00:00:00 IGIHE NETWORK KN KINYARWANDA EN ENGLISH FR FRANCAIS

Producer Pastor P agiye gushyira hanze album yibanda ku njyana gakondo

Yanditswe na Mukahirwa Diane
Kuya 11 Mutarama 2023 saa 07:38
Yasuwe :

Ndanga Bugingo Patrick wamamaye mu gutunganya imiziki nka Pastor P, agiye gushyira hanze album ikubiyemo indirimbo 12, zibanda ku njyanya gakondo y’Abanyarwanda.

Iyi album yise ‘Inka Yanjye’ izajya hanze ku wa 4 Kanama 2023, ikazaba ikubiyeho indirimbo z’indobanure muzo Pastor P yakoze, afatanyajije n’abahanzi bo mu Rwanda n’abandi mpuzamahanga.

Mu kiganiro yagiranye na IGIHE yavuze ko amaze igihe kinini akora indirimbo zitandukanye ubu agiye guhitamo 12, ziri mu njyana zitandukanye ariko zigaruka kuri gakondo.

Ati “Indirimbo ziriho zizaba zivanze kuko hariho ijyanya nyinshi zitandukanye ariko nanjye ubwanjye narimaranye igihe igitekerezo nshaka gushyira mu bikorwa cyo kuvanga indirimbo gakondo n’izigezweho. Ni indirimbo zigezweho ariko muri buri imwe ugasangamo igice cya gakondo.”

Yakomeje avuga ko yagize igitekerezo cyo gukora album kuko ashaka ko ibitekerezo bye yabisangiza abandi kandi ko yifuza ko Abanyarwanda baryoherwa n’umuziki wabo.

Ati “Numvaga nk’umuntu umaze igihe nkora umuziki cyane kandi nk’abari kuzamuka hari byinshi bagiye bandeberaho, ndavuga ngo mu nzira nakurikiye reka nkore ku buryo bushya bushobora kugira ku kintu kinini kugira ngo ibyo mfite mu bitekerezo bijye mu bikorwa.”

Yakomeje ati “Ahanini nifuza ko Abanyarwanda bakongera kwihuza n’umuco muri rusange, ku muziki wa gakondo n’uwo hanze turawukunda ariko ntuzaze ngo udutware ibyacu ahubwo tuzabihuze nabyo turebe ukuntu twabihuza ariko tutibagiwemo ibyacu by’i Kinyarwanda.”

Pastor P yakoze indirimbo zitandukanye zakunzwe nka “Adi Top” ya Meddy, “Habibi” ya The Ben, “Indoro” ya Charly na Nina n’izindi zo mu bihe byashize nka “Mu Gihirahiro” ya Jay Polly, “Sintuza” ya Urban Boys n’izindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .