ari ubwa mbere yari yitabiriye isiganwa ry’imodoka, mbere yo kwinjira mu modoka yabwiye IGIHE ko agiye guhatanira kwegukana iri rushanwa.

Isiganwa ryaje gutangira, icyakora mu modoka 11 ziyandikishije hasiganwe zirindwi, mu gihe hasoje eshanu kuko ebyiri zagiriye ibibazo mu nzira.

Ish Kevin wegukanye umwanya wa gatatu yavuze ko yinjiye muri iri rushanwa kubera urukundo umuryango we ukunda umukino wo gusiganwa ku modoka.

Uyu muraperi watangiye afasha mukuru we gutwara imodoka bakegukana umwanya wa gatatu, yavuze ko yishimiye uyu mwanya ndetse ahamya ko bakomeje guhesha ishema umubyeyi wabo wabatoje.

Ati “Turi gutera ishema umubyeyi wacu kuko biragaragara ko yigishije neza.”

Jacques Hakizimana, mukuru wa Ish Kevin wari unatwaye abifashijwemo na murumuna we yavuze ko yanyuzwe bikomeye n’uburyo bakoranye.

Ati “Ish Kevin arabizi imodoka ni ibintu by’umuryango wacu, ikintu cyanshimishije ni uko atagira ubwoba noneho atanga amasomo yo mu muhanda neza. Bigaragaza ko imbere he ari heza.”

Uwabaye uwa kabiri ni Nshimiyimana Adolph usanzwe ufatanya na Anita Pendo, nubwo uyu mugore atabashije kuboneka, ibyatumye yiyambaza uwitwa Cyusa Regis.

Ku mwanya wa mbere w’iri siganwa ryabimburiye andi yose muri shampiyona y’uyu mwaka, haje Kalimpinya Queen.

Kalimpinya Queen wegukanye iri siganwa yavuze ko byamushimishije kuko kuva yatangira gukina aribwo abaye uwa mbere.

Ati “Ni urugendo rutangiye neza, twizeye ko ibikombe tuzakomeza kubifata atari ibyo mu Rwanda gusa ahubwo n’ibyo mu mahanga.”

Kalimpinya ukomeje gutaka kuba afite imodoka ishaje, ahamya ko mu gihe yabona inshya yabasha kwitabira amarushanwa mpuzamahanga akanayegukana.

Ngabo Olivier ukinana na Kalimpinya Queen ahamya ko kuba ari umukinnyi ukiri muto, wumva kandi uzamura urwego aribyo bintu byamushimishije kuri Kalimpinya bikanatuma barambana.

Yaba Kalimpinya na Ish Kevin bahuriye ku kuba iri siganwa bitwayemo neza ryabongereye imbaraga ku buryo mu yandi marushanwa bazarushaho kwitwara neza.

Buri modoka yabanzaga kugenzurwa

Queen Kalimpinya nyuma yo gusanga imodoka ye yujuje byose bisabwa ngo yitabire isiganwa

Aha bafungaga utwa nyuma ku modoka ya Queen Kalimpinya

Queen Kalimpinya nawe yabanje kureba ko buri kimwe kiri ku murongo

Queen Kalimpinya hano yahaga imbaraga uwitwa Niwemugore Jamila ukiri mushya muri uyu mukino

Ngabo Olivier ukinana na Kalimpinya Queen aba atunganya buri kamwe mbere y'uko yinjira mu isiganwa

Ish Kevin ari kumwe n'umuvandimwe we bahingutse aho irushanwa ryagombaga gutangirira

Ish Kevin yari agiye gukina isiganwa rye rya mbere

Ish Kevin yahageze akurikiranye n'umubyeyi we Semana Genese uyu munsi bari bahatanye

Imodoka Ish Kevin yaserukanye

Icyizere cyari hejuru kuri Ish Kevin wari witebiriye Sprint Rally GMT2025

Umubyeyi wa Ish Kevin areba neza imodoka ye uko ihagaze mbere yo guhaguruka

Nyuma yo gusuzuma imodoka zose zemerewe kujya mu irushanwa zashyizwe hamwe

Umubyeyi wa Ish Kevin akora ku modoka ye bwa nyuma mbere y'uko isiganwa ritangira

Ish Kevin na Nshimiyimana Adolphe usanzwe akinana na Anita Pendo

Indamukanyo yabo yibajijweho n'abatari bake

Kalimpinya Queen aha ikaze Ish Kevin mbere y'uko batangira isiganwa

Mbere yo gutangira isiganwa babanje gusura Urwibutso rwa Jenoside rwa Musha

Abasiganwa babanje kuganirizwa ku mateka ya Jenoside yakorewe Abatutsi i Musha

Bahawe ikiganiro n'umuyobozi wa Ibuka mu Karere ka Rwamagana

Iki gikorwa cyitabiriwe n'Umuyobozi w'Akarere ka Rwamagana (wa gatatu uturutse iburyo)

Bafashe umwanya wo kunamira abishwe muri Jenoside yakorewe Abatutsi bashyinguye mu Rwibutso rwa Musha

Bashyize indabyo ku mva zishyinguyemo abarenga ibihumbi 20 bishwe muri Jenoside yakorewe Abatutsi i Musha

Ish Kevin yatunguwe na Shaddyboo witabiriye iki gikorwa mu kumushyigikira

Ati "Ntibamwibe, Ish Kevin niwe wegukana umwanya wa mbere!"

Ish Kevin yabanje kuganiraho na Shaddyboo akanya gato mbere yo gutangira isiganwa

Abakinnyi babanje kuganirizwa ku mabwiriza y'irushanwa

Aha Ish Kevin yari afashe umuhanda

Buri wese aba ageragaza kwihuta ngo asiganwe n'ibihe

Shaddyboo yari mu bafana ba Ish Kevin no mu muhanda

Imihanda y'i Rwamagana yatanze ibyishimo ku bakunzi b'imodoka

Shaddyboo n'abana b'i Musha bashyigikiye bikomeye Ish Kevin

Nubwo imihanda iba itoroshye ariko abahanga bayinyuramo bemye

Nubwo imvura yageze aho ikagwa ariko akavumbi ntikabura mu muhanda uri kuberamo iri siganwa

Icyondo n'ivumbi ku mapine y'imodoka zasiganwaga bigaragaza ko haguye akavura

Hari ababa bavuye i Kigali bitabiriye uyu mukino

Abaturage b'ahabera iyi mikino babona umwanya wo kwihera ijisho

Ish Kevin na mukuru we bahembwe nk'abagatatu muri iri rushanwa

Ish Kevin yishimira igikombe cy'umwanya wa gatatu yahawe

Umufana arya agafoto kuri Ish Kevin

Byari ibyishimo kuri Kalimpinya Queen washyikirizwaga igihembo cy'umukobwa witwaye neza muri iri siganwa

Kalimpinya na Ngabo Olivier bakinana begukanye umwanya wa mbere muri 'Sprint Rally GMT 2025'

Ibyishimo byari byose kuri Kalimpinya na Ngabo bakinana ubwo bari bamaze kwegukana umwanya wa mbere

Amafoto: Kwizera Remy Moses